វីដេអូចម្រៀង១០បទចំណាយដើមទុនផលិតច្រើនបំផុតក្នុងប្រវត្តិសាស្ត្រ

2015-07-22 15:05:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីបង្កើនភាពទាក់ទាញ ក៏ដូចជាបង្កើនការលក់សម្រាប់អាល់ប៊ុម តារាចម្រៀងរួមទាំងផលិតកម្មល្បីៗអន្តរជាតិ តែងបោះទុនច្រើនក្នុងការផលិតវីដេអូចម្រៀង។ បើទោះជាបច្ចុប្បន្នវីដេអូចម្រៀងកាន់តែមានលក្ខណៈទំនើប តែបើនិយាយពីវីដេអូដែលចំណាយលុយថតអស់ច្រើនបំផុតនោះ ភាគច្រើនគឺវីដេអូកាលពីជាង ២០ឆ្នាំមុន ត្បិតពេលនោះបច្ចេកទេសនីមួយៗមិនងាយស្រួលដូចបច្ចុប្បន្នឡើយ។ ខាងក្រោមនេះគឺជាវីដេអូដែលចំណាយដើមទុនអស់ច្រើនបំផុតក្នុងប្រវត្តិសាស្ត្រ៖

១០. “Doesn’t Really Matter” របស់ Janet Jackson ចំណាយអស់ ២,៥លានដុល្លារ

បទចម្រៀងរបស់ប្អូនស្រី Michael Jackson មួយបទនេះបានចេញក្នុងឆ្នាំ២០០០ ក្នុងអាល់ប៊ុម " Nutty Professor II”។ វីដេអូចម្រៀងនេះដឹកនាំដោយលោក Joseph Kanh និងបានក្លាយជាវីដេអូចម្រៀងទី១០ដែលចំណាយលុយផលិតអស់ច្រើនបំផុត។

៩. “Heartbreaker” របស់ Mariah Carey feat. Jay-Z ចំណាយអស់ ២,៥លានដុល្លារ

“Heartbreaker” បានចេញនៅឆ្នាំ១៩៩៩ និងជាបទចម្រៀងល្បីបំផុតមួយបទរបស់ Mariah Carey ជាមួយ Jay-Z។ ទោះយ៉ាងណាវីដេអូដែលដឹកនាំដោយ Brett Ratner នេះមិនមានការចូលរួមសម្ដែងពី Jay-Z ឡើយ ដោយសារការចរចាលក្ខខណ្ឌមិនត្រូវគ្នា។

៨. “2 Legit 2 Quit” របស់ MC Hammer ចំណាយអស់ ២,៥លានដុល្លារ

បទចម្រៀងរបស់ MC Hammer មួយបទនេះទទួលបានការគាំទ្រយ៉ាងខ្លាំងក្រោយចេញលក់ក្នុងឆ្នាំ១៩៩១ ដោយបានជាប់ចំណាត់ថ្នាក់លេខ៥លើតារាង Billboard Hot 100។ វីដេអូចម្រៀងដែលមានរយៈពេល ១៥នាទីនេះដឹកនាំដោយ Rupert Wainwright និងចំណាយប្រាក់អស់ជាង ២,៥លានដុល្លារ ដែលស្មើនឹង ៤,៥លានដុល្លារនាពេលបច្ចុប្បន្ន។

៧. “Victory” របស់ Puff Daddy ចំណាយអស់ ៣លានដុល្លារ

បទចម្រៀងនេះបានចេញក្នុងឆ្នាំ១៩៩៧ នៅពេលដែលកេរ្តិ៍ឈ្មោះរបស់តារាចម្រៀងរ៉េប Puff Daddy កំពុងល្បីល្បាញ។ វីដេអូចម្រៀងដឹកនាំដោយ Marcus Nispel និងចូលរួមសម្ដែងដោយតារាល្បីៗមួយចំនួនទៀតដូចជា Danny DeVito, Dennis Hopper និង Busta Rhymes។

៦. “Estranged” របស់ Guns N Roses ចំណាយអស់ ៤លានដុល្លារ

វីដេអូបទ "Estranged” ដែលមានរយៈពេលជិត ១០នាទី បានចេញកាលពីឆ្នាំ១៩៩៣ ដោយចំណាយដើមទុនផលិតអស់ជិត ៤លានដុល្លារ។

៥. “Black or White” របស់ Michael Jackson feat. LTB ចំណាយអស់ ៤លានដុល្លារ

វីដេអូចម្រៀង Michael Jackson មួយបទនេះ បានចេញកាលពីឆ្នាំ១៩៩១ និងបានក្លាយជាវីដេអូដែលមានអ្នកទស្សនាច្រើនបំផុតនៅតាមប៉ុស្តិ៍ទូរទស្សន៍ល្បីៗជំនាន់នោះដូចជា MTV, BET, VHI និង FOX។ ដឹកនាំដោយលោក John Landis វីដេអូនេះត្រូវបានគេរិះគន់ច្រើនត្រង់ឈុតបង្កើនអារម្មណ៍សិចមួយចំនួនរបស់ Michael Jackson។

៤. “Bedtime Story” របស់ Madonna ចំណាយអស់ ៥លានដុល្លារ

ចំណាត់ថ្នាក់លេខ៤ លេខ៣ និងលេខ២ ក្នុងបញ្ជីនេះ នឹងជាវីដេអូរបស់តារាចម្រៀង Madonna ទាំងអស់។ បទ "Bedtime Story” កាលពីឆ្នាំ១៩៩៥ ដែលដឹកនាំដោយ Mark Romanek បានចំណាយ ដើមទុនផលិតអស់ ៥លានដុល្លារ។

៣. “Express Yourself” របស់ Madonna ចំណាយអស់ ៥លានដុល្លារ

“Express Yourself” ដែលជាវីដេអូចំណាយច្រើនបំផុតលំដាប់ទី៣ បានចេញកាលពីឆ្នាំ១៩៨៩។ នេះជាបទចម្រៀងល្បីបំផុតរបស់តារាចម្រៀង Madonna និងបានជាប់ចំណាត់ថ្នាក់លេខពីរលើតារាង Billboard Hot 100។ ការចំណាយច្រើនបំផុតក្នុងវីដេអូនេះគឺទៅលើការរៀបចំឆាក និងការប្រើប្រាស់ភាពសិចស៊ី។ ខាងក្រោមនេះគ្រាន់តែជាវីដេអូសម្ដែងផ្ទាល់របស់ Madonna ប៉ុណ្ណោះចំណែកវីដេអូ MV ដើមលើ Youtube គឺមិនត្រូវបានអនុញ្ញាតឲ្យទស្សនាឡើយក្នុងប្រទេសកម្ពុជា៖

២. “Die Another Day” របស់ Madonna ចំណាយអស់ ៦លានដុល្លារ

នេះគឺជាបទចម្រៀងមួយបទដែល "Madonna” ច្រៀងសម្រាប់ខ្សែភាពយន្ត James Bond ដែលចេញកាលពីឆ្នាំ២០០២។ ដោយគិតថាឈុតឆាកពីខ្សែភាពយន្តមិនល្អគ្រប់គ្រាន់ Madonna បានសម្រេចចិត្តថតវីដេអូថ្មីសម្រាប់បទនេះដោយចំណាយប្រាក់អស់ ៦លានដុល្លារ។

១. “Scream” របស់ Michael Jackson & Janet Jackson ចំណាយអស់ ៧លានដុល្លារ

បទចម្រៀងឆ្លើយឆ្លងរបស់បងប្អូន Michael មួយបទនេះ បានចេញកាលពីឆ្នាំ១៩៩៥។ វីដេអូនេះបានជាប់ជាបេក្ខភាពដណ្ដើមពានរង្វាន់ Grammy Awards និងជាវីដេអូដែលចំណាយដើមទុនផលិតច្រើនបំផុតក្នុងប្រវត្តិសាស្ត្ររហូតមកដល់បច្ចុប្បន្ន។ មិនត្រឹមតែជាវីដេអូដែលចំណាយការថតអស់ច្រើនបំផុត ប៉ុន្តែ "Scream” ក៏ជាវីដេអូចម្រៀងដ៏មានឥទ្ធិពលបំផុតដែរ។