ប៉ែន តុលា ជម្រះបញ្ជីជាមួយ ភិន សុដាលីស

2015-09-01 16:50:57
ចំនួនមតិ 0 | ចំនួនចែករំលែក 0

ចន្លោះមិនឃើញ

“ខ្ញុំសូមបញ្ជាក់ប៉ាអត់មានបង្ខំពួកយើងទេ មុនសម្រេចចិត្តភ្ជាប់ពាក្យគាត់សុទ្ធតែសួរ ពួកយើងទាំងពីរ"។ នេះជាការលើកឡើងរបស់លោក ប៉ែន តុលា ក្នុងជំនួបជាមួយ Sabay ប្រមាណជា ២០ នាទី កាលពី ល្ងាចម្សិលមិញ។

លោក ប៉ែន តុលា មិនបានពន្យល់លម្អិតទៅនឹងសាច់រឿងទាំងមូលនោះឡើយ ដោយចំណុចមួយចំនួន លោកបានជំរុញឲ្យ លោក អ៊ិន សុភិន ដែលលោកតែងហៅថា "ប៉ាប៉ា" ពេញៗមាត់នោះ ជាអ្នកបកស្រាយទៅវិញ។ តែអ្វីដែល តុលា លើកឡើងនោះ មានតែ ៣ ចំណុច ប៉ុណ្ណោះ គឺទី ១ ជុំវិញការបង្ខំកូនស្រីឲ្យរៀបការ ទី ២ ការប្រើហិង្សា និង ទី ៣ តើលោកនៅបន្ដជាមួយ កញ្ញា ភិន សុដាលីស ទៀតឬយ៉ាងណា?

ទី ១ ការបង្ខំកូនស្រីឲ្យរៀបការ

បណ្ដាញសារព័ត៌មានក៏ដូចជា កញ្ញា ភិន សុដាលីស ផ្ទាល់ បានដាក់កំហុសធ្ងន់ៗថា លោក អ៊ិន សុភិន បានបង្ខំកូនស្រីរៀបការជាមួយលោកនោះ គឺជារឿងមិនពិតទេ។ តុលា និយាយថា មុនសម្រេចចិត្តភ្ជាប់ពាក្យជាមួយគ្នា អ្នកទាំងពីរ បានស្វែងយល់ចិត្តគ្នា ដោយប្រើពេល ២ ទៅ ៣ ខែ។ ក្នុងអំឡុងពេលនេះ ពួកគេបានដើរលេងជាមួយគ្នា ទាំងក្នុង និង ក្រៅប្រទេសថែមទៀតផង។

ទន្ទឹមគ្នានេះដែរ ខ្លួនលោកផ្ទាល់ក៏ធ្លាប់បានប្រាប់ទៅកញ្ញា ភិន សុដាលីស ក៏ដូចជា ក្រុមគ្រួសារថា លោកជាមនុស្សម្នាក់ធ្លាប់មានប្រពន្ធម្ដងរួចមកហើយ ប៉ុន្ដែ ចំណងស្នេហាកន្លងមក បានលែងលះគ្នាដាច់ស្រេចរួចរាល់អស់ហើយ។ "ការពិត ដាលីស ដឹងថា ខ្ញុំធ្លាប់មានប្រពន្ធម្ដង តាំងពី ២ខែមុនថ្ងៃភ្ជាប់ពាក្យឯណោះ មិនមែនទើបតែដឹងក្រោយនេះឯណា ហើយពួកយើងបានសួរគ្នាច្បាស់ណាស់ ចាស់ទំុំចាំតែធ្វើតាមក្រោយប៉ុណ្ណោះ"។ លោក ប៉ែន តុលា ថ្លែងបញ្ជាក់។

ទី២ ការប្រើហិង្សា

ចំណុចដែល កញ្ញា ភិន សុដាលីស ចោទថា ធ្លាប់ប្រើអំពើហិង្សាដាក់នោះ លោក ប៉ែន តុលា មិនបានចាំថា លោកធ្វើដាក់ ដាលីសឡើយ ដោយលោកបានលើកឡើងថា មិនបានដឹងខ្លួនថា បានធ្វើអ្វីជ្រុលដៃដាក់នោះឡើយ តែធម្មតាការស្រលាញ់ ប្រលែងលេង តែងតែមានជ្រុលជ្រួសបន្តិចបន្ដួចហើយ។

ទី៣ តើលោកនៅបន្តជាមួយ ដាលីស ទៀតឬយ៉ាងណា?

លោក ប៉ែន តុលា បញ្ជាក់ថា ទោះបីជា ដាលីស មានកំហុសប៉ុណ្ណាក៏លោកនៅតែអត់ឱនឲ្យបាន ព្រោះលោកបានដាក់ចិត្តស្រលាញ់គ្នារួចហើយ។ ជាមួយគ្នានោះប្រសិនជា ដាលីស ព្រមរៀបការជាមួយលោកនៅចុងឆ្នាំនេះ តាមការគ្រោងទុករបស់ចាស់ទុំនោះ ក៏លោកព្រមទទួលដែរ។ ប៉ុន្តែប្រសិនបើ ដាលីស ជ្រើសយកលោក ប៉ែន ចំរ៉ុង លោកក៏មិនអាចបង្ខំចិត្តនាងដែរ ព្រោះនេះជាសិទ្ធិសេរីភាពរៀងៗខ្លួន តែបែបណាក្ដី លោកនៅតែបន្តរាប់អានក្រុមគ្រួសារ ដាលីស ដដែល៕