អ៊ុន សិទ្ធា បង្ហើបរឿងលួចស្រលាញ់នារីម្នាក់កាលរៀនវិទ្យាល័យ

2015-09-28 16:59:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្តែងសម្បុរស្រអែម អ៊ុន សិទ្ធា ទម្លាយអាថ៌កំបាំងប្រាប់ Sabay ថាកាលនៅរៀនវិទ្យាល័យបានលួចស្រលាញ់នារីម្នាក់ ប៉ុន្តែពេលនេះនាងបានរៀបការទៅរស់នៅបរទេសបាត់ហើយ។

“ បងធ្លាប់លួចស្រលាញ់នារីម្នាក់កាលនៅរៀនវិទ្យាល័យ ប៉ុន្តែពេលនោះបានត្រឹមខកចិត្តព្រោះ គេមិនបានទទួលក្ដីស្រលាញ់ពីបងទេ គឺបានត្រឹមតែជាលក្ខណៈមិត្តភក្តិប៉ុណ្ណោះអូន"។ សិទ្ធា ថ្លែង។

ពន្លកនៃការសារភាពស្នេហ៍របស់ សិទ្ធា គឺតាមរយៈការសរសេរសំបុត្រនៅថ្ងៃបូណ្យណូអែល ពេលនោះលោកបានរៀបរាប់ពីទំហំចិត្តដែលបានស្រលាញ់មិត្តរួមថ្នាក់របស់ខ្លួន តែទីបញ្ចប់បានត្រឹមតែអន់ចិត្តព្រោះនាងជានារីដែលគិតតែពីការសិក្សាមិនបានយកចិត្តទុកដាក់នឹងរឿងស្នេហាឡើយ។ នេះបើតាមការលើកឡើងរបស់ សិទ្ធា។

"ពេលដែលបងសារភាពស្រលាញ់គាត់លើកដំបូង បងបានសរសេរលើកាតមួយដែលពេលនោះចំថ្ងៃបុណ្យណូអែលឲ្យទៅគាត់ ។ អារម្មណ៍ពេលនោះបងអន់ចិត្តខ្លះដែរ ព្រោះបងបានព្យាយាមសារភាពស្រលាញ់ និងធ្វើអ្វីៗដើម្បីឲ្យគាត់ទទួលយកប៉ុន្តែការទទួលរបស់គាត់មិនមែនក្នុងន័យស្នេហានោះទេ គ្រាន់តែជាមិត្តភាពប៉ុណ្ណោះ។ សិទ្ធា បន្ថែម។

សិទ្ធា បន្តថា លោក និងអតីតនារីមិត្តរួមថ្នាក់ម្នាក់នោះ មិនមែនទើបតែស្គាល់គ្នានៅវិទ្យាល័យនោះទេ អ្នកទាំងពីរធ្លាប់បានរៀនជាមួួយគ្នាតាំងពី បឋមសិក្សា មកម្ល៉េះ។ ដោយសារតែឃើញនាង ស្អាត សុភាព ទើបធ្វើឲ្យលោកបាក់ចិត្តស្រលាញ់លើនាងតែម្ដង គឺយូរណាស់មកហើយ។ ប៉ុន្តែទើបតែចូលមកដល់ថ្នាក់វិទ្យាល័យទើប សិទ្ធា ហ៊ានសារភាពសុំស្រលាញ់ លទ្ធផល លោក បានត្រឹមតែការខកចិត្ត។

តារាសម្ដែង អ៊ុន សិទ្ធា មិនត្រឹមតែជាតារាសម្ដែងដែលមានប្រជាប្រិយភាពប៉ុណ្ណោះទេ លោកក៏ជាអ្នកមានស្នាដៃខាងសិល្បៈគំនូរផងដែរ។ អតីតប្រុសស្អាត បន្តទៀតថា ការងាររាល់ថ្ងៃនេះរវល់រកពេលសម្រាកគ្មាន ដូច្នេះគ្មានពេលគិតគូរឿងស្នេហាឡើយ ។ ម្យ៉ាងនារីដែលលោកធ្លាប់ស្រលាញ់ទៀតសោត ក៏រៀបការទៅរស់នៅបរទេសបាត់ទៀត ទើបធ្វើឲ្យលោកហាក់នៅរអាចំពោះការបរាជ័យស្នេហ៍លើកដំបូងនោះនៅឡើយ៕

អត្ថបទ៖ ថា ម៉ាលីដា