៦ចំណុចជួយឲ្យអ្នកធ្វើបទបង្ហាញបានរលូន

2015-07-23 21:16:44
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅពេលឡើងធ្វើបទបង្ហាញ មិនថានៅសាលារៀន នៅក្រុមហ៊ុន ឬនៅកន្លែងណានោះទេ គ្រប់ៗគ្នាតែងប្រាថ្នាចង់និយាយឲ្យបានល្អ ទាក់ទាញចំណាប់អារម្មណ៍អ្នកស្ដាប់ អ្នកមើល ដោយពុំមានការភិតភ័យ។ ការត្រៀមរៀបចំទុកមុន និងប្រើវិធីសាស្ត្រត្រឹមត្រូវក្នុងការនិយាយពេលធ្វើបទបង្ហាញគឺជាការប្រសើរ ប៉ុន្តែមិនប្រាកដថាគ្រប់គ្នាធ្វើបាននោះទេ។ សាកមើលវិធីសាស្រ្ដមួយចំនួនខាងក្រោមនេះ រួចសាកអនុវត្តន៍ទាំងអស់គ្នា៖

មុនពេលធ្វើបទបង្ហាញ

១. រៀបចំប្រធានបទឲ្យបានល្អ

ប្រាកដណាស់ដើម្បីធ្វើបទបង្ហាញបានល្អ គឺត្រូវស្រាវជ្រាវរាល់ព័ត៌មានទាក់ទងនឹងប្រធានបទដោយសង្ខេប និងស្វែងយល់ពីចំណុចសំខាន់ៗ។ បើប្រធានបទវែង អ្នកអាចស្រង់ចំណុចសំខាន់ដែលត្រូវនិយាយក្នុងក្រដាសតូចមួយ ដើម្បីរំលឹកអ្នកកុំឲ្យភ្លេច ប៉ុន្តែចៀសវាងការកត់ត្រាទាំងដុល ធ្វើឲ្យអ្នកច្របូកច្របល់។

២. អនុវត្តមុន

មុនពេលការធ្វើបទបង្ហាញ គួរបានអនុវត្តខ្លះ ដោយការហាត់និយាយម្នាក់ឯងនៅមុខកញ្ចក់ ឬអាចឲ្យមិត្តភ័ក្ដិ បងប្អូន មកជួយស្ដាប់ និងផ្ដល់យោបល់ពីបទបង្ហាញនៃប្រធានបទរបស់អ្នក។ ការអនុវត្តមុន គឺជួយអ្នកមានទំនុកចិត្ត និងមិនភ្លេចពីចំណុចសំខាន់នៃប្រធានបទ។

៣. ស្លៀកពាក់ឲ្យបានស្អាតបាត

អ្នកគួរស្លៀកពាក់ឲ្យបានស្អាតបាតសមរម្យ សម្រាប់ការឡើងធ្វើបទបង្ហាញ។ វាបង្កើនភាពទាក់ទាញដល់អ្នកមើល ហើយក៏បង្ហាញពីទំនុកចិត្ត និងការរៀបចំយ៉ាងល្អរបស់អ្នកផងដែរ។ លើសពីនេះអ្នកគួរនិយាយរាក់ទាក់ជាមួយអ្នកមកមើលការធ្វើបទបង្ហាញ ដើម្បីបំបាត់ភាពភ័យខ្លាច។

អំឡុងពេលធ្វើបទបង្ហាញ

១. ជម្នះអារម្មណ៍ភ័យខ្លាច

នៅពេលឡើងនិយាយបង្ហាញទៅកាន់មនុស្សជាច្រើន សម្រាប់អ្នកមានអារម្មណ៍ភ័យ អាចដកដង្ហើមឲ្យវែងៗ ហើយអាចធ្វើសកម្មភាពមួយចំនួនដើម្បីបន្លប់ ដូចជាការញញឹមជាដើម ។ សម្រាប់ប្រយោគដំបូង អ្នកអាចសួរសំនួរមួយចំនួនទៅកាន់អ្នកមើល ទាក់ទងនឹងអ្វីដែលនឹងលើកមកបង្ហាញ។

២. ទាក់ទាញអារម្មណ៍អ្នកស្ដាប់

អ្នកអាចទាក់ទាញចំណាប់អារម្មណ៍អ្នកស្ដាប់ដោយ ព្យាយាមសម្លឹងមើលទៅពួកគេឲ្យបានគ្រប់គ្នា ។ នៅពេលបង្ហាញអ្នកត្រូវប្រាកដថា អ្នកនិយាយមិនខ្លាំង ឬខ្សោយពេក ច្បាស់ៗ និងពន្យល់ដោយសម្រួល ដើម្បីឲ្យអ្នកស្ដាប់ងាយយល់នូវអ្វីដែលអ្នកបង្ហាញ ។

៣. ធ្វើកាយវិការមួយចំនួន

បើអាច អ្នកគួរធ្វើកាយវិការមួយចំនួនផងដែរ ដូចជាសកម្មភាពដើរចុះឡើង ឬកាយវិការប្រើដៃ បង្ហាញពីប្រធានបទរបស់អ្នកតាមដែលអាចធ្វើបាន។ ធ្វើបែបនេះដើម្បីឲ្យបរិយាកាសទាក់ទាញ បាត់ភ័យ និងដំណើរការធ្វើបទបង្ហាញបានរលូន។ ចុងក្រោយអ្នកត្រូវត្រៀមឆ្លើយសំណួររបស់អ្នកស្ដាប់ ដោយយកចិត្តទុកដាក់ និងរៀនពីបទពិសោធន៍ទៅថ្ងៃក្រោយទៀត៕