អ្នកពាក់លេខ៩ Chelsea ច្រើនតែបរាជ័យនៅ EPL ចុះ Falcao វិញ យ៉ាងណាដែរ?

2015-08-20 15:15:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធចូលថ្មី Radamel Falcao ដែល Chelsea បានខ្ចីជើងពីក្លិប Monaco របស់បារាំង បានពាក់អាវលេខ៩ នៅតោខៀវ។ ប៉ុន្តែប្រិយមិត្តមានដឹងពីប្រវត្តិអ្នកពាក់អាវលេខ៩ នៅ Chelsea យ៉ាងណាដែរខ្លះដែរទេ ហើយតើមានកីឡាករណាខ្លះជោគជ័យ និងប៉ុន្មាននាក់បរាជ័យ?

ក្លិប Chelsea ចាប់តាំងពីបង្កើតឡើងឆ្នាំ១៩០៥ ដល់ឆ្នាំ១៩៩២ ដែលពេលនោះលេងនៅលីកកំពូលហៅថា First Division មានកីឡាករឆ្នើម៣នាក់ ដែលធ្លាប់ពាក់អាវលេខ៩នេះ នឹងជោគជ័យបំផុត ដោយក្នុងនោះមាន Roy Bentley ស៊ុតចូល ១៥០គ្រាប់, Peter Osgood (១៥០គ្រាប់) និង Kerry Dixon ស៊ុតបាន១៩៣គ្រាប់ ហើយពួកគេទាំង៣នាក់នេះ បានក្លាយជាវីរបុរសនៅ Stamford Bridge ផងដែរ។

ប៉ុន្តែបន្ទាប់ពី លោក Dixon ចាកចេញពីក្លិប ក្រោយចប់រដូវកាល១៩៩១/៩២ មក រដូវកាលថ្មី១៩៩២/៩៣ ក៏ចាប់ផ្ដើមជាមួយឈ្មោះថ្មី Premier League ដែលចាប់តាំងពីពេលនោះមក អ្នកពាក់អាវលេខ៩ នៅ Chelsea ហាក់មិនមានអ្នកជោគជ័យទៀតឡើយ។

តោះ! ចង់ដឹងមាននរណាខ្លះ សូមមើលដូចខាងក្រោម៖

១. Tony Cascarino: ១៩៩២-៩៤ (លេង៤០ប្រកួត, ស៊ុតចូល៨គ្រាប់)

Cascarino ធ្លាប់លេងនៅ Aston Villa និង Celtic មុនផ្ទេរទៅ Chelsea នៅឆ្នាំ១៩៩២ ប៉ុន្តែអតីតកីឡាករជម្រើសជាតិអៀរឡង់លេងពុំសូវបានល្អទេ ក៏ផ្ទេរទៅ Marseille របស់បារាំងនៅឆ្នាំ១៩៩៤។

២. Mark Stein: ១៩៩៤-៩៦ (លេង៣២ប្រកួត, ស៊ុតចូល៨គ្រាប់)

អតីតកីឡាករអាហ្វ្រិកខាងត្បូងរូបនេះ ផ្ទេរពី Stoke City ទៅ Chelsea កាលឆ្នាំ១៩៩៣ ប៉ុន្តែខ្សែប្រយុទ្ធលេខ៩រូបនេះ តោខៀវបានឲ្យក្រុមផ្សេងៗខ្ចីជើងជាច្រើនទៅវិញ ដូចជាទៅ Stoke វិញ, Ipswich Town, Bournemouth មុននឹងចាកចេញពីតោខៀវ មែនទែននៅឆ្នាំ១៩៩៦។

៣. Gianluca Vialli: ១៩៩៦-៩៩ (លេង៥៨ប្រកួត, ស៊ុតចូល២១គ្រាប់)

អតីតខ្សែប្រយុទ្ធអ៊ីតាលី របស់ក្រុម Juventus រូបនេះ បានចូលរួមជាមួយ Chelsea នៅឆ្នាំ១៩៩៦ និងបានជួយឲ្យតោខៀវ លើកពាន FA Cup ឆ្នាំ១៩៩៧, League Cup ឆ្នាំ១៩៩៨ និងឈ្នះ UEFA Cup Winner's Cup នៅឆ្នាំ១៩៩៨ផងដែរ មុននឹងចាកចេញនៅឆ្នាំ១៩៩៩។

៤. Chris Sutton: ១៩៩៩-២០០០ (លេង២៨ប្រកួត, ស៊ុតចូល១គ្រាប់)

Chelsea បានទិញខ្សែប្រយុទ្ធ Sutton ពីក្លិប Blackburn Rovers តម្លៃ១០លានផោន នៅឆ្នាំ១៩៩៩ ប៉ុន្តែកីឡាករអង់គ្លេសរូបនេះ លេងមិនបានល្អឡើយ ហើយក៏លក់ចេញទៅក្លិប Celtic វិញ នៅឆ្នាំ២០០០។

៥. Jimmy Floyd Hasselbaink: ២០០០-០៤ (លេង១៣៦ប្រកួត, ស៊ុតចូល៧០គ្រាប់)

Chelsea ទិញ Hasselbaink ពីក្លិប Atletico Madrid តម្លៃ១៥លានផោន ហើយកីឡាកររូបនេះ បានក្លាយជាកីឡាករលេខ៩របស់តោខៀវ ដែលលេងបានល្អជាងគេបំផុត ក្នុងប្រវត្តិសាស្ត្រនៅ Premier League និងធ្លាប់ឈ្នះស្បែកជើងមាស រដូវកាល២០០០-០១ ផងដែរ។

៦. Mateja Kezman: ២០០៤-០៥ (លេង២៥ប្រកួត, ស៊ុតចូល៤គ្រាប់)

Kezman បានចាកចេញពី PSV ទៅ Chelsea កាលឆ្នាំ២០០៤ ក្នុងជំនាន់អ្នកចាត់ការ Jose Mourinho ដឹកនាំ និងបានពាក់អាវលេខ៩ ប៉ុន្តែខ្សែប្រយុទ្ធជម្រើសជាតិសែបរូបនេះ លេងមិនបានល្អទេ ហើយតោខៀវ ក៏លក់ឲ្យ Atletico Madrid នៅឆ្នាំ២០០៥វិញ។

៧. Hernan Crespo: ២០០៥-០៦ (លេង៣០ប្រកួត, ស៊ុតចូល១០គ្រាប់)

Crespo ត្រូវបាន Chelsea ទិញពី Inter Milan ប៉ុន្តែខ្សែប្រយុទ្ធលេខ៩រូបនេះ លេងឲ្យតោខៀវបានតែ១រដូវកាលប៉ុណ្ណោះ និងបានជួយឲ្យក្លិបឈ្នះ FA Community Shield ឆ្នាំ២០០៥ និងលើកពាន Premier League រដូវកាល២០០៥-០៦នោះផងដែរ មុននឹងចាកចេញពី Inter វិញ។

៨. Khalid Boulahrouz: ២០០៦-០៧ (លេង១៣ប្រកួត, ស៊ុតចូល០គ្រាប់)

កីឡាករជម្រើសជាតិហុល្លង់ ត្រូវបាន Chelsea ទិញពីក្លិប Hamburger និងបានលេងតែ១រដូវកាលប៉ុណ្ណោះ ហើយខ្សែការពារដែលពាក់លេង៩រូបនេះក៏ត្រូវបាន Sevilla ខ្ចីជើង១ឆ្នាំ មុនលក់ទៅឲ្យ Stuttgart នៅឆ្នាំបន្ទាប់។

៩. Steve Sidwell: ២០០៧-០៨ (លេង១៥ប្រកួត, ស៊ុតចូល០គ្រាប់)

កីឡាករអង់គ្លេសរូបនេះ ត្រូវបាន Chelsea ទិញពីក្លិប Reading ឆ្នាំ២០០៧ ប៉ុន្តែ១រដូវកាលនៅតោខៀវ ពុំបានស៊ុតចូលទីឡើយ ហើយក៏ចាកចេញទៅ Aston Villa វិញ។

១០. Franco Di Santo: ២០០៨-០៩ (លេង៨ប្រកួត, ស៊ុតចូល០គ្រាប់)

កីឡាករអាហ្សង់ទីនរូបនេះ ពុំសូវមានឱកាសបង្ហាញខ្លួនទេ ក្រោមការដឹកនាំរបស់អ្នកចាត់ការ Luiz Felipe Scolari ទោះជាពាក់អាវលេខ៩ក៏ដោយ ហើយពុំបានស៊ុតចូលទីឡើយ ខណៈដែល Chelsea ឲ្យ Blackburn ខ្ចីជើង និងលក់ឲ្យ Wigan ដាច់នៅឆ្នាំ២០១០។

១១. Fernando Torres: ២០១១-១៤ (លេង១១០ប្រកួត, ស៊ុតចូល២០គ្រាប់)

កីឡាករជម្រើសជាតិអេស្ប៉ាញ ត្រូវបាន Chelsea ទិញពី Liverpool នូវតម្លៃមួយខ្ពស់បំផុត ៥០លានផោនឆ្នាំ២០១១ និងឲ្យពាក់អាវលេខ៩ ប៉ុន្តែតោខៀវពុំសូវកាក់កបទេ ហើយក៏ឲ្យ AC Milan ខ្ចីជើងឆ្នាំ២០១៤ និងលក់ឲ្យក្លិបអ៊ីតាលីដាច់នៅឆ្នាំ២០១៥នេះ ប៉ុន្តែ AC បានឲ្យ Atletico Madrid ទៀត រហូតទល់បច្ចុប្បន្ន។ អ្វីដែលសោកស្ដាយ ពេល Torres ចេញ រដូវកាល២០១៤-១៥ Chelsea លើកពាន Premier League។

១២. Radamel Falcao: ២០១៥-បច្ចុប្បន្ន (លេង២ប្រកួត, ស៊ុតចូល០គ្រាប់)

Falcao ត្រូវបាន Chelsea ខ្ចីជើងពី AS Monaco របស់បារាំង ខណៈដែលរដូវកាល២០១៤-១៥ ខ្សែប្រយុទ្ធកូឡុំប៊ីរូបនេះ ត្រូវបានក្រុម Manchester United ខ្ចីជើងផងដែរ និងលេងពុំបានល្អទេ ប៉ុន្តែសម្រាប់រដូវកាលនេះ លោក Mourinho បានសម្រេចយករូបគេ ដើម្បីធ្វើជាជម្រើសខ្សែប្រយុទ្ធទី២ បន្ទាប់ពី Diego Costa។

ក្រៅពីកីឡាករលេខ៩ ទាំង១២នាក់ដែលមិនជោគជ័យនៅ Premier League ក៏មានរឿងគួរឲ្យកត់សម្គាល់ផងដែរថារដូវកាល២ ដែល Chelsea គ្មានអ្នកពាក់លេខ៩ គឺជារដូវកាលដែលក្រុមនេះលើកពាន ពោលគឺរដូវកាល ២០០៩-២០១០ និង ២០១៤-២០១៥៕