រឿងរ៉ាវឪពុក ភិន សុដាលីស ទាត់៣ជើង ប៉ែន ចំរុង ទាក់ទងអត់បានតែបងប្រុសនិយាយជំនួស

2015-08-28 19:16:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ជុំវិញរឿងរ៉ាវដែលផ្ទុះឡើងម្សិលមិញ ដោយលោក អ៊ិន សុភិន បើកសន្និសីទកាសែតនិយាយថា លោកបានទាត់ ប៉ែន ចំរុង ៣ជើង ព្រោះតែខឹងហាមអោយឈប់ទាក់ទងកូនស្រីលោកមិនស្ដាប់នោះ មកទល់ព្រឹកនេះ តារាប្រុសរូបនេះ នៅតែមិនទាន់អាចទំនាក់ទំនងបានព្រឹកនេះ។ ប៉ុន្តែបងប្រុសរបស់លោក បាននិយាយជំនួស។

បងប្រុសរូបនោះប្រាប់ Sabay ព្រឹកនេះថា "គាត់ចង់ធ្វើរឿងអីក៏ធ្វើទៅចុះ គាត់ថាអីថាទៅ ខ្ញុំអត់តតាំងដែរ ហើយចង់ឲ្យប្អូនទៅជួបគាត់ គឺគ្មានពេលទេ ព្រោះចំរុង រវល់ស្ទើរតែដកខ្លួនមិនបានផង មានពេលឯណាទៅជួបគាត់ទៅ។ រឿងហ្នឹងខ្ញុំ មិនហ៊ានអារកាត់ថាម៉េចទេ ទុកឲ្យចំរុងគេជាអ្នកបកស្រាយទៅ "។

បងប្រុស របស់ ប៉ែន ចំរុង បានបន្តទៀតថា រឿងទាំងអស់ដែលបានកើតឡើងលោកសុំឲ្យទេវតាជាអ្នកមើល ទេវតាមានភ្នែកពិតជាបានដឹងថាអ្នកណាល្អអ្នកណាអាក្រក់ លោកសុំមិនបកស្រាយអ្វីច្រើនពាក់ព័ន្ធនឹងបញ្ហានេះ។ ចំពោះរឿងដែល លោក សុភិន ខលមកដាស់តឿន ចំរុង បែរជាត្រូវបងប្រុសលើកជំនួសនោះ បងប្រុសរូបនេះ ទទួលថាពិតជាបាននិយាយចឹងមែន។

"ខ្ញុំពិតជាបាននិយាយទៅកាន់គាត់ថា ឈប់ឲ្យមកទាក់ទងប្អូនប្រុសរបស់ខ្ញុំទៀត ព្រោះគាត់ជាអ្នកនិយាយមុនថា ឈប់ឲ្យមកទាក់ទងជាមួយកូនស្រីគាត់។ហើយខ្ញុំក៏មានកូនស្រីដែរចឹងខ្ញុំក៏និយាយដូចគ្នាថាកុំខលមកប្អូនប្រុសខ្ញុំដែរ"។

ពាក់ព័ន្ធនឹងរឿងទាត់ធាក់ដែលបណ្ដាញសារព័ត៌មានបានចុះផ្សាយជាច្រើនកាលពីម្សិលមិញបងប្រុសប៉ែន ចំរុង ប្រាប់ថាលោកមិនបានដឹងរឿងនេះទេ ហើយលោកក៏មិនបាននៅក្នុងហេតុការណ៍នោះដែរ ហើយរឿងប្ដឹងផ្ដល់ស្រេចតែលើប្អូនប្រុស។

"និយាយត្រង់ខ្ញុំមិនចង់ឲ្យមានរឿងនេះកើតឡើងទេ ព្រោះយើងជាខ្មែរដូចគ្នា ណាមួយត្រូវជួបអ្នកកាសែតដើម្បីធ្វើការបំភ្លឺចុះឡើងៗមិនចេះចប់មិនចេះហើយណាអូន។ បើសិនជាអាចខ្ញុំសុំបញ្ចប់ឲ្យបានស្ងប់ចិត្តទាំងអស់គ្នា គ្រួសារខ្ញុំក្រីក្រគ្មានអីទៅតវ៉ាជាមួយគេនោះទេ"៕

អត្ថបទ៖ ថា ម៉ាលីដា