មុខងារពិសេសៗមួយចំនួនដែលគេបានបំពាក់លើរថយន្ត Prius ស៊េរី ២០១៦

2015-09-23 23:18:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Toyota ទើបតែបានបង្ហាញជាផ្លូវការនូវវត្តមានរបស់រថយន្ត Prius ស៊េរី ២០១៦ កាលពីពេលថ្មីៗនេះ ដោយមានការរចនារូបរាងស្អាតប្លែកពីម៉ូដែលមុន ហើយក្នុងនោះក៏មានបំពាក់នូវបច្ចេកវិទ្យាពិសេសៗមួយចំនួនផងដែរ។

ខាងក្រោមនេះគឺជាមុខងារដែលមានបំពាក់លើរថយន្ត Toyota Prius ស៊េរី ២០១៦៖

-មុខងារ Pre-Collision and Pedestrian Detection៖

មុខងារនេះអាចបញ្ចៀសការប៉ះទង្គិចគ្នាជាមួយនឹងរថយន្ត ក៏ដូចជាអ្នកថ្មើរជើងដែលនៅខាងមុខ ខណៈពេលកំពុងបើកបរបាន។ កាមេរ៉ាដែលបានបំពាក់នៅផ្នែកខាងមុខរថយន្តនឹងធ្វើការត្រួតពិនិត្យការប៉ះទង្គិចដែលអាចកើតមានឡើង ហើយវានឹងផ្ដល់ដំណឹងដល់អ្នកបើកបរដោយសំឡេង។ ហើយប្រព័ន្ធក៏នឹងជួយបង្កើនកម្លាំងប្រាំងដើម្បីទប់ស្កាត់ការប៉ះទង្គិច។

-មុខងារ Lane Departure Alert៖

មុខងារនេះអាចជួយឲ្យការបើកបររថយន្តស្ថិតនៅចំគំនូសផ្លូវបានត្រង់ល្អ ប្រសិនបើបើកបរចេញពីគំនូសផ្លូវនោះប្រព័ន្ធនឹងផ្ដល់ជាសញ្ញាដល់អ្នកបើកបរ។

-មុខងារ Automatic High Beam៖

មុខងារនេះនឹងធ្វើការផ្លាស់ប្ដូរប្រភេទភ្លើងហ្វាឡានដោយស្វ័យប្រវត្តិ នៅពេលបើកបរពេលយប់វានឹងដំណើរការភ្លើងហ្វាដែលខ្ពស់អាចមើលឃើញផ្លូវបានច្បាស់ល្អ។ ហើយប្រសិនបើមានរថយន្តបើកបរនៅខាងមុខនោះប្រព័ន្ធនឹងផ្លាស់ប្ដូរទៅជាភ្លើងហ្វាទាបវិញ ដើម្បីកុំឲ្យចាំងភ្នែកអ្នកដទៃ។

-មុខងារ Brake Assist៖

មុខងារនេះនឹងចាប់យកការជាន់ប្រាំងនៅពេលជួបប្រទះគ្រោះថ្នាក់បានដោយផ្ដោតទៅលើ កម្លាំងដែលជាន់ប្រាំង និងល្បឿនដែលអ្នកបើកបរដាក់ជើងជាន់ប្រាំងលឿនប៉ុណ្ណា។ នៅពេលដែលប្រព័ន្ធចាប់បានហើយ វានឹងជួយបង្កើនកម្លាំងជាន់ប្រាំងឲ្យខ្លាំងជាងមុន។

-មុខងារ Cruise Control៖

មុខងារនេះគឺប្រើប្រាស់សម្រាប់កំណត់ល្បឿនថេរមួយនៅពេលបើកបរ។ ឧទាហរណ៍ថាអ្នកបានកំណត់ល្បឿន៣០គ.ម/ម៉ នោះរថយន្តនឹងធ្វើការបើកទៅមុខដោយខ្លួនឯងក្នុងល្បឿនដែលបានកំណត់ ហើយអ្នកមិនចាប់បាច់យកជើងជាន់ហ្គែរនោះទេ។

-មុខងារ Engine Immobilizer៖

នេះជាមុខងារមួយដែលអាចការពាររថយន្តពីការលួចបាន។ នៅពេលដែលអ្នកចូលទៅក្នុងរថយន្តដោយមានកាន់សោរថយន្ត រួចចុចប៊ូតុង Power នោះប្រព័ន្ធនឹងធ្វើការពិនិត្យមើលលេខកូដនៅលើសោថាតើដូចគ្នាទៅនឹងលេខកូដរបស់រថយន្តដែរឬទេ។ ប្រសិនបើលេខកូដស៊ីគ្នានោះអ្នកអាចបញ្ឆេះម៉ាស៊ីនឡានបាន។ មុខងារនេះនឹងដំណើរការដោយខ្លួនឯងនៅពេលពន្លត់ម៉ាស៊ីនឡាន និងទ្វាររបស់តៃកុងឡានបើកចំហ។

-មុខងារ Tire Pressure Monitoring៖

វាជាប្រព័ន្ធអេឡិចត្រូនិកមួយដែលអាចត្រួតពិនិត្យសម្ពាធខ្យល់នៃកង់រថយន្តបាន ហើយវានឹងផ្ដល់សញ្ញាដល់អ្នកបើកបរនៅពេលដែលកង់រថយន្តធូរ៕

ចុចអាន៖ Toyota Prius ២០១៦ ចេញហើយ រាងប្លែកថ្មី ស៊ីសាំងកាន់តែតិចជាងមុន

ប្រែសម្រួល៖ ហៃ សុខហេង ប្រភព៖ DigitalTrends