ស្រីស្អាតកូនកាត់អាល្លឺម៉ង់ ម៉ៃយ៉ា មិនទទួលថតកុនទេ!

2015-08-24 16:37:05
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាស្រីពន្លកថ្មី ដែលក្ដោបបានឱកាសថតស្ពតសម្អាងការ និង ពាណិជ្ជកម្មច្រើនស្អេកស្កះ កញ្ញា ម៉ៃយ៉ា បានប្រាប់ឲ្យដឹងថា នាងមិនទទួលថតខារ៉ាអូខេ ឬភាពយន្តឡើយ។

តារាស្រីដែលមានឪពុកជាជនជាតិអាល្លឺម៉ង់រូបនេះ បាននិយាយថា “គ្រួសារខ្ញុំ ជាពិសេសម៉ាក់គាត់មិនពេញចិត្តព្រោះខ្លាចមានឈុតសិចស៊ីអីនឹង ហើយខ្លួនខ្ញុំផ្ទាល់ក៏អត់ចូលចិត្តបែបនោះដែរ។ ចំពោះខ្សែភាពយន្តជាប្រភេទរឿងដុំខ្ញុំក៏អត់ទទួលដែរ តែបើជារឿងចាក់តាមកុនអានឹងខ្ញុំប្រហែលជាទទួលថត។”

ម៉ៃយ៉ា បានបន្តទៀតថា បើទោះឲ្យតម្លៃខ្លួនខ្ពស់ប៉ុន្មានក៏ដោយ ក៏នាងមិនអារកាត់ដោយខ្លួនឯងដែរ គឺត្រូវពិភាក្សាជាមួយគ្រួសារសិន "ប្រសិនបើមានផលិតកម្មណាហ៊ានឲ្យថ្លៃខ្ពស់មែន ខ្ញុំត្រូវពិចារណាជាមួយអ្នកផ្ទះសិនដែរ ណាមួយខ្ញុំជាប់សិក្សាអត់សូវមានពេលគ្រប់គ្រាន់សម្រាប់ថតទេ។ ម្យ៉ាងវិញទៀតខ្ញុំជាប់ការងារក្រៅផ្សេងទៀត ហើយនឹងជាប់ថតឲ្យសម្អាងការច្រើន"។

តារាស្រីកូនកាត់ខាងលើបានប្រឡូកចូលសិល្បៈបានជាងមួយឆ្នាំជាងហើយ តែបើជាលេចធ្លោផ្នែកថតសម្អាងការទៅវិញ។ ចំពោះបញ្ហានេះសាមីខ្លួនបានឲ្យដឹងថា "ខ្ញុំថតឲ្យបាន ១៥ ហាងហើយ និង ដោយសារតែគេគិតពីទម្រង់មុខខ្ញុំស័ក្ដិសមផង ចឹងបានមានគេទាក់ទងឲ្យថតសម្អាងច្រើនទៅ”។

ម៉ៃយ៉ា អាយុ ២០ ឆ្នាំ ដែលមានម្ដាយជាជនជាតិខ្មែរ និង ឪពុកជាជនជាតិអាល្លឺម៉ង់។ នាងសិក្សានៅសាកលវិទ្យាល័យភូមិន្ទវិចត្រសិល្បៈឆ្នាំទី ១ ផ្នែកដេគ័រ មិនត្រឹមតែប៉ុណ្ណោះ កញ្ញាអាចនិយាយបានស្ទាត់ជំនាញបីភាសា គឺខ្មែរ អង់គ្លេស និង ថៃ ចំណែកភាសាអាល្លឺម៉ង់វិញត្បិតមានឪពុកជាជនជាតិដើមមែនតែនាងចេះបន្តិចបន្តួចប៉ុណ្ណោះ៕

អត្ថបទ៖ ទ្រី រ៉ាវី