សុខ សោម៉ាវត្តី ជម្រះរឿងបែកគ្នាជាមួយស្វាមី

2015-09-10 15:59:48
ចំនួនមតិ 0 | ចំនួនចែករំលែក 0

ចន្លោះមិនឃើញ

សុខ សោម៉ាវត្តី បានបញ្ជាក់ថា នាង និងទូច ដាណារ៉ា កូនប្រុសឯកឧត្ដម ទូច ណារ៉ុថ នៅតែជាភរិយាស្វាមីនឹងគ្នា ពុំមានរឿងជម្លោះទាស់ទែងរហូតដល់បាក់បែកចែកផ្លូវគ្នាដើរនោះឡើយ។

តារាស្រីកូនមួយរូបនេះ ថ្លែងដូច្នេះ ខណៈមួយរយៈកាលចុងក្រោយនេះ មានលេចធ្លាយព័ត៌មានចចាមអារ៉ាមបន្តបន្ទាប់មកថា ជីវិតស្វាមីភរិយារយៈពេល២ឆ្នាំរបស់នាង និងស្វាមីបានដើរដល់ផ្លូវបំបែក។ ព័ត៌មានជាច្រើនក៏បានចុះផ្សាយ ដោយទាញហេតុផលថា ស្វាមីនាងមានស្រីថ្មីទៀតជាបុគ្គលស្ថិតក្នុងរង្វង់សិល្បៈដែរ។

ចំពោះមុខ Sabay ក្នុងថ្ងៃសម្ពោធរឿង "សិស្សប្អូនសំណព្វចិត្ត" ដែលនាងដើរជាតួឯកស្រី សោម៉ាវត្តី បានច្រានចោល និងបានបញ្ជាក់ថា ជីវិតភរិយាស្វាមីរបស់នាងនៅតែមានទំនាក់ទំនងធម្មតា មិនដូចអ្វីដែលព័ត៌មានមួយចំនួនបានចុះផ្សាយឡើយ ហើយបច្ចុប្បន្នពួកនាងនៅតែរស់នៅជុំគ្នាដដែល។ "តាមពិតទៅ សម្រាប់សង្គមគ្រួសាររបស់ខ្ញុំបច្ចុប្បន្ននៅតែធម្មតា គឺអត់មានបញ្ហាអីកើតឡើងទេ...អីចឹងសម្រាប់ព័ត៌មានកន្លងមក ខ្ញុំសូមបដិសេធតែម្ដង"។

យ៉ាងណាក៏ដោយនាង ទទួលស្គាល់ថា ពួកនាងធ្លាប់ប៉ះគ្នាជាពាក្យសំដីម្ដងម្កាលរបៀបជាចានក្នុងរាវ អណ្ដាត និងធ្មេញ ប៉ុន្តែថា ពួកនាងអាចគ្រប់គ្រងស្ថានការណ៍បាន។ ទោះជាយ៉ាងនេះក្ដី នាងបន្ទោសថា ព័ត៌មានកន្លងមក ជាព័ត៌មានគ្មានមូលដ្ឋានច្បាស់លាស់ហើយថែមទាំងមិនស្រង់សំដីរបស់នាងទៀត ទើបជាហេតុធ្វើឲ្យព័ត៌មានកាន់តែរីកធំៗ។

ក្រៅពីហេតុផលថា ស្វាមីនាងមានស្រីថ្មីក្នុងសង្គមសិល្បៈ ដើមចមដែលនាំឲ្យមានការរាយការណ៍ព័ត៌មានមួយចំនួនកន្លងមក សោម៉ាវត្តី ប្រាប់ថា មកពីគេមិនសូវឃើញថា នាងមិនសូវបង្ហាញរូបភាពផ្អែមល្ហែមជាមួយគ្រួសារដូចមុននៅលើ Facebook។

បញ្ហានេះ តារាស្រីដដែលប្រាប់ថា នាងបានផ្លាស់ប្ដូរទម្លាប់លេងជាមួយបណ្ដាញទំនើបនេះហើយ។ "ឥឡូវខ្ញុំលេងដោយអត់ដាក់ Public ដូចមុនទេ គឺលេងតែជាមួយ Friend ពីរបីនាក់ប៉ុណ្ណោះ ព្រោះមានរូបក៏មានរឿង អត់រូបក៏មានរឿង អីចឹងខ្ញុំគិតថាសុខចិត្តអត់វិញគ្រាន់បើជាង"។

កន្លងទៅក៏មានព័ត៌មានថា នាងត្រូវឪពុកក្មេកដកសិទ្ធិគ្រប់គ្រងសណ្ឋាគារដែលជាចំណងដៃក្រោយរៀបការនៅខេត្តក្រចេះទៀត។ បញ្ហានេះ នាងក៏បដិសេធដូចគ្នាថា នាងសុំដកខ្លួនដោយខ្លួនឯង ព្រោះមិនមានពេលគ្រប់គ្រាន់ ផ្សំនឹងកិច្ចការនេះ លើសពីសមត្ថភាពនាងផង។

សុខ សោម៉ាវត្តី បានចូលរោងការជាមួយលោក ទូច ដាណារ៉ា ហៅ ពេជ្រ កូនប្រុសឯកឧត្ដម ទូច ណារ៉ុថ កាលពីឆ្នាំ ២០១៣។ មកទល់បច្ចុប្បន្ន មានកូនស្រីមួយអាយុ២ឆ្នាំកន្លះជាចំណងដៃ។ នាងថា មិនទាន់គិតគូរយកបុត្របន្ថែមទៀតទេ មុនពេលការងាររយាលជាងពេលបច្ចុប្បន្ន៕

អត្ថបទ៖ ទារិកា