ប្រវត្តិខ្លះៗរបស់តួ Minho តារាកូរ៉េក្នុងរឿងហូលីវូដ "The Maze Runner”

2015-09-15 13:05:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តមួយចំនួនចាប់អារម្មណ៍ខ្លាំងចំពោះតួអង្គជនជាតិកូរ៉េមួយរូបឈ្មោះថា Minho ក្នុងរឿងហូលីវូដ “The Maze Runner"។ បុរសអាស៊ីរូបនេះធ្លាប់បានសម្ដែងនិងជាតួអង្គសំខាន់ក្នុងក្នុងរឿង “The Maze Runner” ទាំងពីរវគ្គ។ តើតារាសម្ដែងកូរ៉េរូបនេះមានប្រវត្តិផ្ទាល់ខ្លួនយ៉ាងណាខ្លះ?

ជីវិតឯកជន និងការសិក្សា

Minho មានឈ្មោះពិតគឺ Lee Ki Hong កើតនៅថ្ងៃទី ៣០ ខែ កញ្ញា ឆ្នាំ ១៩៨៦ ក្នុងទីក្រុងសេអ៊ូលប្រទេសកូរ៉េខាងត្បូង (បច្ចុប្បន្នមានអាយុ ២៨ឆ្នាំ)។ នៅពេល Lee អាយុ៦ឆ្នាំ គ្រួសាររបស់គេបានប្ដូរទីលំនៅទៅរស់នៅទីក្រុង Auckland ប្រទេសនូវែលហ្សេឡង់ ដែលជាទីកន្លែងដែលគេចាប់ផ្ដើមរៀនភាសាអង់គ្លេសដោយខ្លួនឯងដំបូង។ ឈានចូលអាយុ៨ឆ្នាំ គ្រួសាររបស់គេបានចាកចេញពីប្រទេសនូវែលហ្សេឡង់ទៅរស់នៅទីក្រុង Los Angeles រដ្ឋ Californiaសហរដ្ឋអាមេរិកវិញ។ Lee ធ្លាប់សិក្សានៅសកលវិទ្យាល័យ University of California, Berkeley នៅរដ្ឋ California ពីឆ្នាំ២០០៤ ដល់ ២០០៨។ ក្រោយបញ្ចប់ការសិក្សាតារារូបនេះបានចូលធ្វើការនៅភោជនីយដ្ឋានរបស់ឪពុកម្ដាយរបស់ខ្លួន។ នៅថ្ងៃទៅ ៧ ខែមិនា ឆ្នាំ ២០១៥ Lee បានរៀបការជាមួយ Hayoung Choi ដែលធ្លាប់ជាតួគូស្នេហ៍ក្នុងរឿងខ្លី "She Has a Boyfriend" ជាមួយគ្នា។

អាជីពក្នុងសិល្បៈ

Lee ចេះសម្ដែងតាំងពីរៀនថ្នាក់វិទ្យាល័យ។ នៅឆ្នាំ២០១០ Lee ត្រូវបានកម្មវិធីទូរទស្សន៍ផ្សេងៗជាច្រើនអញ្ជើញឲ្យចូលរួមជាភ្ញៀវកិត្តិយសដូចជាកម្មវិធី Victorious, The Secret Life of the American Teenager និង Modern Family មុនពេលគេក្លាយជាតួឯកក្នុងភាពយន្ត "The Nine Lives of Chloe King” ។ នៅឆ្នាំ២០១២ Lee បានសហការជាផលិតកម្ម Wong Fu Productions (WFP) ក្នុងការថតវីដេអូខ្លីៗចំនួន៥ ដូចជាវីដេអូដែលមានចំណងជើងថា “Away We Happened mini-series “ជាដើម។ នៅថ្ងៃទី ២៦ ខែ មិថុនា ឆ្នាំ ២០១៤ Lee បានប្រកាសសម្ដែងក្នុងរឿង “Everything Before Us” របស់ផលិតកម្ម (WFP) ម្ដងទៀត។

ឈានចូលដល់ថ្ងៃទី១៨ ខែ មេសា ឆ្នាំ ២០១៣ អ្នកដឹកនាំរឿងអាមេរិកលោក Wes Ball បានប្រកាសនៅលើបណ្ដាញសង្គម Twitter ថា Lee នឹងក្លាយជាតួអង្គសម្ដែងឈ្មោះ Minho ក្នុងរឿងវិទ្យាសាស្ត្រប្រឌិត "The Maze Runner” ដែលចូលរួមដោយតារាហូលីវូដវ័យក្មេងជាច្រើនដូចជា Dylan O'Brien, Kaya Scodelario, Will PoulterនិងThomas Brodie-Sangster។ ភាពយន្តនេះនឹងចេញវគ្គ ៣បន្តទៀតនៅខែកុម្ភៈ ឆ្នាំ២០១៧ ដោយមានចំណងជើងថា "Maze Runner: The Death Cure" ៕