អ៊ីវ៉ា ជម្រះទំនាក់ទំនងនាង និងតារាកំប្លែង ប៉ុមពុយ

2015-07-28 20:59:29
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងនៅក្នុងផលិតកម្មសាន់ដេ កញ្ញា អ៊ីវ៉ា ត្រូវបានប្រិយមិត្តយល់ច្រលំថាជាកូនរបស់អ្នកនាង ប៉ុមពុយ ខណៈពួកគេមានមុខមាត់ស្រដៀងគ្នា។ អ៊ី វ៉ា បានជម្រះបញ្ហានេះនៅក្នុងកម្មវិធី "អរុណសួស្តី ETV" កាលពីសប្ដាហ៍មុនថា រូបនាងមិនមានជាប់សាច់ឈាមអ្វីជាមួយតារាកំប្លែង ប៉ុមពុយ ទេ។

សំណួរពីករណីខាងលើនេះ ពិធីករនៅក្នុងកម្មវិធីខាងលើនាយ ចាប ចៀន បានសួរទៅ អ៊ី វ៉ា ដោយយកការយល់ច្រឡំរបស់ប្រិយមិត្តមួយចំនួនថា តើនាងជាកូនរបស់អ្នកនាង ប៉ុម ពុយ មែនឬទេ?

តារាស្រីដែលកំពុងល្បីផ្លាស់ប្ដូរផលិតកម្មរូបនេះ បញ្ជាក់ថា នាង និងតារាកំប្លែង ប៉ុមពុយ គ្រាន់តែមានមុខមាត់ស្រដៀងគ្នា ប៉ុន្តែអត់មានសាច់ឈាមនឹងគ្នា លើសពីទំនាក់ទំនងក្នុងសិល្បៈទេ។ អ៊ីវ៉ា បន្ថែមថា "មានអ្នកយល់ច្រលំថាខ្ញុំជាកូនបង ប៉ុមពុយ ថ្ងៃមុនខ្ញុំបានជួបគាត់ហើយគាត់ហៅញ៉ុម...អឺកូន...ខ្ញុំក៏ឆ្លើយវិញថា...ចាសម៉ាក់...កាន់តែធ្វើឲ្យមានការយល់ច្រឡំទៀត ហើយបន្ទាប់មកពួកខ្ញុំក៏បានសួរសុខទុក្ខគ្នាធម្មតា"។

យ៉ាងណា រំលឹកទៅក្រោយបន្តិច ម្ចាស់បទ "មានជាតិក្រោយសុំធ្វើប្រពន្ធបង" រូបនេះបានបញ្ជាក់ថា ការយល់ច្រឡំខាងលើ ពិតជាមានច្រើនគួរកត់សម្គាល់។ ជាក់ស្ដែងថ្ងៃមុននាងបានទៅប្រគំតន្រ្តីនៅរមណីយដ្ឋានមួយហើយមានសមាជិកក្រុមកំប្លែងម្នាក់យល់ច្រលំថានាងជាកូនរបស់អ្នកនាង ប៉ុម ពុយ ទៀត។

អ៊ីវ៉ា លើកឡើងថា “ថ្ងៃមុនខ្ញុំទៅប្រគំតន្រ្តីនៅរមណីយដ្ឋានមួយហើយមានបងក្នុងក្រុមកំប្លែងម្នាក់ឃើញខ្ញុំហើយបាននិយាយថា...កូនបង ពុយម៉េចធ្វើហំម៉េស ឃើញឯងអត់មានសួរអីម៉ាម៉ាត់កាលពីនៅផ្ទះដូចជារួសរាយ ប៉ុន្តែតាមការពិតខ្ញុំអត់ស្គាល់គាត់ទេ"។

យ៉ាងណា នោះសុទ្ធជាការយល់ច្រឡំប៉ុណ្ណោះ។ "និយាយរួមទៅឥឡូវនៅតែមានគេយល់ច្រលំហើយពេលខ្ញុំទៅណាមកណាមានគេឆ្ងល់ហើយសួរថាខ្ញុំកូនបងប៉ុមពុយមែនប៉ុន្តែអត់ទេគ្រាន់តែខ្ញុំនឹងគាត់មានមុខស្រដៀងគ្នា"។ អ៊ី វ៉ា បញ្ចាក់។

ម្តាយរបស់ អ៊ីវ៉ា ឈ្មោះ ភួង សុខា តែបានទទួលមរណភាពទៅហើយនៅអាយុ ៤២ ឆ្នាំដោយរោគាពាធ កាលពីថ្ងៃអាទិត្យ ទី១ ធ្នូ ឆ្នាំ២០១៣ វេលាម៉ោង៦ និង២នាទី៕

អត្ថបទ៖ ថា ម៉ាលីដា