ក្រសួងអប់រំ និង FFC និយាយពី U-19កម្ពុជា ៥នាក់នៅឡាវមិនបានប្រឡងបាក់ឌុប
- 2015-08-27 23:57:53
- ចំនួនមតិ 0 | ចំនួនចែករំលែក 0
ក្រសួងអប់រំ និង FFC និយាយពី U-19កម្ពុជា ៥នាក់នៅឡាវមិនបានប្រឡងបាក់ឌុប
ចន្លោះមិនឃើញ
អ្នកនាំពាក្យក្រសួងអប់រំ យុវជន និងកីឡាថា កីឡាករជម្រើសជាតិដែលជាប់បំពេញបេសកកម្ម ចូលរួមប្រកួតនៅក្រៅប្រទេស តែជាប់កាតព្វកិច្ចត្រូវប្រឡងបាក់ឌុប ហើយមិនមកប្រឡង ដោយមិនបានជូនដំណឹងមកក្រសួងអប់រំជាមុននោះ ត្រូវធ្លាក់ដោយស្វ័យប្រវត្តិ ប៉ុន្តែលោកអគ្គលេខាធិការរងនៃសហព័ន្ធបាល់ទាត់កម្ពុជាថា មិនទាន់មានដំណោះស្រាយបែបណាឡើយចំពោះកីឡាករទាំង៥នាក់ដែលចេញទៅប្រកួតជាមួយមិត្តរួមក្រុមនៅប្រទេសឡាវ។
សមាជិកក្រុមជម្រើសជាតិកម្ពុជាអាយុក្រោម១៩ឆ្នាំ(U-19)៥នាក់ដែលកំពុងបំពេញភារកិច្ចសម្រាប់ការប្រកួត 2015 AFF U19 Championship នៅប្រទេសឡាវដែលធ្វើឲ្យពួកគេមិនបានចូលរួមប្រឡងសញ្ញាបត្រមធ្យមសិក្សាទុតិយភូមិមិនទាន់ត្រូវបានថ្នាក់ដឹកនាំសម្រេចយ៉ាងណានោះទេ។
លោក ម៉ៃ តុលា អគ្គលេខាធិការរងនៃសហព័ន្ធកីឡាបាល់ទាត់កម្ពុជាបានប្រាប់ថា កីឡាករ៣នាក់បានប្រាប់ដំណឹងដល់សហព័ន្ធបាល់ទាត់កម្ពុជាអំពីការប្រឡងរបស់ពួកគេ និងពីរនាក់ទៀតអត់បានប្រាប់សហព័ន្ធទេគឺសហព័ន្ធទើបតែដឹងនៅពេលព័ត៌មានចេញផ្សាយហើយ។
លោកថា ៖«៣នាក់បានប្រាប់សហព័ន្ធ ហើយយើងបានពិភាក្សាគ្នា ឪពុកម្តាយរបស់ពួកគេក៏យល់ព្រមឲ្យពួកគេហ្វឹកហាត់ និងចេញទៅប្រកួតដែរ តែសហព័ន្ធក៏បានឲ្យពួកគេពិចារណាពីការប្រឡងដែរ។ ពីរនាក់ទៀត យើងអត់ដឹងថា ពួកគេត្រូវប្រឡងបាក់ឌុបឡើយ ដឹងពេលព័ត៌មានចេញផ្សាយហើយ ទើបខាងគ្រូប្រាប់ថា មាន២នាក់ទៀត»។
លោកអគ្គលេខាធិការរងបានបញ្ជាក់ថា នៅពេលនេះសហព័ន្ធបាល់ទាត់កម្ពុជាមិនទាន់សម្រេចយ៉ាងណានោះទេ គឺមិនអាចនិយាយបានថា ឲ្យពួកគេធ្លាក់ដោយស្វ័យប្រវត្តិបានឡើយ រង់ចាំពួកគេវិលត្រឡប់មកវិញទើបពិភាក្សាគ្នាដើម្បីរកដំណោះស្រាយ។
ទោះបីជាយ៉ាងណានៅរសៀលថ្ងៃនេះប្រភពព័ត៌មាន Freshnews បានផ្សាយថា អ្នកនាំពាក្យក្រសួងអប់រំ យុវជន និងកីឡា លោក រស់ សាលីន បាន ប្រាប់ថា កីឡាករជម្រើសជាតិដែលជាប់បំពេញបេសកកម្ម ចូលរួមប្រកួតនៅក្រៅប្រទេស តែជាប់កាតព្វកិច្ចត្រូវប្រឡងបាក់ឌុប ហើយមិនមកប្រឡង ដោយមិនបានជូនដំណឹងមកក្រសួងអប់រំជាមុននោះ ត្រូវធ្លាក់ដោយស្វ័យប្រវត្តិ។
កីឡាករ U-19កម្ពុជាទំាង៥នាក់ដែលមិនបានប្រឡងបាក់ឌុប កាលពីថ្ងៃទី២៤-២៥ ខែសីហាកន្លងទៅនេះមាន កីឡាករ ម៉ែន មុន្នីរ៉ា, គីម ហាប់, ទូច រ៉ូម៉ា, ជាម រតនា និងកីឡាករ ចិន វណ្ណៈ ។ ពួកគេកំពុងបំពេញភារកិច្ចជួយជាតិក្នុងការប្រកួតពាន2015 AFF U19 Championship ចាប់ពីថ្ងៃទី២២ សីហា ដល់ទី៤ ខែកញ្ញា ឆ្នាំ២០១៥ នៅប្រទេសឡាវ៕
អត្ថបទ៖ ជាន ចាន់រ៉ា