តារាម៉ូដែល អែត វីន ឈ្នះពានបុរសសាច់ដុំស្អាត នៅសៀមរាប

2015-08-18 16:18:12
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក អែត វីន តារាសម្ដែងនិងម៉ូដែល បានឈ្នះពានបុរសឯក ដែលមានសាច់ដុំស្អាតជាងគេ ក្នុងការប្រកួត កីឡាកាយ វប្បកម្ម ឬ Mr Angkor កាលពីចុងសប្ដាហ៍កន្លងទៅ ក្នុងទឹកដីខេត្ត សៀមរាប។

ផ្អែកតាមការរៀបរាប់របស់ អែត វីន ការប្រកួតខាងលើបានធ្វើឡើងចំនួន២ថ្ងៃ នៅបរិវេណសាលាវិជ្ជាជីវៈបដិសណ្ឋារកិច្ច ប៉ូលឌុយប្រ៊ុល ចាប់តាំងពីថ្ងៃ១៤ ដល់ ថ្ងៃ១៥ ខែ សីហា ឆ្នាំ ២០១៥ កន្លងទៅ មានបេក្ខជនចូលរួមប្រកួតរហូតជាង២០០នាក់ ដោយការប្រកួតនេះបានចែកចេញជា៨ផ្នែកផ្សេងគ្នាទៅតាមកម្ពស់ ឬអាយុជាដើម ក្នុងនោះមួយផ្នែកមានពាន៥។

អែត វីន ថ្លែងថា “ហើយខ្ញុំបានឈ្នះមួយក្នុងចំណោមនោះ គឺពានបុរសឯក ដែលមានសាច់ដុំស្អាតជាងគេ"។ លោកបានបន្តឲ្យដឹងថា គណៈកម្មការដែលផ្ដល់ពិន្ទុ សុទ្ធសឹងតែជា ម្ចាស់ក្លឹបហាត់ប្រាណល្បីៗ ក្នុងប្រទេសកម្ពុជា ហើយជាលទ្ធផល លោកទទួលបានចំណាត់ថ្នាក់លេខ១ ពីការប្រកួតនេះ ដោយទទួលបានពាន និងមេដៃមាស់១ ព្រមទាំងថវិកាមួយចំនួន។

ចំពោះលក្ខខណ្ឌក្នុងការប្រកួតវិញ តម្រូវឲ្យបេក្ខជនប្រើរយៈ ៦០ វិនាទី ដើម្បីបង្ហាញនូវទម្រង់នៃសាច់ដុំនានាលើរាងកាយខ្លួន ដែលមានការអមដោយសំឡេងតន្ត្រី។ គោលបំណងនៃការប្រកួតកីឡាកាយវប្បកម្មដើម្បីផ្សព្វផ្សាយ លើកស្ទួយ វិស័យមួយនេះឲ្យក្លាយជាកីឡាមួយប្រភេទមានការពេញនិយម និងរៃអង្គាសប្រាក់សប្បុរសធម៌ផងដែរ។

តាមការបញ្ជាក់របស់ អែត វីន ការប្រកួត កីឡាកាយ វប្បកម្ម ឬ Mr Angkor ដែលប្រមូលផ្ដុំដោយ បុរសសម្បូរសាច់ដុំនេះ បានធ្វើឡើងលើទឹកដី ខេត្ត សៀមរាប ចំនួន៥លើកមកហើយ ដោយកម្មវិធីនេះគេក្នុងមួយឆ្នាំធ្វើម្ដង ប៉ុន្តែលោកទើបតែចូលរួមប្រកួត ក្នុងឆ្នាំនេះប៉ុណ្ណោះ ហើយក៏ជាប់បានពានមួយខាងលើតែម្ដង ។

កីឡាករ ទឹក រ៉ាវី ដែលឈ្នះពាន Mr. Angkor 2015 ជាពានធំជាងគេ

សម្រាប់ពាន់បុរសដែលមានសាច់ដុំស្អាតជាងគេខាងលើ មិនមែនជាពានលើកទី១ របស់តារាវ័យ២១ឆ្នាំនេះទេ។ កាលពីចុងខែ កញ្ញា ឆ្នាំ ២០១៤ កន្លងទៅលោក អែត វីនធ្លាប់ទទួល បានពានរង្វាន់ជាតារាញញឹមស្រស់ ជាងគេ “ Mr. Smiley Award in Mister Asia Contest 2014 ” ម្ដងផងដែរ ពីទីក្រុងហុងកុង៕