ឧកញ៉ា ឃ្លោក ឡើងជំនួសតំណែង អៀង ស៊ីធុល

2015-09-03 17:10:20
ចំនួនមតិ 0 | ចំនួនចែករំលែក 0

ចន្លោះមិនឃើញ

តួនាទីប្រធានកិត្តិយសរបស់សមាគមសិល្បករខ្មែរដែលលោក អៀង ស៊ីធុល ធ្លាប់កាន់កន្លងមកនោះ ពេលនេះត្រូវបានធ្លាក់មកលើ ឯកឧត្ដម ឧកញ៉ា ឃ្លោកហើយ បន្ទាប់ពី លោក អៀង ស៊ីធុល ប្រកាសលាឈប់។

តំណែងខាងលើរបស់អតីតតារាកំប្លែងរូបនេះ ក្រោយក្រុមប្រឹក្សាភិបាលទាំង១១នាក់របស់សមាគមសិល្បករខ្មែរ ក្នុងនោះក៏មានលោកអៀង ស៊ីធុលដែលកាន់តួនាទីនេះចាស់ផង បានជួបប្រជុំគ្នា និងសម្រេចបោះឆ្នោតឲ្យ។ ជាមួយគ្នានោះ ក៏ផ្សំនឹងសាមីខ្លួន(ឯកឧត្តម ឃ្លោក) មានចិត្តចង់ធ្វើកិច្ចការនេះស្រាប់ផង។ ឧកញ៉ាឃ្លោក ធ្លាប់បានបង្ហើបថា លោកចង់ជួយដល់សិល្បករសិល្បការិនីចាស់ៗ ដែលកំពុងជួបបញ្ហាជីវភាព ឬ សុខភាព តាមលទ្ធភាពអាចធ្វើបាន ជាមួយនឹងតំណែងខាងលើ។

"ខ្ញុំមិនអាចជួយមនុស្សបាន១ប្រទេសទេ តែបើត្រឹមចង្កោមអ្នកសិល្បៈមួយក្រវេចហ្នឹងខ្ញុំគិតថា យើងអាចរួមគ្នាជួយបាន មានតែអ្នកសិល្បៈទេដែលដឹងពីបេះដូងអ្នកសិល្បៈដូចគ្នា យើងរួមដៃជួយគ្នា"។ឯកឧត្ដម ឃ្លោក បានបន្តថា លោក ក៏ដូចជាឯកឧត្ដម កុយ ស៊ីឌឿន អ្នកស្រី ថុង ស៊ីវទៀង ដែលសុទ្ធតែជាអ្នកអាចមានលទ្ធភាព នឹងរួមដៃគ្នាស្វែងរកមូលនិធិមកជួយសមាគមសិល្បករ ឲ្យបានកាន់តែប្រសើរជាងនេះ។

តួនាទីប្រធានកិត្តិយសរបស់សមាគមសិល្បករខ្មែរ មិនទទួលបានប្រាក់ខែ ឬកម្រៃអ្វីទាំងអស់។ បុគ្គលដែលចូលមកកាន់តំណែងនេះ មានតួនាទីស្វែងរកជំនួយពីសប្បុរសជននានា ឬបរិច្ចាគថវិកាផ្ទាល់ខ្លួន មកជួយដល់សិល្បករសិល្បការិនីចាស់ៗ ដែលកំពុងជួបបញ្ហាជីវភាព ឬសុខភាពជាដើម។ ដោយសារមានអតីតភាពជាតារាកំប្លែងផង ផ្សំនឹងលោកមានធនធានខ្លះផង ទើប ឧកញ៉ា ឃ្លោក ប្រាប់ថា លោកចង់ធ្វើកិច្ចការនេះ។

វិលការលាឈប់របស់លោក អៀង ស៊ីធុល ពីតួនាទីខាងលើវិញ លោកប្រាប់ថា ដោយសារតែអាណត្តទី៣ នៃតួនាទីរបស់លោកបានមកដល់ថ្ងៃកំណត់ ផ្សំនឹងសុខភាពមិនអំណោយផលផង។ "ខ្ញុំសុំលាលែងពីពេលនេះទៅ ព្រោះអាណត្តិទី៣ដែលខ្ញុំកាន់ចប់ហើយ ម្យ៉ាងសុខភាពខ្ញុំក៏មិនអំណោយផលផងដូចគ្រប់គ្នាបានដឹងហើយ"។ លោក អៀង ស៊ីធុល កាលពីម្សិលមិញ នៅចំពោះមុខក្រុមប្រឹក្សាសមាគមសិល្បករខ្មែរ និងអ្នកសារព័ត៌មាននានា។

ជាមួយគ្នានេះផងដែរ ដើម្បីឲ្យមានការដឹងឮ ទទួលស្គាល់តាមផ្លូវច្បាប់ សុះ ម៉ាច ប្រធានសមាគមសិល្បករ ត្រៀមបញ្ជូនបញ្ជីឈ្មោះអ្នកដែលចូលរួមជាមួយសមាគមសិល្បករទាំងអស់ ទៅតម្កល់នៅក្រសួងមហាផ្ទៃក្នុងពេលឆាប់ៗខាងមុខនេះ៕