វិធីផ្ដិតយករូបភាពដ៏ស្រស់ស្អាតរបស់ព្រះចន្ទ

2015-07-29 13:00:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រសិនបើយើងមើលព្រះចន្ទនឹងភ្នែកផ្ទាល់ គឺវាមានភាពស្រស់ស្អាតទាក់ទាញ ប៉ុន្តែប្រសិនបើយើងចង់ផ្ដិតយករូបភាពរបស់ព្រះចន្ទឲ្យបានស្អាត ដូចអ្វីដែលយើងបានឃើញផ្ទាល់នោះ មិនមែនជាការងាយទេ។

ខាងក្រោមនេះជាវិធីសាស្ត្រដើម្បីផ្ដិតយករូបភាពព្រះចន្ទឲ្យបានស្រស់ស្អាត៖

ត្រូវមានឧបករណ៍ដែលត្រឹមត្រូវ៖

ព្រះចន្ទគឺមានចម្ងាយឆ្ងាយ ដូចនេះយើងត្រូវមានឧបករណ៍ជំនួយដើម្បីអាចផ្ដិតរូបភាពរបស់វាបានច្បាស់។ ឧបករណ៍ដែលយើងត្រូវការជាចាំបាច់នោះគឺ ឡេន (Len) ហើយឡេននោះយ៉ាងហោចណាស់ក៏ត្រូវតែជាប្រភេទ 200mm 400mm ឬ 800mm ទើបអាចចាប់យករូបភាពបានរាងឆ្ងាយ។ ហើយឧបករណ៍មួយទៀតនោះ គឺជើងទ្រកាមេរ៉ាដើម្បីអាចទទួលបានលំនឹងល្អ។

ពេលវេលា៖

ព្រះចន្ទមិនដូចជាព្រះអាទិត្យនោះទេគឺរូបរាងរបស់វាប្រែប្រួលជានិច្ច ហើយនៅពេលព្រះចន្ទពេញវង់គឺជាពេលវេលាដ៏ល្អមួយ ព្រោះវាអាចបញ្ចេញពន្លឺបានច្បាស់ល្អ។ ចំណែកឯព្រះចន្ទមិនពេញវង់វិញគឺត្រង់ចំណុចងងឹត គឺងងឹតខ្លាំង ហើយចំណុចដែលមានពន្លឺគឺភ្លឺខ្លាំង។

ចាប់យកឲ្យច្បាស់ពីរូបរាងរបស់ព្រះចន្ទ៖

រូបថតព្រះចន្ទភាគច្រើនគឺមិនមានបង្ហាញច្បាស់ដូចអ្វីដែលយើងបានឃើញផ្ទាល់ភ្នែកនោះទេ ដោយសារការប្រើប្រាស់ពន្លឺខុស។ ដូចនេះពេលដែលថត អ្នកមិនត្រូវប្រើពន្លឺខ្លាំងពេកនោះទេ គឺគួរកំណត់មុខងារ Bracketing ឲ្យមាន EV-2។

មួយវិញទៀតគឺជៀសវាងការប្រើប្រាស់មុខងារ Auto គឺយើងគួរកំណត់ដោយខ្លួនឯង។ អ្នកអាចសាកល្បងប្រើកម្រិត ISOត្រឹម 200, Aperture F11 និង Shutter Speed ល្បឿន1/125 រួចចាប់ផ្ដើមសាកល្បងថត។ អ្នកអាចធ្វើការផ្លាស់ប្ដូរល្បឿន Shutter Speed ដើម្បីស្វែងរកកម្រិតពន្លឺដែលអ្នកយល់ថាល្អសម្រាប់អ្នក។ កុំភ្លេចបិទ Auto-focus ដែលអាចធ្វើឲ្យរូបភាពមានលក្ខណៈព្រិល។

-ចុចអាន៖ ប្លង់ថតកុនល្បីៗ សូម្បីភាពយន្តហូលីវូដក៏យកតាមនេះដែរ!

ប្រែសម្រួល៖ ហៃ សុខហេង ប្រភព៖ digital-photo-secrets