មានសព្វគ្រប់ហើយ នៅសុខៗប៉ូលិសអាចហៅឃាត់ឆែករកឯកសារបានឬទេ?

2015-08-04 22:33:36
ចំនួនមតិ 0 | ចំនួនចែករំលែក 0

ចន្លោះមិនឃើញ

សាធារណមតិកន្លងមកធ្លាប់បានលើកឡើងជាចម្ងល់ថា ពេលបើកបរលើដងផ្លូវ បើអ្នកបើកបរពាក់មួកសុវត្ថិភាព យានជំនិះមានផ្លាកលេខ និងកញ្ចក់ត្រឹមត្រូវហើយ ម៉េចបានជាប៉ូលិសនៅតែហៅឃាត់ឆែករកឯកសារបើកបរទៀត? តើការឆែកឆេររបៀបនេះត្រឹមត្រូវឬក៏អត់?

ជុំវិញ ចម្ងល់នេះ ឯកឧត្តម ពៅ ម៉ាលី អគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោកបានប្រាប់ Sabay ថា បើមិនមានហេតុសង្ស័យ ឬខុសច្បាប់អ្វីទេ ប៉ូលិសមិនអាចហៅឃាត់អ្នកធ្វើដំណើរដើម្បីឆែកឆេរតាមតែចិត្តឯងបានឡើយ។ ឯកឧត្ដមបញ្ជាក់ដូច្នេះ៖ «នគរបាលកាលណាគេមានផ្លាកលេខ គេមានអ្វីត្រឹមត្រូវ គេបើកបរត្រឹមត្រូវគ្មានការសង្ស័យអីទេ យើងអត់អាចហៅឃាត់គេបានទេ»។ ឯកឧត្ដមបន្តថា ការហាមឃាត់ឆែករកឯកសារបានលុះត្រាណា អ្នកបើកបរមិនគោរពស្លាកសញ្ញាចរាចរណ៍ មិនមានផ្លាកលេខ មិនពាក់មួកសុវត្ថិភាព មានការសង្ស័យ ឬបង្កជាបញ្ហាអ្វីមួយទើបប៉ូលិសចរាចរណ៍អាចហៅឃាត់ និងឆែកឆេររកឯកសារពាក់ព័ន្ធបាន។

មន្ត្រីទទួលបន្ទុកចរាចរណ៍ផ្លូវគោកដដែលបន្តថា បើការហាមឃាត់បង្កជាការកកស្ទះដល់ចរាចរណ៍ក៏មិនត្រូវឲ្យមានសម្រាប់ប៉ូលិសអ្នកអនុវត្តច្បាប់ដែរ។ លោកនិយាយថា «ពេលណាក៏ដោយ នគរបាលហៅឆែករឿងមិនប្រក្រតីអីគឺដាច់ខាតមិនឲ្យប៉ះពាល់ចរាចរណ៍សាធារណៈទេ។ បើគាត់ឃាត់គេ ធ្វើឲ្យរំខានគេអ្នកក្រោយ អាហ្នឹងមានបញ្ហាទៀត»។

ថ្នាក់ដឹកនាំចរាចរណ៍ខាងលើបន្ថែមដែរថា ការឃាត់ឆែកឆេរយានជំនិះ និងសួររកឯកសារត្រូវមានប៉ុស្តិ៍ត្រួតពិនិត្យត្រឹមត្រូវ មិនមែនប៉ូលិសបីបួននាក់ស្រុះស្រួលគ្នាដាក់បារាសអាចឆែកឆេរបាននោះទេ៕

អត្ថបទ៖ ប្រាក់ ចាន់សីហា