ស្ងាត់ៗ កែវ និសា ទទួលតំណែងថ្មីមួយនៅ CNC

2015-09-04 17:25:35
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង កែវ និសា ទទួលបានតំណែងថ្មីមួយនៅទូរទស្សន៍ CNC បន្ថែមពីលើតំណែង ២ ដែលនាងមានស្រាប់នៅ MyTV។

តំណែងថ្មីនេះ និសា ត្រៀមធ្វើជាពិធីការិនីក្នុងកម្មវិធីតន្ត្រីថ្មីមួយរបស់ស្ថានីយទូរទស្សន៍មួយនេះ ក្រោយបានសម្រេចផ្លាស់ប្ដូររបត់មករកព័ត៌មានកម្សាន្តខ្លះ ផ្សំនឹងព័ត៌មានសេដ្ឋកិច្ច និងព័ត៌មានក្នុងស្រុកផ្សេងទៀត។

អ្នកមេម៉ាយរូបស្រស់ខាងលើ មិនអាចភ្ជាប់ទំនាក់ទំនងបានទេ ប៉ុន្តែប្រភពពីមន្ត្រីបម្រើការ នៅក្នុងស្ថានីយទូរទស្សន៍ដដែល គឺលោក សេត គឹមសឿន បានបង្ហើបថា ការចរចាបានឈានដល់កិច្ចព្រមព្រៀងរវាងគ្នាតាំងពីខែមុន។ ដូច្នេះតាមផែនការគ្រោងទុក កែវ និសា នឹងត្រូវចេញមុខកាន់ក្បាលមីក្រូហ្វូននៅក្នុងកម្មវិធីតន្ត្រីទី១របស់ស្ថានីយទូរទស្សន៍ខ្លួន ត្រឹមចុងសប្ដាហ៍នេះ។

កែវ និសា បាន និងកំពុងកាន់កម្មវិធី២នៅ MyTV គឺកម្មវិធី "Ganzberg Challenge" និងកម្មវិធី "រង្វាន់ទេវតា"។ ការងារជាមួយនឹងកម្មវិធីទាំងពីរនេះ និសា ធ្វើបានល្អ ដោយទទួលបានការគាំទ្រគួរឲ្យកត់សម្គាល់ ទើប CNC សម្រេចថាធ្វើការងារថ្មីនេះជាមួយនាង។

លោក សេត គឹមសឿន អ្នកគ្រប់គ្រងកម្មវិធីកំពូលតន្ត្រី KAP ជាកម្មវិធី និសា ត្រូវធ្វើជាពិធីការិនី ថ្លែងថា "និសា ជាតារាជួរមុខទាំងសម្តែង និងពិធីករ ហើយនាង មានសមត្ថភាពខ្ពស់នៅក្នុងការនិយាយលេងសើច ។ មិនត្រឹមប៉ុណ្ណឹងចុងក្រោយនេះ នាង ឆក់បានការគាំទ្រយ៉ាងច្រើនពីមហាជនទាំងទីក្រុង និងជនបទ តាមរយៈការអភិវឌ្ឍសមត្ថភាពយ៉ាងលឿន។ ដូច្នេះទើបសម្រេចថាយកនាង"។

កែវ និសា នឹងចាប់ដៃគូជាមួយតារាប្រុសស្រីពីរដួងទៀតគឺលោក សាហារា ពន្លឺ និងកញ្ញា ចាន់ ស្រីរ័ត្ន សម្រាប់នាទីជាពិធីការិនីក្នុងកម្មវិធី "កំពូលតន្ត្រី KAP”។ អ្នកគ្រប់គ្រងកម្មវិធីខាងលើដដែលបញ្ជាក់ថា កម្មវិធីកម្សាន្តដ៏ថ្មីមួយនេះ នឹងដំណើរការសប្ដាហ៍ទី១របស់ខ្លួននៅថ្ងៃទី ០៦ កញ្ញាចុងសប្ដាហ៍នេះ។

"ដោយសារទើបបើកឆាកអីចឹង យើងមានតារាចម្រៀងល្បីៗមាន ខេមរៈ សិរីមន្ត សុខ ពិសី នាយកុយ(ច្រៀងជាកិត្តិយស) ជាដើមនឹងចូលរួម។ ក្រៅពីនេះ ចុងកម្មវិធីនឹងមានការសម្ដែងរបស់ក្រុមកំប្លែង ពែកមី ថែមទៀតផង" លោក សេត គឹមសឿន ថ្លែង៕

អត្ថបទ៖ ទារិកា