បន្ទាប់ពីកក្រើកនៅខ្មែរ ឥឡូវ ONE FC នឹងកក្រើកនៅសង្វៀនម៉ាឡេស៊ីថ្ងៃស្អែក

2014-10-17 00:02:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ONE FC បានប្រកាសថា កីឡាករទាំងអស់បានមកជួបជុំគ្នាដើម្បីធ្វើការថ្លឹងទម្ងន់រួចរាល់ហើយ សម្រាប់ការប្រកួតនៅល្ងាចថ្ងៃស្អែកនេះ នៅកីឡាដ្ឋាន Putra ទីក្រុងកូឡាឡាំពួរ ប្រទេសម៉ាឡេស៊ី។

បន្ទាប់ពីធ្វើឲ្យកក្រើកសង្វៀននៅសាលមហោស្រពកោះពេជ្រ កាលពីខែកញ្ញាទៅ កម្មវិធីប្រដាល់ទ្រុងដ៏ល្បីប្រចាំទ្វីបអាស៊ី ONE FC នឹងបន្តការប្រកួតធ្វើឲ្យរញ្ជួយដល់ទីក្រុងកូឡាឡាំពួរ នាថ្ងៃទី១៧ ខែតុលាថ្ងៃស្អែកនេះ។

គូប្រកួតសំខាន់ប្រចាំព្រឹត្តិការណ៍កីឡាវៃដាក់ទ្រុងពីររូប(main event stars)ដែលនឹងចូលខ្លួនមកអង្រួនសង្វៀននៅថ្ងៃស្អែកនេះ ក្នុងទម្ងន់ក្រោម៦៦គីឡូក្រាម គឺកីឡាករសញ្ជាតិអូស្ត្រាលី Rob Lisita ទម្ងន់៦៥,៧៧គីឡូក្រាម ប៉ះជើងខ្លាំងរុស្ស៊ី Marat Gafurov ដែលមានទម្ងន់ស្មើគ្នាតែម្ដង។

ថ្លែងប្រាប់អ្នកយកព័ត៌មាន sabay កាលពីព្រឹកមិញនេះ កីឡាករមុខអំណាចមាឌមាំ Lisitaថា ៖ «ខ្ញុំនឹងបង្ហាញសមត្ថភាពពិសេសរបស់ខ្ញុំ ឲ្យអ្នកទាំងអស់គ្នាបានឃើញ។ គ្រប់គ្នាធ្លាប់ដឹងហើយថា រូបខ្ញុំ ជាកីឡាករដែលវ៉ៃគ្មានប្រណី ហើយខ្ញុំនឹងធ្វើឲ្យកាន់តែសាហាវនៅថ្ងៃស្អែកនេះ។ ខ្ញុំប្ដេជ្ញាហើយថា ខ្ញុំនឹងយកតំណែងជើងឯកក្នុងកម្មវិធី ONE FC ឲ្យបាន»។

សម្រាប់កីឡាករ Marat Gafurov វិញបានលើកឡើងនៅចំពោះមុខដៃគូប្រកួតរបស់ខ្លួនដែរថា ៖ «ខ្ញុំរីករាយមែនទែន ដែលបានចូលរួមប្រកួតនៅក្នុងកម្មវិធី ONE FC នេះ។ Rob គឺជាគូប្រកួតដែលខ្ញុំពិបាកនឹងផ្ដួល ប៉ុន្តែខ្ញុំគិតថា នេះជាការផ្គូផ្គងដ៏ស័ក្តិសមបំផុត»។

កម្មវិធីប្រកួតដាក់ទ្រុងក៏ធំប្រចាំទ្វីបអាស៊ី ដែលចាប់ផ្ដើមនៅថ្ងៃទី១៧ តុលាស្អែកនេះ មានគូប្រកួតទាំងអស់ចំនួន៩គូ ក្នុងនោះមានស្រី១គូផងដែរ។ ចង់ដឹងថា ការប្រកួតកីឡាក្នុងទ្រុងដ៏ធំប្រចាំនៅទ្វីបអាស៊ីមួយនេះយ៉ាងណា សូមធ្វើការតាមដានបន្តនៅថ្ងៃស្អែកនេះ ក្រុមការងារ sabay នឹងធ្វើការរាយការណ៍ផ្ទាល់ពីប្រទេសម៉ាឡេស៊ី៕