Messi ទាត់ប៉េណាល់ទីអត់ចូល តែ Suarez ជួយ Barca ឈ្នះ ឯ Real ស្មើ Sporting

2015-08-24 15:31:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធ Luis Suarez បានជួយឲ្យក្រុមម្ចាស់ជើងឯក FC Barcelona ឈ្នះ Athletic Bilbao ១-០ ក្នុងការប្រកួតបើកឆាករដូវកាលថ្មី La Liga កាលពីយប់មិញ ខណៈដែលតារាឆ្នើម Lionel Messi ទាត់បាល់ពិន័យ១១ម៉ែត្រអត់ចូល។ រីឯក្រុមស្ដេចស Real Madrid ឯណោះវិញ បានត្រឹមស្មើ ០-០ ទល់ Sporting Gijon។

ក្រុមភ្ញៀវ Barca បានឱកាសទាត់បាល់ពិន័យ១១ម៉ែត្រនៅនាទី៣១ ប៉ុន្តែ Messi ធ្វើមិនបានសម្រេច ដោយអ្នកចាំទី Gorka Iraizoz Moreno របស់ក្រុម Bilbao សង្គ្រោះបាន។ ប៉ុន្តែលុះដល់នាទី៥៤ ទើប Suarez ស៊ុតកាប់បញ្ចូលទីបានសម្រេច ក្រោយការបញ្ជូនដ៏ល្អពី Jordi Alba។ លទ្ធផលនេះ មានន័យថា ជាសងសឹកបានសម្រេចមួយ របស់ក្រុមអ្នកមានបុណ្យ បន្ទាប់ពីចាញ់ Bilbao សរុប ៥-១ ក្នុងការប្រកួត Spanish Super Cup កន្លងទៅ។

ចំណែកឯក្រុមជើងឯករង Real Madrid របស់លោក Rafael Benitez នៅតែមានសភាពយ៉ាប់យ៉ឺន នៅតំបន់ប្រយុទ្ធដដែល ពោលគឺបានត្រឹមបញ្ចប់លទ្ធផល ០-០ ទល់នឹងក្រុមឡើងមកថ្មី Sporting Gijon ប៉ុណ្ណោះ ខណៈដែលតារាឆ្នើមៗ Cristiano Ronaldo និង Gareth Bale នៅតែមិនអាចសហការគ្នាបានល្អ៕