ផ្ទុះរឿងឪពុក ភិន សុដាលីស ទាត់ ប៉ែន ចំរុង ៣ជើងយប់មិញ

2015-08-27 21:27:35
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅក្នុងសន្និសីទកាសែតបន្ទាន់ព្រឹកមិញ លោក អ៊ិន សុភិន ម្ចាស់គ្រប់គ្រងផលិតកម្មមហាហង្សត្រូវជាឪពុករបស់ ភិន សុដាលីស បានប្រកាសថា លោកបានទាត់តារាសម្ដែងពូកែធ្វើឡប់ៗ ៣ជើង និងប៉ុន្មានដៃទៀតកាលពីយប់មិញ ព្រមទាំងប្រកាសជាផ្លូវការថា លោកនឹងធ្វើសង្គ្រាមពេញទំហឹងជាមួយតារារូបនេះពីពេលនេះតទៅ។

«នៅយប់ម៉ិញ យប់ថ្ងៃទី ២៦ ខែសីហា នេះនៅម៉ោង ១០ ខ្ញុំបានវាយនិងទាត់ ប៉ែន ចំរ៉ុង បីជើងរួចហើយ ហើយថ្ងៃនេះ ខ្ញុំក៏នឹងតាមវាយ ប៉ែន ចំរុង ដល់ផ្ទះគាត់ទៀត»។អ៊ិន សុភិន ប្រកាសក្នុងសន្និសីទសារព័ត៌មានព្រឹកមិញ។

ដំណើរដើមទងដែល ឪពុករូបនេះហ៊ានដល់ប្រើហិង្សាដូច្នេះ ដោយសារតារាប្រុសរូបនេះ មិនស្ដាប់ការព្រមានម្ដងជាពីរដង កុំឲ្យទាក់ទងកូនស្រីរបស់លោក ភិន សុដាលីស ។ មិនត្រឹមប៉ុណ្ណឹង លោកថា ប៉ែន ចំរុង មើលងាយក្រុមគ្រួសារ និងខាងផលិតកម្មរបស់លោកទៀត។

“ ប៉ែន ចំរុង មិនត្រឹមតែមិនគោរពខ្ញុំនោះទេ គេថែមទាំងមើលងាយខាងក្រុមការងារ មិនគោរពម៉ោងពេលវេលា និយាយក្រឡិចក្រឡុច ទាញផលប្រយោជន៍ពីខាងខ្ញុំរហូត...ទៀតផង។ ហើយខ្ញុំសូមប្រកាសថាបើមាន ចំរុង នៅក្នុងកម្មវិធីអ្វីមួយខ្ញុំនឹងទៅតាមគេរហូត"។ ចាងហ្វាងខាងលើ ថ្លែង។

លោក អ៊ិន សុភិន បានបន្តទៀតថាលោកស្គាល់ ហើយក៏ធ្លាប់បានសរសើរ ប៉ែន ចំរុង ដែរថាគេជាមនុស្សគួរឲ្យចូលចិត្ត ប៉ុន្តែអ្វីទាំងអស់បានធ្វើឲ្យលោកខកចិត្តបន្ទាប់ពីមានរឿងរ៉ាវយ៉ាងដូច្នេះ។ លោកបន្តទៀតថា អ្វីដែលធ្វើឲ្យលោក ក្ដៅចិត្តបំផុត ចុងក្រោយនេះ ពេលដែលលោកបានទូរសព្ទទៅដាស់តឿន ចំរុង តែបែរជា បងប្រុសរបស់គេលើកជំនួសវិញ ហើយបានព្រលយសម្ដីថាឈប់ឲ្យទាក់ទងប្អូនប្រុសគេទៀត។

"ពីដំបូងឡើយខ្ញុំមិនបានស្អប់ ចំរុង ទេ ហើយខ្ញុំក៏មិនបានហាមឃាត់កូនស្រីមិនឲ្យទៅទាក់ទងនឹងគេនោះទេ ប៉ុន្តែចាប់តាំងពីថតរឿង "ខ្មោចថតកុន" មក ទើបខ្ញុំដឹងថា ចំរុង ជាមនុស្សបែបណា បើគេស្រលាញ់កូនខ្ញុំស្មោះពិតមែនគេនឹងតស៊ូដើម្បីនាងហើយនឹងគោរពស្រលាញ់ខាងក្រុមគ្រួសារខ្ញុំផងដែរប៉ុន្តែគេមិនបានឲ្យតម្លៃខាងខ្ញុំនោះទេ"។ អ៊ិន សុភិន បន្ថែម។

ឪពុក ភិន សុដាលីស បានបញ្ជាក់ទៀតថា លោកនឹងទៅជួបនៅផ្ទះ ប៉ែន ចំរុង ថ្ងៃណាមួយឆាប់ៗនេះដើម្បីធ្វើការចរចាពីបញ្ហាទាំងអស់នេះហើយលោក កំពុងតែមានវិធានលើកូនស្រីដែរ។

ពាក់ព័ន្ធករណីខាងលើ ភាគីខាងប្រុស គឺតារាសម្ដែង ប៉ែន ចំរុង មិនទាន់អាចសុំទំនាក់ទំនងបានទេព្រឹកនេះ...៕

អត្ថបទ៖ ថាម៉ាលីដា