ពែកមី ខកចិត្តពេលឈុតខ្លះក្នុងរឿងទី២របស់លោកត្រូវកាត់ចោល
- 2015-07-30 17:29:43
- ចំនួនមតិ 0 | ចំនួនចែករំលែក 0
ពែកមី ខកចិត្តពេលឈុតខ្លះក្នុងរឿងទី២របស់លោកត្រូវកាត់ចោល
ចន្លោះមិនឃើញ
"ខ្ញុំខកចិត្តខ្លាំង ព្រោះអ្វីដែលខ្ញុំខិតខំប្រឹងប្រែងយ៉ាងខ្លាំងប៉ុន្តែត្រូវកាត់ចោលចឹងវាត្រូវបាត់បង់ផ្នែកកំប្លែងខ្លះនៅក្នុងសាច់រឿង"។ ពែកមី ថ្លែងថ្ងៃសម្ពោធរឿង"ឪ២"កាលពីម្សិលមិញនៅរោងភាពយន្តលេជេនTK។
នាយ ពែក មី ដែលជាអ្នកនិពន្ធ និងដឹកនាំនៅក្នុងរឿង "ឪ២" នេះ បានពោលការសោកស្តាយចំពោះរឿងដែលលោកបានខិតខំប្រឹងប្រែងផលិតបែរជាត្រូវខាងក្រសួងស្នើកាត់ចោលនូវឈុតឆាកមួយចំនួន ព្រោះក្រសួងយល់ថា ស្រើបស្រាលពេក។
"ខ្ញុំមានអារម្មណ៍ថាស្តាយពេលដែលចំនុចមួយចំនួនដែលខ្ញុំគិតថាកំប្លែងនឹងធ្វើឲ្យទស្សនិកជនសើចសប្បាយហើយអាចទទួលយកបានប៉ុន្តែបែរជាត្រូវក្រសួងស្នើឲ្យកាត់ចោល។ ខ្ញុំក៏មិនមានអីតវ៉ាទេ ព្រោះពួកគាត់ជាអ្នកជំនាញស្រាប់ហើយ ។បើដឹងថាកន្លែងហ្នឹងវាមិនអាចទទួលបានចឹងពួកខ្ញុំមិនធ្វើទេ"។
ចំពោះរឿង"ឪ២"នេះនាយ ពែកមី បានប្រាប់ថាភាគច្រើនផ្ដោតទៅលើការកំប្លែង សើចសប្បាយ ឡប់ៗ មនោសញ្ជេតនាលាយឡំជាមួយឈុតកម្សត់តិចតួច។ តារាកំប្លែងដដែល បន្តថា សាច់រឿងដែលជាការស្រមើស្រមៃរបស់លោកពេលនិពន្ធ គិតជាភាគរយស្មើនឹង ១០០% នោះ គឺបានថយមកត្រឹមតែ៦០%ទេ។ ឧបសគ្គ គឺនាយលើកឡើងថា ទ្រឹស្ដី និងការអនុវត្តពិតមិនអាចត្រូវគ្នា ១០០% ដែលមកពីកត្តាជាច្រើនមានដូចជា ទីតាំង តួសម្ដែង និងពេលវេលាជាដើម។ ហើយការកាត់ចោលឈុតខ្លះ តាមសំណើររបស់ក្រសួង ជាហេតុផលមួយដែរ។
ជាមួយគ្នានេះលោក លៀក លីដា ចាងហ្វាងផលិតកម្ម LD ក៏បានពោលសោកស្តាយដូចគ្នា ចំពោះឈុតមួយចំនួននៃរឿងដែលត្រូវបានកាត់ចោល។
លោក ថ្លែងថា “ខ្ញុំមានអារម្មណ៍ថាសោកស្តាយនៅពេលដែលឈុតស្រើបស្រាលមួយចំនួនបានដកចេញដែលខ្ញុំគិតថាឈុតហ្នឹងវាមិនមែនជាការស្រើបស្រាលហួសដែនកំណត់នោះទេប៉ុន្តែឈុតដែលក្រសួងគិតថាស្រើបស្រាលហ្នឹងខាងពួកខ្ញុំបានកាត់ចោលរួចហើយ។ ចំនុចនេះខ្ញុំគិតថាសាច់រឿងរបស់ពួកខ្ញុំត្រូវបានបាត់បង់នូវគុណភាពខ្លះរបស់រឿងទាំងមូល"។
ប៉ុន្តែទោះជាយ៉ាងណា នាយពែកមីនិង លោក លៀក លីដា នៅតែសង្ឃឹមមុតមាំថារឿងនេះនឹងជោគជ័យ ១០០% បើធៀបទៅនឹងរឿង "2Brothers”ព្រោះលើកនេះមានការបន្ថែមឈុតសើចសប្បាយជាងរឿងមុន បើទោះជាត្រូវបានកាត់ចោលខ្លះមែន។ រឿង"ឪ២" ឬ " 2Fathers" នឹងចាក់បញ្ចាំងចាប់ពីថ្ងៃទី៣០កក្កដានេះតទៅនៅរោងភាពយន្ត Legend ទាំងបីសាខា Major Cineplex By Cellcard និង Platinum Cineplex៕
អត្ថបទ៖ ថា ម៉ាលីដា