ថៃជួលកីឡាករវាយតិនីសពិភពលោកមកប្រកួតនៅប្រទេសខ្លួន ក្នុងតម្លៃខ្លួនជាង៤លានដុល្លារ
- 2015-10-03 18:34:46
- ចំនួនមតិ 0 | ចំនួនចែករំលែក 0
ថៃជួលកីឡាករវាយតិនីសពិភពលោកមកប្រកួតនៅប្រទេសខ្លួន ក្នុងតម្លៃខ្លួនជាង៤លានដុល្លារ
ចន្លោះមិនឃើញ
កីឡាករវាយតិនីសលំដាប់ពិភពលោក Novak Djokovic និង Rafael Nadal បានធ្វើដំណើរមកប្រកួតគ្នាក្នុងទីក្រុងបាងកក ប្រទេសថៃ ជាឈ្នួលទឹកប្រាក់ជាង៤លានដុល្លារសហរដ្ឋអាមេរិក។
ប៉ុន្តែមុនការប្រកួត ដែលធ្វើនៅរាត្រីថ្ងៃសុក្រ Djokovic និង Nadal បានប្ដូរពីខោអាវតិនីស មកសំលៀកបំពាក់ អាវធំធ្វើពីសូត្របែបថៃ។ ការគ្រងសំលៀកបំពាក់នេះទំនងជាចង់លើកប្រជាប្រិយភាពរបស់រដ្ឋាភិបាលថៃ ដែលដឹកនាំដោយរបបយោធា ហើយក្នុងនោះកីឡាករទាំងពីរក៏បានជួបមេដឹកនាំយោធាថៃផងដែរ។
កីឡាករទាំងពីរក៏បានទៅបំពាក់កម្រងផ្កានៅទីសក្ការបូជា Erawan ដែលរងការបំផ្ទុះគ្រាប់បែកកាលពីខែសីហា កន្លងទៅ បណ្ដាលឲ្យមនុស្សប្រហែល២០នាក់បាត់បង់ជីវិត។
ការវាយប្រហារនេះបានប៉ះពាល់ដល់វិស័យទេសចរណ៍ថៃយ៉ាងខ្លាំង។ ដើម្បីស្រោចស្រង់ចំនួនភ្ញៀវទេសចរឲ្យមកកាន់ប្រទេសខ្លួនដូចមុន រដ្ឋាភិបាលថៃកន្លងទៅបានទាំងអញ្ជើញតារាល្បីហុងកុង ដូចជាអ្នកស្រី Michelle Yim Wai-ling និង លោក Simon Yam ឲ្យមកកាន់ប្រទេសខ្លួន ហើយតារាទាំងនោះក៏បានមកគោរពនៅទីសក្ការ Erawan នេះដែរ។
ចំពោះការមកប្រកួតរបស់កីឡាករតិនីសទាំងពីរ គឺត្រូវបានរៀបចំដោយសមាគម The Lawn Tennis របស់ប្រទេសថៃ។ សមាគមនេះឲ្យដឹងថា កីឡាករទាំងពីរទទួលបានថវិកាចំនួន ៤,១លានដុល្លារ សហរដ្ឋអាមេរិកចំពោះការមកប្រកួតនៅប្រទេសថៃនេះ។
ក្នុងការប្រកួតនារាត្រីថ្ងៃសុក្រ Djokovic បានយកឈ្នះ Nadal ដោយលទ្ធផល ៦-៤, ៦-២ ឯកីឡដ្ឋាន Hua Mark៕
ប្រភព៖ espn
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
