ករុណា ពេជ្រ បដិសេធថា គ្មានភាគហ៊ុននៅថោនសូម្បីតែ ១ ភាគរយ

2015-08-03 21:21:23
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងប្រុសជួរមុខក្នុងផលិតកម្មថោន លោក ករុណា ពេជ្រ ត្រូវបានមហាជន និង អ្នកសិល្បៈជាច្រើនធ្លាប់បាននិយាយថា លោកមានភាគហ៊ុនធំនៅ ថោន ទើបអាចមានបទចម្រៀងល្អៗច្រៀង តែពេលនេះ លោកបានចេញមុខមកបញ្ជាក់ថា លោកគ្មានភាគហ៊ុនអីទាំងអស់សូម្បីតែ ១ ភាគរយ។

អ្នកកាសែតបានចោតជាសំណួរថា៖ កន្លងមកទស្សនិកជនបាននិយាយថា លោកមានឥទ្ធិពលជាងគេនៅទីនោះ (ថោន) ទាំងការធ្វើបទចម្រៀង ហើយខាងផលិតកម្មក៏ស្ដាប់ទៀត តើលោកគិតយ៉ាងមេចវិញ? ករុណា ពេជ្រ បានឆ្លើយបដិសេធយ៉ាងរហ័សថា "ខ្ញុំសូមច្រានចោលព័ត៌មាននេះ តាមពិតពីមុនខ្ញុំមិនដែលច្រាន តែពេលនេះសូមបដិសេធ។

ដោយសារខ្ញុំជាតារាចម្រៀងដែលចូលក្នុងផលិតកម្មថោនមុនការបង្កើតអ្វីទាំងអស់ ដូចនេះហើយទើបម្ចាស់ផលិតកម្មពួកគាត់បានឲ្យឱកាស និង បានផ្ដល់ការទុកចិត្តជាអ្នកក្ដោបក្ដាប់ការចំណូល ចំណាយទាំងអស់។ ខ្ញុំទទួលស្គាល់ថា ពេលដែលខ្ញុំជាអ្នកកាន់ខាងចំណូល ចំណាយ បុគ្គលិកផ្សេងៗគិតថាយើងជាថៅកែ តែខ្ញុំសូមបដិសេធថា ខ្ញុំមិនមានចំណែកសូម្បីតែ១ ភាគហ៊ុនក្នុងផលិតកម្មថោន"។

តារាដែលទើបនឹងឡើងគេហដ្ឋានថ្មីតម្លៃកប់ពពកខាងលើបានបន្ថែមថា៖ "មានអ្នកខ្លះបាននិយាយថា ចម្រៀងទាំងអស់ក្នុងផលិតកម្មថោនឲ្យតែល្បី ឲ្យតែផ្ទុះគឺមិនហួសពីករុណា ពេជ្រ ទេ។ ខ្ញុំសូមនិយាយថា វាជារឿងចៃដន្យ ជារឿងសំណាងទេ ដូច ខេម ចឹងពេលដែលគាត់ល្បី គឺជា បទរបស់លោក យឹម តាស្រង់ គាត់អ្នកនិពន្ធ លោក សោម ដូរ៉េ លោក ងួន សុបិន ដែលអ្នកទាំងអស់នោះមិនដែលសរសេរឲ្យខ្ញុំសូម្បីតែ ១ បទ។

មិនមែនគាត់មិនសរសេរឲ្យទេ តែសរសេរទៅវាមិនល្បី ហើយហេតុអ្វីបានជាសរសេរឲ្យទៅ ខេម ទៅល្បី? ហើយខ្ញុំល្បីដោយលោក លី វណ្ណរិទ្ធ គាត់ជាអ្នកនៅកំពតដែលជាគ្រូបង្រៀនម្នាក់ ហើយគាត់សរសេររួចផ្ញើឲ្យខ្ញុំ បែរជាអ្នកធ្វើឲ្យខ្ញុំល្បីទៅវិញ”។

គួរបញ្ជាក់ផងដែរថា ករុណា ពេជ្រ មិនត្រឹមតែមានអាជីពជាតារាចម្រៀងនៅក្នុងផលិតកម្ម Town ប៉ុណ្ណោះទេ រូបគេនៅមានការងារផ្សេងៗទៀតដែរដូចជា កន្លែងស្តុកចែកចាយទំនិញ ជាអ្នកទទួលរៀបចំឆាកតន្ត្រីកម្មវិធីនានា និង ថ្មីៗនេះទើបបានបើកអាជីវកម្មមួយទៀតគឺសេវាកម្មពិធីការ៕

អត្ថបទ៖ទ្រី រ៉ាវី