ISIS បំផ្ទុះកម្ទេចប្រាសាទអាយុកាល២០០០ឆ្នាំមួយទៀតនៅទីក្រុងបុរាណ

2015-08-31 14:08:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមរដ្ឋឥស្លាមជ្រុលនិយម ISIS បានបំផ្ទុះបំផ្លាញប្រាសាទបុរាណមួយទៀតហើយ គឺប្រាសាទ Bel ដែលមានអាយុកាលជាង ២០០០ឆ្នាំ។

ប្រាសាទ Bel មុនពេលកម្ទេច

ប្រាសាទបុរាណដែលជាបេតិកភណ្ឌដ៏មានតម្លៃដែលមានទីតាំងនៅទីក្រុងបុរាណ Palmyra នៃប្រទេសស៊ីរីនេះ ត្រូវបានពួក ISIS បំផ្ទុះនាម៉ោង ១:៤៥នាទីរសៀល (ម៉ោងក្នុងស្រុក) កាលពីថ្ងៃអាទិត្យម្សិលមិញ។

ប្រជាជនក្នុងតំបន់ម្នាក់ដែលបានឃើញហេតុការណ៍នេះ បានប្រាប់ឲ្យដឹងថា៖ "វាជាការបំផ្លាញឲ្យខ្ទេចទាំងស្រុង។ ឥដ្ឋ និងជញ្ជាំងប្រាសាទបានរាបដល់ដី។ វាជាការបំផ្ទុះដ៏ខ្លាំងដែលសូម្បីតែមនុស្សថ្លង់ក៏អាចឮ"។

បុរសដដែលក៏បានបញ្ជាក់ផងដែរថា មានតែជញ្ជាំងនៅជុំវិញប្រាសាទតែប៉ុណ្ណោះ ដែលនៅសេសសល់ពីការបំផ្លាញនេះ។

ប្រាសាទបុរាណ Bel បានកសាងនៅលើកូនភ្នំមួយកាលពី២២០០ឆ្នាំមុន។ មិនត្រឹមតែកម្ទេចប្រាសាទចោលទេ ពួក ISIS ក៏បានបំផ្លាញរូបសំណាកតោថ្មបុរាណ Lion of al-Lat ទម្ងន់១៥តោន កម្ពស់ ៣,៥ម៉ែត្រ ដែលគេគោរពបូជាផងដែរ។

នេះមិនមែនជាលើកទី១នោះទេដែលក្រុមរដ្ឋឥស្លាមជ្រុលនិយម ISIS បានកម្ទេចប្រាសាទបុរាណ និងបេតិកភណ្ឌនានា។ កាលពីសប្ដាហ៍មុន ក្រុមនេះក៏បានបញ្ចេញវីដេអូបង្ហាញពីការដាក់គ្រឿងផ្ទុះកម្ទេចប្រាសាទបុរាណ Baalshamin ផងដែរ៕

ចុចអាន៖ ISIS បញ្ចេញរូបភាពដាក់គ្រឿងផ្ទុះបំផ្លាញប្រាសាទបុរាណនៅស៊ីរីរាបដល់ដី