ភិន សុដាលីស ឆ្លើយតបថា មិនបានចេញពីផ្ទះទេ និង សំណូមពរលោកឪពុក...

2015-09-01 17:50:14
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីសន្និសីទកាសែតរបស់ លោក អ៊ិន សុភិន កាលពីថ្ងៃ ២៧ ខែ សីហារួចមក ម្ចាស់ផលិតកម្មមហាហង្សនេះក៏បានប្ដឹងផ្ដល់ពីរឿងភិន សុដាលីស បាត់ខ្លួនពីផ្ទះ ធ្វើឲ្យសាច់រឿងមួយនេះក្លាយជាប្រធានបទដ៏ក្ដៅគគុក ពេញបណ្ដាញប្រព័ន្ធផ្សព្វផ្សាយ ហើយមុននេះកន្លះម៉ោង ដាលីស បានបង្ហោះសារមួយថា នាងមិនបានរត់ចេញពីផ្ទះទេ។

“អរគុណចំពោះការបារម្ភរបស់អ្នកទាំងអស់គ្នា ខ្ញុំមិនបានរត់ចេញពីផ្ទះនោះទេ ខ្ញុំមានការងារត្រូវធ្វើហើយក៏គិតថាចេញមកក្រៅដើម្បីបន្ធូរអារម្មណ៍ និងអាចរកកន្លែងមួយស្ងប់ស្ងាត់ជាងនេះ។ កុំបារម្ភពីខ្ញុំអី ខ្ញុំនឹងត្រលប់ទៅវិញនៅពេលដែលរឿងនេះមានដំណោះស្រាយរួចរាល់ ហើយខ្ញុំសូមបញ្ជាក់ថាចំពោះការចាកចេញរបស់ខ្ញុំមិនមានការពាក់ព័ន្ធនឹងអ្នកណាទាំងអស់នេះជាការសម្រេចចិត្តរបស់ខ្ញុំដោយខ្លួនឯង សូមសំណូមពរដល់ប៉ាមេត្តាឈប់បង្កបញ្ហាដល់អ្នកដទៃទៀតទៅ គ្មានអ្នកណាពាក់ព័ន្ធនឹងរឿងនេះទេ។” នេះជាសារខ្លីដែលបង្ហោះដោយ Page ឈ្មោះ Katy Love ដែលជាគណនីផ្ទាល់ខ្លួនរបស់កូនស្រីម្ចាស់ផលិតកម្មមហាហង្សរូបនេះ។

គួររំលឹកផងដែរថា ក្រោយផ្ទុះរឿងឪពុក ភិន សុដាលីស ទាត់ ប៉ែន ចំរុង ៣ជើងកាលពីយប់ថ្ងៃ ២៦ មកធ្វើឲ្យ សុដាលីស បាត់ខ្លួនពីផ្ទះតាំងពីថ្ងៃ ២៧ ខែ សីហា ដោយប្រាប់គ្រួសារថា ទៅថតនៅខេត្ត ដោយមកដល់ពេលនេះមានរយៈពេលបាត់ខ្លួន ៦ ថ្ងៃហើយ ដោយមិនមាននរណាម្នាក់ដឹងថា នាងទៅណានោះទេ ខណៈដែលថ្ងៃអាទិត្យសប្ដាហ៍មុន នាងក៏បានបង្ហោះវីដេអូបរិយាយពីរឿងខ្លួនផងដែរ៕

អត្ថបទ៖ទ្រី រ៉ាវី