អិន សុភិន លែងចង់ឮឈ្មោះ ដាលីស និង ប៉ែន ចំរុង ទៀតហើយ

2015-09-10 21:21:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីកើតមានបញ្ហាចាក់ស្រែះមិនចេះចប់មិនចេះហើយលោក អ៊ិន សុភិន ប្រាប់ថា លោកលែងចង់ឮឈ្មោះ ភិន សុដាលីស និង ប៉ែន ចំរុង ទៀតហើយ ពួកគេទាំងពីរចង់ធ្វើអ្វីលោកមិនខ្វល់ រឿងរ៉ាវទាំងនេះ លោកប្រាប់ថា មិនចង់ធ្វើការបកស្រាយទៀតទេ សុំទៅធ្វើការសម្ភាសន៍សាកសួរសាមីខ្លួនគេទាំងពីរចុះ។ លោក អ៊ិន សុភិន ថ្លែងក្នុងសន្និសីទកាសែត និងក្រុងពាលីរឿងថ្មីព្រឹកមិញនេះ។

"ខ្ញុំលែងចង់ឮឈ្មោះពួកគេហើយ ខ្ញុំបំភ្លេចចោល ខ្ញុំទុកសិទ្ធិឲ្យពួកគាត់ ខ្ញុំមិនចង់ឲ្យមានមតិមហាជនមួយចំនួនគិតថាខ្ញុំគៀបសង្កត់កូនពេកទេ។ បន្ទាប់ពីឡើងតុលាការរួចមក ដាលីស វិលមកផ្ទះធម្មតាចេញចូលទៅធ្វើការងារគេ ខ្ញុំមិនបានសួរនាំអ្វីនោះទេ"។

ចាងហ្វាងផលិតកម្មមហាហង្សបានប្រាប់ថា បន្ទាប់ពីឈប់គិតរឿងកូនស្រីមក លោកមានអារម្មណ៍ស្រស់ស្រាយជាងមុន។ លោកបន្តថា រឿងរ៉ាវចុងក្រោយដែល ដាលីស និង ចំរុង ជ្រើសរើសយកវិធីស្រលាញ់គ្នាតាមគំនិតរៀងៗខ្លួនទុកឲ្យមហាជនជាអ្នកវាយតម្លៃចុះ។

"ចង់ឥឡូវគាត់ធ្វើអ្វីក៏ធ្វើទៅ ចាប់តាំងពីថ្ងៃនេះ ខ្ញុំលែងពាក់ព័ន្ធជាមួយពួកគាត់ ខ្ញុំសប្បាយចិត្តច្រើនជាងមុន មិនដូចពីមុន។ ខ្ញុំមានពេលវេលាគិតរឿងការងារដែលខ្ញុំត្រូវបំពេញ ពីមុនខ្ញុំមានតួនាទីជាឪពុកជួយរៀបចំជីវិតរបស់កូន ប៉ុន្តែអ្វីទាំងអស់មិនបានដូចចិត្ត អីចឹងមានតែបណ្ដោយតាមសិទ្ធិពួកគេចុះ" ។ អិន សុភិន បន្ថែម។

យ៉ាងណាជាមួយគ្នានេះ ម្ចាស់ផលិតកម្មខាងលើ បានបកស្រាយបន្ថែមពីព័ត៌មានមួយចំនួនថា រូបលោក និងគ្រួសារខាង ប៉ែន ចំរុង គិតគូរថ្ងៃខែរៀបការនោះមិនមែនជាការពិតទេ។ អ៊ិន សុភិន ថ្លែងថា លោកមិនបានដឹង និងនិយាយជាមួយគ្រួសារ ចំរុង លើបញ្ហានោះទេ។

“ ដូចខ្ញុំបាននិយាយខាងលើអីចឹងថា ខ្ញុំលែងខ្វល់ និងមិនចង់ឮឈ្មោះពួកគេទេ ហើយរឿងរៀបការថ្ងៃណា ខ្ញុំក៏មិនបានដឹងដែរ គ្រួសារខាង ចំរុង គេគិតអ្វីខ្ញុំក៏មិនបានទទួលដឹងឮអ្វីមកដែរ"។ សុភិន បញ្ជាក់។

មកដល់ពេលនេះ រឿងរ៉ាវរវាង ប៉ែន ចំរុង និង ភិន សុដាលីស នៅតែមិនទាន់អាចសុំការបកស្រាយពីសាមីខ្លួនទាំងពីរបានទេ។ រាល់លេខទូរសព្ទរបស់ អ្នកទាំងពីរ ត្រូវបានអ្នកដទៃលើកជំនួស និងជួនកាល Call ចូលប៉ុន្តែគ្មានអ្នកលើក៕