ណុប បាយ៉ារិទ្ធ ស្រក់ទឹកភ្នែកពេលដែលបានឮឈ្មោះ...

2015-08-10 15:30:45
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងប្រុសប្រចាំផលិតកម្មហង្សមាស ណុប បាយ៉ារិទ្ធ បានស្រក់ទឹកភ្នែកនៅក្នុងកម្មវិធី Cambodian Idol ខណៈពេលដែលបេក្ខជនមួយរូបច្រៀងបទ "ថ្ងៃបាក់រសៀល" ។

ហេតុផលអ្វីដែលធ្វើឲ្យតារាប្រុសរូបនេះស្រក់ទឹកភ្នែកនោះគឺលោកបានប្រាប់មកកាន់ Sabay ថា " អូ...ថ្ងៃនោះខ្ញុំរលីងរលោងទឹកភ្នែកមែន គឺដោយសារតែបទ "ថ្ងៃបាក់រសៀល" ហ្នឹងធ្វើឲ្យខ្ញុំនឹកទៅដល់លោក ជុំ ប៊ុនធឿន...ធម្មតាគាត់ជាអ្នកនិពន្ធនៅផលិតកម្មហង្សមាស ហើយធ្លាប់បានបន្សល់ស្នាដៃដែលគាត់និពន្ធជាច្រើនអោយពួកខ្ញុំ ហើយក្នុងនោះបទដែលគាត់សរសេរប៉ារ៉ូលអោយពួកខ្ញុំច្រៀងភាគច្រើនទទួលបានការគាំទ្រពីមហាជន" ។

ក្នុងនាមជាអ្នកនិពន្ធម្នាក់ដែលមានស្នាដៃហើយភាគច្រើនសុទ្ធតែបានទទួលស្គាល់ពីសំណាក់តារាចម្រៀង និងទស្សនិកជនផងដែរ តារាចម្រៀងសំឡេងធ្ងន់រូបនេះមានការនឹកស្រណោះគ្រាដែលធ្លាប់ធ្វើការជាមួយគ្នា។ ចំណុចដែលរឹតតែខ្លោចចិត្តជាងនេះទៅទៀត បាយ៉ារិទ្ធ រួមទាំងក្រុមការងាររបស់ហង្សមាស សុទ្ធតែបានឃើញទឹកមុខដ៏គួរឲ្យអាណិតរបស់លោក ជុំ ប៊ុនធឿន មុនពេលលោកទទួលអនិច្ចកម្ម។

"ពួកយើងសុទ្ធតែបានឃើញមុខដ៍ស្រងេះស្រងោចរបស់គាត់ មុនពេលគាត់មុនស្លាប់ វាហាក់ដូចជាការក្រៀមក្រំមួយដោយដឹងជាមុនសម្រាប់គាត់"។ បាយ៉ារិទ្ធ ថ្លែង។

ទន្ទឹមនឹងនោះបទ "ថ្ងៃបាក់រសៀល" គឺជាស្នាដៃចុងក្រោយរបស់លោក ជុំ ប៊ុនធឿន គាប់ជួនថ្ងៃប្រលងកម្មវិធី Cambodian Idol មានបេក្ខជនម្នាក់បានលើកបទខាងលើមកបកស្រាយបានពីរោះទៀតជាហេតុជំរុញទឹកចិត្ត បាយ៉ារិទ្ធ កាន់តែនឹកឃើញដល់កវីនិពន្ធរូបនេះតែម្តង។ នេះបើតាម បាយ៉ារិទ្ធ និយាយ។

ម្ចាស់បទ " សង្សារលេងៗ" បានបន្តទៀតថា ពេលដែលលោកបានស្តាប់បទចម្រៀងខាងលើ ហាក់ដូចជាជំរុញទឹកចិត្តឲ្យលោកគិតថា អត្ថន័យនៃបទចម្រៀងនេះគឺជាការផ្តែផ្តាំចុងក្រោយរបស់លោក ជុំ ប៊ុនធឿន យ៉ាងដូច្នោះ។ ស្របពេលដែលគ្រានោះ លោក ព្រាប សុវត្ថិ ដំណាលបន្ថែមពីបទចម្រៀងហ្នឹងទៀត ធ្វើអោយ បាយ៉ារិទ្ធ នឹកស្រណោះដល់អ្នកនិពន្ធ ជុំ ប៊ុនធឿន កាន់តែខ្លាំងរហូតដល់ស្រក់ទឹកភ្នែកតែម្ដង៕