ឡាន Range Rover ពិសេស គ្រាប់កាំភ្លើងបាញ់អត់ធ្លុះ តម្លៃជិតកន្លះលាន

2015-09-08 21:51:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនផលិតរថយន្ត Land Rover បានបង្ហាញនូវឡាន Range Rover ស៊េរីពិសេសមួយ ដែលមានសមត្ថភាពអាចការពារគ្រាប់កាំភ្លើង និងការបំផ្ទុះគ្រាប់បែកបាន។

រថយន្តដែលក្រុមហ៊ុនបានបង្ហាញនោះគឺ Range Rover Sentinel ផលិតឡើងដោយមានបំពាក់នូវប្រព័ន្ធការពារពិសេសៗលើសពីរថយន្តធម្មតា។ បើមើលពីរូបរាងខាងក្រៅទៅគឺមានលក្ខណៈដូចគ្នាបេះបិទទៅនឹងរថយន្ត Range Rover ធម្មតាដោយគ្រាន់តែខុសគ្នាត្រង់សមត្ថភាពការពារតែប៉ុណ្ណោះ។

ក្រុមហ៊ុនបានធ្វើការបំពាក់នូវប្រព័ន្ធការពារមួយចំនួនដូចជា ធុងសាំងធន់នឹងការធ្លុះធ្លាយ និងមានប្រភេទកង់ឡានដែលអាចបរទៅមុខបាន ទោះបីកង់នោះបែកក៏ដោយ។ មិនតែប៉ុណ្ណោះសម្បកនិងកញ្ចក់របស់រថយន្តគឺអាចការពារគ្រាប់កាំភ្លើងបាន ហើយវាក៏អាចទប់ទល់នឹងកម្លាំងបំផ្ទុះរបស់គ្រាប់បែកដៃទាំងផ្នែកខាងលើនិងខាងក្រោមនៃរថយន្ត ព្រមទាំងអាចទ្រទ្រង់នឹងគ្រាប់បែក TNT ទម្ងន់១៥គីឡូក្រាមបានផងដែរ។ ក្នុងករណីដែលទ្វារចេញចូលរបស់រថយន្តបើកមិនបានដោយសារគ្រោះថ្នាក់អ្វីមួយ អ្នកបើកបរអាចប្រើប្រាស់ប្រព័ន្ធ Emergency Escape System ដើម្បីចេញតាមច្រកខាងក្រោយបាន។

សម្រាប់រថយន្តនេះផងដែរ គឺមានប្រើប្រាស់ម៉ាស៊ីនប្រភេទ V6 ទំហំ ៣លីត្រ ដែលមានកម្លាំង ៣៤០សេះ ហើយលោកអ្នកអាចកុម្ម៉ង់ទិញ Range Rover Sentinel នេះបានចាប់ផ្ដើមពីខែក្រោយនេះក្នុងតម្លៃប្រមាណ ៤៤៦ ០០០ដុល្លារ។

-ចុចអាន៖ ឡានទំនើប៥ម៉ូដែល ធ្វើឲ្យអតិថិជនរំជួលចង់បាន តែមិនដែលឃើញលក់លើទីផ្សារ

ប្រែសម្រួល៖ ហៃ សុខហេង ប្រភព៖ autoevolution, mirror, businessinsider