បេក្ខភាព Cambodian Idol ម៉ៅ ហាជី៖ "ខ្ញុំមិនមែនជាមនុស្សវាយឫកទេ"

2015-09-22 16:54:18
ចំនួនមតិ 0 | ចំនួនចែករំលែក 0

ចន្លោះមិនឃើញ

បេក្ខជនលេចធ្លោជាងគេក្នុងកម្មវិធី Cambodian Idol ម៉ៅ ហាជី ថា ទោះជាគេនិយាយយ៉ាងមិចក៏ដោយ ក៏លោកមិនខឹងដែរ។ តែលោកសូមបដិសេធថាខ្លួនមិនមែនជាមនុស្សអួតក្អេងក្អាងច្រងេងច្រងាងដូចគណនី Facebook យកទៅ Troll ទេ ហើយលោកស្អប់មនុស្សវាយឫកនេះខ្លាំងណាស់។

ហាជី ប្រាប់មកកាន់ Sabay ថា៖ "ទោះបីជាគាត់យករូបខ្ញុំទៅ Troll ចឹងក៏ដោយ ក៏ខ្ញុំមិនបានអាក់អន់ស្រពន់ចិត្ត ឬខឹងនឹងពួកគាត់អីដែរ តែរឹតតែមានកម្លាំងចិត្តលើសដើម ព្រោះមានអ្នកគាំទ្រ និងលើកទឹកចិត្តដល់ខ្ញុំកាន់តែច្រើន។”

បេក្ខជនដែលធ្វើឲ្យលោក ណុប ប៉ាយ៉ារិទ្ធ ជាគណៈកម្មការយកសំបុត្រទៅជូនផ្ទាល់ក្នុងវគ្គ Judge audition រូបនេះបានបន្តទៀតថា មិនត្រឹមតែមិនខឹងស្អប់នោះទេ លោកថែមទាំងគ្មានគំនិតសង្ស័យចំពោះនរណាម្នាក់ទេ។ "ធម្មតាទេអូន យើងជាបេក្ខជនចឹងតែងមានអ្នកស្អប់អ្នកស្រលាញ់ហើយ ហើយបងក៏គ្មានគំនិតដាក់ការសង្ស័យថាអ្នកណាជាអ្នកធ្វើទេ បើគេចង់ធ្វើអីធ្វើនឹងទៅ។ ម៉្យាងវិញទៀតអ្នកដែលធ្វើបែបនោះប្រហែលជាគណនី Facebook ក្លែងក្លាយទេ។”

កំលោះសង្ហាដែលមានស្រុកកំណើតនៅខេត្តបាត់ដំបងខាងលើបានថ្លែងអរគុណដល់ទស្សនិកជនដែលបានជួយគាំទ្ររូបលោករហូតមក និងបានបញ្ជាក់ថាលោកមិនមែនជាមនុស្សវាយឫកទេ អ្នកធ្លាប់ស្គាល់ ឬបានជួបនៅខាងក្រៅប្រាកដជាដឹងច្បាស់ពីអត្តចរិតលោកហើយ។

“សូមបងប្អូនជឿចុះខ្ញុំមិនមែនជាមេអួតក្អេងក្អាងច្រងេងច្រងាងឡើយ ទោះជាប់ឬមិនជាប់ ហើយបើទោះជាថ្ងៃមុខខ្ញុំមានមុខមាត់ក៏ខ្ញុំមិនផ្លាស់ប្ដូរអត្តចរិតពីកំណើតដែរ ណាមួយខ្ញុំស្អប់មនុស្សវាយឫកខ្លាំងណាស់។”

កាលពីថ្ងៃ អាទិត្យ សប្ដាហ៍មុនមានគណនី Facebook មួយបានកាត់ត និង រៀបរាប់ពីឈ្មោះបេក្ខជន បីនាក់ ដែលពីរនាក់ គឺគេគាំទ្រ និង បេក្ខជនម្នាក់ទៀតដែលជារូប ម៉ៅ ហាជី បែរជាបន្តុះបង្អាប់ទៅវិញ៕

អត្ថបទ៖ទ្រី រ៉ាវី រូបភាព៖ Facebook