គង់ ចាន់ស្រីមុំ និងសង្សារ ធ្វើខួបផ្គួបជំនួញរួមគ្នាជិត១លានដុល្លារ

2015-08-19 20:31:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្រីស្អាតគង់ ចាន់ស្រីមុំ ល្ងាចមិញនេះបានធ្វើខួបកំណើតគម្រប់វ័យ២៥ឆ្នាំរបស់ខ្លួន ប៉ុន្តែអ្វី ដែលចាប់អារម្មណ៍ខ្លាំងនោះ តារាស្រីម្នាក់នេះបានប្រកាសមុខជំនួញរបស់ខ្លួនជាមួយដៃគូ ដែលមានដើមទុនជិត១លានដុល្លារឯណោះ។

មុខជំនួញដែល គង់ ចាន់ស្រីមុំ បើកសម្ពោធក្នុងថ្ងៃខួបរបស់នាងនោះមាន២ ក្នុងនោះទី១ គឺការនាំចូលទឹកអប់ផ្ដាច់មុខពីប្រទេសហុល្លង់ និង ទី២ គឺការបើកភោជនីយដ្ឋានលំដាប់អន្តរជាតិមួយ ដោយនាង និងសង្សារ បានចូលហ៊ុនគ្នាជាមួយដៃគូផ្សេងទៀត។

តារាស្រីម្នាក់នេះបានបញ្ជាក់ថា ចំពោះជំនួញទឹកអប់ នាងបានប្រើដើមទុន១០ម៉ឺនដុល្លារ ដោយបូកបញ្ចូលការធ្វើទីផ្សារផលិតផលឲ្យដើរ ហើយម៉ាកទឹកអប់នោះទៀតសោតបានកុម្ម៉ង់ ពីរោងចក្រ ដោយដាក់ឈ្មោះរបស់នាងតែម្ដង គឺ Secret by Sreymom។ "ដំបូងឡើយយើងគិតថា អស់តែ៤ម៉ឺនជាងអីទេ ប៉ុន្តែយើងត្រូវបុកលើទីផ្សារ អីចឹងវា មិនក្រោម១០ម៉ឺននោះឡើយ" ស្រីមុំ ថ្លែង។

មូលហេតុដែលនាំឲ្យ តារាស្រីម្នាក់នេះសម្រេចបើកជំនួញទឹកអប់នេះ ក៏ព្រោះតែនាងគិតថា តារានៅកម្ពុជាមិនទាន់មានតារាណា ដែលហ៊ានបើកលក់ផលិតផល ដាក់ឈ្មោះខ្លួនឯងនោះឡើយ គួបផ្សំនាងស្រលាញ់នៅជំនាញនេះ ហើយមានមហាជនស្គាល់ស្រាប់ក៏សម្រេចបើករបរនេះតែម្ដង។

ចំពោះជំនួញទី២វិញ គឺ ភោជនីយដ្ឋានលំដាប់អន្តរជាតិដែលមានទីតាំអខាងក្រោយស្ថានទូតរុស្សី។ ជំនួញមួយនេះ លោក គីម សីហា ដែលសង្សាររបស់នាង បានចូលហ៊ុនជាមួយបងប្អូន និងមិត្តភ័ក្ដិ ដោយប្រើដើមទុនរហូតដល់ទៅ៧០ម៉ឺនដុល្លារឯណោះ ក្នុងនោះកញ្ញា គង់ ចាន់ស្រីមុំ មានតួនាទីជា អ្នកធ្វើទីផ្សារ។ តារាស្រីថ្លែងថា "រឿងភោជនីយដ្ឋាននេះ ខ្ញុំមាននាទីគ្រាន់តែជាអ្នក Promote ទីផ្សារប៉ុណ្ណោះ កិច្ចការផ្សេងទៀត ពួកគាត់ជាអ្នកចាត់ចែង"។

គង់ ចាន់ស្រីមុំ ក៏ដូចជា លោក គឺម សីហា សុទ្ធតែមានជំនឿជាក់ដូចគ្នាថា មុខជំនួញទាំង២ របស់ពួកគេ និងទទួលបានជោគជ័យ ត្បិតមុនសម្រេចចិត្តបើក អ្នកទាំងពីរសុទ្ធតែអះអាងថា បានសិក្សាទីផ្សារ រួចរាល់អស់ហើយ។

ក្នុងថ្ងៃ ខួបកំណើតយប់មិញនេះ លោក គឺម សីហា បានប្រាប់ថា បានអញ្ជើញភ្ញៀវជាង១០០នាក់ ដែលភាគច្រើនជាអ្នកសិល្បៈ ដោយការចំណាយក្នុងថ្ងៃខួបនោះលោក គ្រោងចំណាយខ្ទង់២ម៉ឺនដុល្លារឯណោះ៕