សមាគមសិល្បករ និងសមាគមភាពយន្តជជែកគ្នារឿង ភាពយន្តបរទេស

2015-08-24 16:08:33
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីចុងសប្ដាហ៍កន្លងទៅសមាគមសិល្បករខ្មែរ និងសមាគមភាពយន្តកម្ពុជា បានរៀបចំកាជជែកគ្នាមួយ ជុំវិញផលប៉ះពាល់ការចាក់បញ្ចាំងភាពយន្តបរទេសលើកញ្ចក់ទូរទស្សន៍បច្ចុប្បន្ន ។

ការជួបជុំជជែកនេះ ធ្វើឡើងបន្ទាប់ពី ខ្សែភាពយន្តបរទេសជាច្រើនកំពុងវាយលុកទីផ្សារគំហុក ដែលនាំឲ្យប៉ះពាល់ភាពយន្តកម្ពុជា ជាពិសេសរឿងភាគថៃ ។

លោក ឆាយ បូរ៉ា ប្រធានសមាគមភាពយន្តបានលើកឡើងថា វត្តមាននៃភាពយន្តបរទេស ជាពិសេសរឿងភាគបរទេសដែលកំពុងតែចាក់បញ្ចាំងលើកញ្ចក់ទូរទស្សន៍បានធ្វើឲ្យប៉ះពាល់ដល់វិស័យ៣ធំ ក្នុងនោះមាន សេដ្ឋកិច្ច អប់រំ និង វប្បធម៌។

ប្រធានសមាគមភាពយន្ត និងជាចាងហ្វាងផលិតកម្មដើមត្នោតរូបនេះបានពន្យល់ថា មួយរយៈចុងក្រោយនេះ មានផលិតកម្មជាច្រើនចាប់ផ្ដើមផលិតរឿងភាគដើម្បីយកមកចាក់បញ្ចាំងលើកកញ្ចក់ទូរទស្សន៍ ប៉ុន្តែការផលិតរបស់ផលិតកម្មទាំងនោះប្រឈមមុខនឹងការខាតបង់ ព្រោះតែស្ថានីយទូរទស្សន៍ដែលធ្លាប់ យករឿងភាគរបស់ខ្មែរទៅចាក់បញ្ចាំងនោះ ឈប់ទិញដោយងាកទៅទិញរឿងភាពយន្តបរទេសយកមកចាក់បញ្ចាំងវិញ ព្រោះរឿងភាពបរទេសមានតម្លៃថោក ត្បិតអីរឿងទាំងនោះ ត្រូវបានគេលក់នៅប្រទេសគេរួចហើយ។ "រឿងខ្មែរ ធ្វើ១ភាគប្រហែលជាង២ពាន់ដុល្លារ ប៉ុន្តែបើទិញរឿងបរទេសវិញ អស់តែ៥០០ដុល្លារប៉ុណ្ណោះ " លោក ឆាយ បូរ៉ា ថ្លៃង។

ផ្អែកតាមការវាយតម្លៃរបស់ប្រធានសមាគមភាពយន្តខាងលើ គ្រប់ស្ថានីយទូរទស្សន៍ទាំងអស់មួយរយៈចុងក្រោយនេះ បានចំណាយប្រាក់ ប្រហែលជា ៨លានដុល្លារឯណោះ ដើម្បីទិញកម្មវិធីពីបរទេស ក្នុងនោះមានរឿងភាគផងដែរ ។

ក្នុងការជជែកនេះ ក្រៅពីលោក ឆាយ បូរ៉ា ក៏មានការលើកឡើងពីចាងហ្វាងផលិតកម្ម ផលិតករ ក៏ដូចជា សិល្បករសិល្បៈការិនី ជាច្រើននាក់ផងដែរ ដែលបានលើកពីកង្វល់របស់ពួកគេ ជុំវិញវត្តមាន ភាពយន្តបរទេស ជាពិសេសរឿងភាគថៃ ដែលកំពុងតែចាក់បញ្ចាំងលើកញ្ចក់ទូរទស្សន៍ខ្មែរបច្ចុប្បន្ន។

លោក អៀង ស៊ីធុល សាស្ត្រាចារ្យនៃសាកលវិទ្យាល័យភូមិន្ទ និងវិចិត្រសិល្បៈ បានលើកឡើងថា វិស័យសិល្បៈ វប្បធម៌ខ្មែរ គឺជាអត្តសញ្ញាណរបស់ជាតិ ដែលមិនអាចខ្វះបាន ប៉ុន្តែបើគ្រប់ស្ថានីយ ទូរទស្សន៍របស់ខ្មែរ បញ្ចាំងតែរឿងបរទេស ហាក់បង្ហាញឲ្យកូនខ្មែរបានដឹងតែវប្បធម៌បរទេស ជាហេតុធ្វើឲ្យប៉ះពាល់យ៉ាងខ្លាំង ដល់ការអប់រំក្មេងៗជំនាន់ក្រោយ។

លោកបញ្ជាក់ថា ជាការពិតវប្បធម៌បរទេស យើងពិតជាចង់ដឹង និងចង់ស្វែងយល់ណាស់ ប៉ុន្តែវប្បធម៌បរទេស ក៏អាចជះឥទ្ធិពលអាក្រក់ ដល់សង្គមរបស់យើងផងដែរ។ ជាពិសេសក្មេងៗយុវវ័យ ដែលកំពុងតែជ្រួលជ្រើម ទទួលយកទាំងមិន ដឹងខ្លួននេះ ។

ផ្អែកតាមការវាយតម្លៃរបស់លោក ឆាយ បូរ៉ា មានទស្សនិកជនប្រមាណជា៨លាន់នាក់ក្នុងមួយថ្ងៃ ក្នុងនោះមានយុវជនជាង៦លាន់នាក់ កំពុងតែត្រេកត្រអាល ក្នុងការទទួលយកឥទ្ធិពលវប្បធម៌បរទេស ដែលធ្វើឲ្យបាត់បង់ចរិយាធម៌ថ្លៃថ្នូរ សុជីវធម៌ និងផ្នត់គំនិត ដែលជាគ្រោះនៃអត្តសញ្ញាណជាតិរបស់ខ្លួន។

ការជជែក ស្ដីពីកង្វល់ខាងលើ និងត្រូវដាក់ជូនក្រសួងវប្បធម៌ និងវិចិត្រសិល្ប ក៏ដូចជារាជរដ្ឋាភិបាល សម្រេចក្នុងពេលឆាប់ៗនេះ។