ព្រាប សុវត្ថិ ថាចង់ចាប់ដៃគូជាមួយអ្នកស្រី ហ៊ឹម ស៊ីវន ជាថ្មី!

2015-09-28 16:37:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ខុសពីសប្ដាហ៍មុនៗ ក្នុងវគ្គ Live Show សប្ដាហ៍ទី៤ របស់កម្មវិធី Cambodian Idol យប់មិញនេះ មានការអញ្ជើញចូលរួមពីសំណាក់តារាចម្រៀងស្រីជើងចាស់ដែលមានទឹកដមសំឡេងស្រទន់អ្នកស្រី ហ៊ឹម ស៊ីវន ជាតារាកិត្តិយស។ វត្តមានតារាចម្រៀងជើងចាស់រូបនេះ មិនត្រឹមតែជាតារាកិត្តិយសប៉ុណ្ណោះទេ តែថែមទាំងជាគ្រូបង្វឹករបស់បេក្ខជនទាំង ៨ នាក់ទៀតផង។ អ្វីដែលកាន់តែរំភើបក្នុងវេលានោះគឺ អ្នកស្រី បានច្រៀងឆ្លើយឆ្លង ជាមួយលោក ព្រាប សុវត្ថិ ហើយកំពូលតារាច្រៀង ខាងលើបាននិយាយថាចង់ចាប់ដៃគូជាមួយអ្នកស្រី ហ៊ឹម ស៊ីវន ម្ដងទៀត។

កម្មវិធីទាំងមូល មានសំឡេងហ៊ោរកញ្ច្រៀវពីសំណាក់ទស្សនិកជនបន្ទាប់ពីពិធីករទាំងពីរសួរចំណាប់អារម្មណ៍របស់លោក ព្រាប សុវត្ថិ ពីវត្តមានរបស់អ្នកស្រី តែលោកបែរជាបង្ហើរសំនៀងចម្រៀងមួយបទ "ផ្ដើមស្នេហ៍ជាថ្មី” ដែលជាចម្រៀងចាស់អ្នកទាំងពីរតាំងពីជាង ១០ ឆ្នាំមុនម្ល៉េះ។

ជាពិសេសជាងនេះទៅទៀត កំពូលតារាចម្រៀងប្រុសប្រចាំប្រទេសកម្ពុជាលោក ព្រាប សុវត្ថិ បាននិយាយថា"ពេលណាមួយ ថ្ងៃណាមួយខ្ញុំនឹងរកពេលវេលាដើម្បីជួបជុំគ្នា នឹងឲ្យសំឡេងពួកយើងទាំងពីរនាក់ចែកជូនដល់បងប្អូនទស្សនិកជនស្ដាប់ម្ដងទៀត។”

ម្ចាស់បទ "ខ្លុយស្នេហ៍ត្នោតទេរ" បានឲ្យដឹងទៀតថា ក្នុងរាត្រីនោះ លោកពិតជាមានអារម្មណ៍រំភើប សប្បាយរីករាយ ឡើងញ័រមាត់អស់ហើយ ព្រោះមិនបានជួបគ្នាជាយូរមកហើយ។ ចំណែកឯខាងអ្នកស្រី ហ៊ឹម ស៊ីវន វិញក៏បានឲ្យដឹងថា "បទនេះបេក្ខជនពួកគាត់ច្រៀងរួចហើយ ហើយខ្ញុំចង់ច្រៀងបទ បេះដូងអើយបេះដូងតាមផ្សងរកម្ចាស់ស្នេហា តែអូន វត្ថិ អត់ចាំ (សើចទាំងអស់គ្នា)។”