យុន ស្រីកែវ ជាប់និទ្ទេស A តែគ្មានលទ្ធភាពរៀនជំនាញដែលនាងពេញចិត្ត

2015-09-23 15:57:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ មានទំព័រហ្វេសប៊ុកមួយបានបង្ហោះថា យុន ស្រីកែវ ជាសិស្សឆ្នើមជាប់និទ្ទេស A មានបំណងចង់លក់ថែបប្លែតដែលជាអំណោយរបស់ សម្តេចហ៊ុន សែន យកទៅលក់ដើម្បីបន្តការសិក្សារបស់នាង។ ភ្នាក់ងារ Sabay ប្រចាំខេត្តកំពតបានទាក់ទងទៅសាម៉ីខ្លួន ដើម្បីឲ្យនាងបកស្រាយលើបញ្ហានេះ។

ឆ្លើយរាងស្ទាក់ស្ទើបន្តិច ស្រីកែវ បានប្រាប់ថា នាងពិតជាមានបំណងលក់វាមែន តែនាងមិនទាន់លក់វាទេ ព្រោះនាង ហាក់ដូចជាមិនដាច់ចិត្តសោះ ដោយសារតែវាជារបស់ដ៏មានតម្លៃមួយដែលជាអំណោយរបស់សម្តេចបានផ្តល់ដល់នាង។ ស្រីកែវបន្តថា នាងនឹងមានប្រាក់ខ្លះបើនាងលក់វា អាចឲ្យនាងដោះស្រាយជីវភាពបានមួយរយៈដែរបើនាងទៅរៀននៅភ្នំពេញ។ នាងបន្ថែមទៀតថា នាងមានបំណងមួយ គឺចង់ក្លាយខ្លួនគ្រូពេទ្យដ៏ចំណានម្នាក់ ដើម្បីជួយព្យាបាលដល់មនុស្សទូទៅ ជាពិសេសអ្នកក្រីក្រដូចជាក្រុមគ្រួសារនាងផ្ទាល់ និង អ្នកភូមិឯទៀត ។

ឪពុកស្រីកែវ លោកវៀច យាល បានសម្ដែងអារម្មណ៍សប្បាយរីករាយនៅពេលដែលនាងប្រឡងបាននិទ្ទេសល្អ និង មោទនភាពណាស់ គាត់សោកស្តាយដែលគាត់គ្មានប្រាក់ដើម្បីឲ្យកូនរៀនទៅតាមបំណងប្រាថ្នារបស់នាងបាន។

ស្រីកែវ រៀបរាប់ថា នាងប្រហែលជានឹងបោះបង់បំណងប្រាថ្នារបស់នាងហើយទៅរៀនជំនាញមួយផ្សេងវិញ ព្រោះនាងគ្មានលទ្ធភាពទៅបង់សាលា ដែលមានតម្លៃខ្ទង់ពាន់ដុល្លារក្នុងមួយឆ្នាំនោះទេ។

មេភូមិត្រពាំងបឹង លោក ជន ឌុយ មានប្រសាសន៍ថា ស្រីកែវ គឺជា ក្មេងស្លូតបូត សុភាពរាបសារ និងជាអ្នកខិតខំសង្វាតក្នុងការសិក្សា ព្រមទាំងចេះជួយធ្វើការផ្ទះសម្បែង។ គ្រួសារ ស្រីកែវ គឺជាគ្រួសារក្រីក្រ ពួកគេគ្មានទ្រព្យមានតម្លៃអ្វីទេ ក្រៅពីជម្រកផ្ទះ ដែលអ្នកមិនដឹង គឺគិតថាគ្នាគ្រាន់បើ។ ផ្ទះនេះគ្មានម៉ូតូជិះនឹងគេទេ មានតែកង់ពីរជាយាន្តជំនិះ។ តាមមើលជាក់ស្តែង បំណងដែលនាងថា ចង់ទៅរៀនពេទ្យនោះប្រហែលជាមិនអាចកើតឡើងបានទេ ព្រោះរៀនពេទ្យត្រូវការលុយបង់សាលាច្រើន រយៈពេលសិក្សាក៏វែង តែបើមានគេជួយជាអាហាររូបករណ៏អាចរៀនបាន។

សូមបញ្ជាក់ថា យុន ស្រីកែវ គឺជា សិស្សទី១ ដែលប្រឡងជាប់និទ្ទេសA នៅវិទ្យាល័យហ៊ុនសែនឈូក។ ស្រីកែវ មានប្អូនស្រីម្នាក់រៀនថ្នាក់ទី២ ហើយបច្ចុប្បន្ននាងមានទីលំនៅភូមិត្រពាំងបឹង ឃុំត្រមែង ស្រុកឈូក ខេត្តកំពត៕