ឪពុក Michael Jackson ត្រូវពិការភ្នែកបន្ទាប់ពីមានជំងឺដាច់សរសៃឈាម

2015-08-05 23:11:33
ចំនួនមតិ 0 | ចំនួនចែករំលែក 0

ចន្លោះមិនឃើញ

Joe ដែលត្រូវជាឪពុករបស់ស្ដេចចម្រៀងប៉ុបMichael Jackson បានរងភាពពិការភ្នែកបន្ទាប់ពីកើតជំងឺ ដាច់សរសៃឈាមខណៈរូបលោកកំពុងអបអរពិធីខួបកំណើតគម្រប់អាយុ ៨៧ឆ្នាំកាលពីថ្ងៃអាទិត្យនៅប្រទេសប្រេស៊ីល។ នេះបើតាមការចុះផ្សាយរបស់ dailymail។

សារព័ត៌មានខាងលើបានបង្ហាញថា ក្រោយពីមានហេតុការណ៍អាក្រក់បែបនេះ បុរសដែលគេស្គាល់ថាជាអ្នកគ្រប់គ្រងការងារសិល្បៈដ៏ឆ្នើមម្នាក់ ត្រូវបានគេបញ្ជូនទៅកាន់មន្ទីរពេទ្យ Albert Einstein Hospital ក្នុងទីក្រុងSão Paulo ប្រទេសប្រេស៊ីលភ្លាមៗបន្ទាប់ពីអាចងើបឈរទាំងវិលមុខ។

ប្រភពពីក្រុមគ្រួសារបានប្រាប់ TMZ ថា គ្រូពេទ្យកំពុងញាប់ដៃញាប់ជើងដើម្បីពិនិត្យជំងឺរបស់ Joe ឲ្យបានច្បាស់លាស់។ គ្រូពេទ្យនិងសមាជិកគ្រួសារកំពុងពិគ្រោះគ្នា ប្រសិនបើអ្នកជំងឺបានធូរស្រាលល្អឡើងវិញ គេនឹងបញ្ជូនគាត់ទៅកាន់សហរដ្ឋអាមេរិកដើម្បីព្យាបាលបន្ថែម។

បុរសវ័យចំណាស់រូបនេះមានជំងឺទឹកនោមផ្អែមជាប់ខ្លួន។ ប៉ុន្តែគេក៏មិនទាន់ច្បាស់ដែរថាជំងឺនេះអាចជាកត្តានាំឲ្យលោកកើតជំងឺដាច់សរសៃឈាមឬយ៉ាងណានោះទេ។

Joe គឺជាឪពុកដែលមានស្នាដៃល្អដោយបានជួយគ្រប់គ្រងក្រុមចម្រៀងកូនៗដែលមានឈ្មោះថា The Jackson 5 ឲ្យមានភាពល្បីល្បាញក្នុងវិថីសិល្បៈ។ លោកនិងភរិយា Katherine រៀបការនៅឆ្នាំ ១៩៤៩ និងមានចំណងដៃកូន១១នាក់ ដោយ Michael Jacksonជាកូនប្រុសលេចធ្លោជាងគេ ៕