ស្នេហាជាអ្វី?
- 2015-10-05 16:17:45
- ចំនួនមតិ 0 | ចំនួនចែករំលែក 0
ស្នេហាជាអ្វី?
ចន្លោះមិនឃើញ
អត្ថបទខាងក្រោមនេះជាការចែករំលែករបស់ប្រិយមិត្ត Sabay ម្នាក់ជុំវិញអត្ថន័យនៃពាក្យថា «ស្នេហា»។ ចង់ដឹងស្នេហាមានអត្ថន័យយ៉ាងណា សូមអានការបកស្រាយខាងក្រោម។
មនុស្សច្រើនណាស់នៅតែមានចម្ងល់ចំពោះសំណួរមួយនេះ តែតាមពិតទៅស្នេហាគ្មានអត្ថន័យពិតប្រាកដនោះទេ គឺវាមានន័យទៅតាមមនុស្សជាអ្នកអោយនិយមន័យដល់វាផ្សេងៗគ្នា។ វាប្រៀបបានទៅនឹងទឹកដែលគេសួរថាតើទឹកមានរាងដូចម្ដេច? វាពិតណាស់វាគឺគ្មានចម្លើយពិតប្រាកដនោះទេ គឺវាប្រែប្រួលទៅតាមរបស់ដែលផ្ទុកវានោះឯង។ ចំពោះស្នេហាក៏ដូចគ្នា វាត្រូវបានអោយនិយមន័យផ្សេងៗគ្នាទៅតាមអ្នកដែលមានបទពិសោធន៍ចំពោះរឿងនេះ អាស្រ័យទៅតាមអ្នកឲ្យនិយមន័យថាពួកគាត់ជា មនុស្សសាមញ្ញ ឬអ្នកប្រាជ្ញបណ្ឌិត។
បើតាមអ្នកប្រាជ្ញបណ្ឌិតបានអោយតម្រុយថា ស្នេហាគឺមានបីដំណាក់កាលទី១ គឺដំណាក់កាលស្វែងយល់ ទី២ គឺដំណាក់កាលធ្វើសកម្មភាព និងទី៣ គឺដំណាក់កាលទទួលខុសត្រូវ។
ទី១ ដំណាក់កាលស្វែងយល់ គឺជាដំណាក់កាលនៃការចាប់ផ្ដើមស្គាល់គ្នា ស្វែងយល់ពីគ្នាទាំងរឿងខាងក្រៅ និងរឿងខាងក្នុងរបស់ដៃគូស្នេហា។ ខាងក្រៅគឺសំដៅដល់រឿងរ៉ាវដែលកើតឡើងនៅខាងក្រៅខ្លួនរបស់គេដូចជា ទំនាក់ទំនង ការសិក្សារៀនសូត្រ បងប្អូន ក្រុមគ្រួសារ ការរៀបចំខ្លួន ។ល។ ឯខាងក្នុងគឺសំដៅដល់អ្វីៗដែលកើតចេញពីក្នុងខ្លួនរបស់គេ ដូចយើងមិនអាចមើលឃើញនឹងភ្នែកទទេបាន ដូចជាការស្រលាញ់របស់គេចំពោះយើង មនោសញ្ចេតនារបស់គេចំពោះយើងនិងអ្នកដទៃ ចំណោះដឹង ។ល។ ចំពោះអ្នកខ្លះ គឺគេធ្វើការស្វែងយល់ពីដៃគូរបស់គេហើយអោយឃើញថាដៃគូរបស់គេមានលក្ខណៈគ្រប់គ្រាន់អាចទទួលយកបានហើយគឺមានន័យថាចំណុចដែលរៀបរាប់ខាងលើនេះវាល្អគ្រប់សព្វហើយទើបពួកគេបន្តទៅជាសកម្មភាពអោយដៃគូរបស់គេបានឃើញអំពីសេចក្ដីស្នេហារបស់គេចំពោះអ្នកដែលគេស្រលាញ់នោះ។ តែសម្រាប់អ្នកខ្លះវិញគឺ បើទោះជាគេធ្វើការស្វែងយល់ពីអ្នកដែលគេស្រលាញ់នោះហើយឃើញថា ម្នាក់នោះនៅមានចំណុចខ្វះខាត តែអាចនឹងបំពេញបន្ថែមបាន គឺថា បើទោះជាមានចំណុចខ្វះខាតក៏ដោយក៏គេនៅតែស្រលាញ់ហើយគេក៏បន្តទៅជាសកម្មភាព ហើយសកម្មភាពនោះទៀតសោតគឺសុទ្ធសឹងតែជាការផ្ដល់អោយដៃគូស្នេហារបស់គេអោយមានការរីកចម្រើនដើម្បីបំពេញនូវចន្លោះប្រហោងដែលគេបានស្វែងយល់ទៅឃើញថា គួរតែកែតម្រូវ៊។ មនុស្សទាំង២ប្រភេទនេះ មនុស្សប្រភេទទីមួយមានច្រើនណាស់ ឯប្រភេទទី២ គឺមានតិចណាស់នៅលើភពផែនដីយើងនេះ ។
ទី២ សកម្មភាព៖ ការផ្ដល់អោយគឺជាមូលដ្ឋានគ្រឹះដែលធ្វើឲ្យដៃគូស្នេហាមានសុភមង្គលជាមួយគ្នាបាន បើសិនណាជាដៃគូស្នេហា ពួកគេមានតែពាក្យថាទទួលបាននៅក្នុងចិត្តនោះគឺពិតណាស់ ស្នេហារបស់គេហ្នឹងមិនបានដល់ត្រើយនៃសុភមង្គលនោះឡើយពោលគឺនឹងមានតែភាពឈ្លោះប្រកែកគ្នាព្រោះតែភាពចង់បានរៀងៗខ្លួននេះឯង ។ សកម្មភាពត្រូវចេញពីចិត្តរបស់គេជាអ្នកបញ្ជា មិនមែនធ្វើតែសំបកក្រៅហើយក្នុងចិត្តផ្សេងនោះឡើយកុំអោយមានពាក្យថារូបភាពក្បត់ខ្លឹមសារ។ ចំពោះដំណាក់កាលនេះការអោយតម្លៃគ្នាទៅវិញទៅមករបស់ដៃគូស្នេហាគឺជារឿងល្អប្រសើរណាស់ដើម្បីអោយពួកគេបញ្ចៀសអោយបាននូវការខ្វែងគំនិតគ្នា ឬឈ្លោះប្រកែកគ្នាដែលបណ្ដាលមកពីការមើលស្រាលគ្នា ពួកគេមិនត្រូវមានសោះឡើយនូវភាពមានក្នុងមានក្រៅ មានភាពអាថ៌កំបាំងជាមួយគ្នា។ ភាពអធ្យាស្រ័យគ្នាក៏មានសារៈសំខាន់ខ្លាំងណាស់ដែរសម្រាប់សេចក្ដីស្នេហានៅដំណាក់កាលនេះ ពួកគេចេះអត់ឱនអោយគ្នាចំពោះរឿងដែលគួរអត់ឱន ចេះផ្ដល់ឱកាសអោយគ្នាដើម្បីធ្វើការកែតម្រូវនូវកំហុសឆ្គងដែលអាចកើតមានឡើងជាយថាហេតុ តែការផ្ដល់ឱកាសអោយគឺយើងអាចអោយបានតែរឿងដែលគួរផ្ដល់ឱកាសអោយតែប៉ុណ្ណោះ ចំពោះរឿងមួយចំនួនដូចជាការក្បត់គ្នាគឺថា វាមិនគួរលើកលែងអោយនោះទេ ព្រោះនេះជាកំហុសធ្ងន់ធ្ងរខ្លាំងណាស់។
ទី៣ ការទទួលខុសត្រូវ៖ គុណធម៌ដ៏ធំបំផុតរបស់មនុស្សគឺការទទួលខុសត្រូវ នៅក្នុងន័យនេះគឺមានពីរ ខណៈ គឺពាក្យថា ខុស និងពាក្យថាត្រូវ មានន័យថាដៃគូស្នេហាទាំងពីរពួកគេត្រូវតែទទួលយកនូវអ្វីដែលកើតឡើងទាំងខុសទាំងត្រូវនៃដំណើរជីវិតស្នេហារបស់ពួកគេ។ ជីវិតរបស់ពួកគេបានដើរនៅលើផ្លូវជាមួយគ្នាវាត្រូវតែកើតមានរឿងច្រើនទាំងខុស ទាំងត្រូវ ទាំងល្អ ទាំងអាក្រក់ដូច្នេះពួកគេត្រូវតែទទួលយកវាព្រោះនេះជាលទ្ធផលដែលកើតចេញពីទំនាក់ទំនងស្នេហារបស់ពួកគេ។ ពេលដែលមានសុខគឺត្រូវតែរួមសុខជាមួយគ្នា និងនៅពេលដែលមានទុក្ខគឺរួមទុក្ខជាមួយគ្នា។ នេះហើយជាដំណើរពិតនៃសេចក្ដីស្នេហា មិនមែនរួមតែសុខតែមិនរួមទុក្ខនោះឡើយ។ ដូច្នេះមិនថាដំណើរជីវិតស្នេហារបស់ពួកយើងក្លាយទៅជារីកចម្រើន ឬមិនរីកចម្រើននោះទេ គឺវាសុទ្ធសឹងតែជាសមទ្ធផលដែលកើតមានឡើងដោយសារតែកណ្ដាប់ដៃរបស់ពួកយើងទាំងពីរ អញ្ចឹងហើយយើងត្រូវទទួលយកវាដោយរីករាយ មិនត្រូវមានការស្ដាយក្រោយនោះឡើយ។
សរុបមកវិញ ស្នេហាត្រូវឆ្លងកាត់បីដំណាក់កាល គឺស្វែងយល់ (ទាំងក្នុង ទាំងក្រៅ) សកម្មភាព និងការទទួលខុសត្រូវ បើយើងបានស្វែងយល់បីចំណុចនេះ ហើយបីចំណុចនេះយើងត្រូវពិតមើលក្នុងសេចក្ដីស្នេហារបស់យើងហើយល្អគ្រប់គ្រាន់ហើយវាស្មើនឹងមានន័យថាស្នេហារបស់ពួកយើងជោគជ័យហើយ ។
ប្រពន្ធល្អ ជាមិត្តល្អ !!
យិន គឹមហ៊ាង
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
