ធ្លាប់​ជា​តារា​ក្បាច់គុន​​មាន​ឈ្មោះ​បោះ​សំឡេង​​ក្នុង​វិស័យ​ភាពយន្ត​ហុងកុង កាល​ពី​ទសវត្ស​ឆ្នាំ ៧០និង៨០ តែ​ដោយ​សារ​តែ​រូប​សម្បត្តិ​មិន​អំណោយផល Leung Siu Lung បាន​ត្រឹម​តែ​ដើរ​តួរង​និង​កំប៉ិកកំប៉ុក​​តូច​តាច​តែ​ប៉ុណ្ណោះ។

ខ្សែ​ភាពយន្ត "ពូថៅ​ហោះ" ដែល​មាន​ឈ្មោះ​អង់គ្លេស​ថា "Kungfu Hustle” របស់ ទិនហ្វី បាន​បញ្ចប់​ទៅ​​ដោយ​ឈុត​ឆាក​ វាយ​តប់​ដោយ​ប្រើ​ក្បាច់គុន​យ៉ាង​សាហាវ​ ក្នុង​រយៈពេល​ជិត ១០ នាទី រវាង A Sing និង The Beast ដែល​ជា​តួអង្គ​​​​​ល្បី​​ឈ្មោះ​ក្នុង​ក្រុម​សង្គម​ងងឹត​មាន​ចិត្ត​ឃោរឃៅ​ សម្លាប់​មនុស្ស​មិន​រើស​មុខ​ក្នុង​មួយ​ប៉ប្រិច​ភ្នែក ជាមួយ​នឹង​ក្បាច់​គុន​កង្កែប​​​មួយ​គ្មាន​ពីរ។

ឈុត​ឆាក​ចុង​ក្រោយ​នេះ​ត្រូវ​បាន​សម្រិត​សម្រាំង​ឡើង ទុក​ជា​កាដូ​រំលឹក​ដល់​និមិត្តរូប លី ស៊ាវឡុង។ Stephen Chow (ទិនហ្វី) មិន​ត្រឹម​តែ​មាន​ឱកាស​បង្ហាញ​ក្បាច់គុន​តាម​រយៈ តួ​អង្គ A Sing ទេ​តែ​ព្រម​ទាំង​បាន​ធ្វើ​ឲ្យ​កេរ្តិ៍​ឈ្មោះ​​មួយ​ដែល​ត្រូវ​បាន​គេ​បំភ្លេច​ហើយ​នោះ​​រស់​ឡើង​វិញ។ នោះ​គឺ Leung Siu Lung តារា​សម្ដែង​ដើរ​តួ The Beast។

នៅ​លើ​កញ្ចក់​ទូរទស្សន៍ ហុងកុង អំឡុង​ទសវត្ស​ឆ្នាំ ៧០ កេរ្តិ៍​ឈ្មោះ​របស់ Leung Siu Lung ត្រូវ​បាន​គេ​រៀប​ក្នុង​តារាង​តារា​ឈ្មោះ​ ឡុង​ ទាំង​បី នោះ​គឺ លី ស៊ាវ​ឡុង លឿង ស៊ាវ​ឡុង និង ឈិន ឡុង។ ចូល​មក​ដល់ ទសវត្ស​ឆ្នាំ ៨០ លោក​មាន​ឈ្មោះ​ល្បី​ដោយ​​បាន​ក្លាយ​ជា​​តារា​សម្ដែង​ដំបូង​គេ​បង្អស់ សម្ដែង​តួ ឈិន ចិន របស់ លី ស៊ាវ​ឡុង ក្នុង​រឿង "Fist of Fury” ក្នុង​រឿង​ភាគ​ពីរ​គឺ "The Legendary Fok” និង "Chen Zhen” ដែល​ត្រូវ​បាន​ផលិត​ដោយ​ប៉ុស្តិ៍ ATV។ យ៉ាង​ណា​ក៏​ដោយ​ ដោយ​សារ​តែ​ជ្រើស​រើស​ក្បាច់គុន​ តាម​របៀប​ពិត​ប្រាកដ គ្រប់​ស្នៀត​ទាំង​អស់​សុទ្ធ​​សឹង​តែ​ត្រូវ​តាម​ក្បួន​ខ្នាត មិន​មាន​ភាព​ច្នៃ​ប្រឌិត បូក​រួម​ជាមួយ​នឹង​ត្រូវ​ទំពែក​ក្បាល​​ក្នុង​វ័យ​ក្មេង បាន​ធ្វើ​ឲ្យ Leung Siu Lung បាត់​បង់​ឱកាស​ជា​ច្រើន។ អាស្រ័យ​ហេតុនេះ លោក​ត្រូវ​​តារា​ស្រករ​ក្រោយ ឈិន ឡុង វ៉ា​មុខ និង​ចាប់​ពី​ពេល​នោះ​មក​បាន​​ត្រឹម​តែ​ដើរ​តួ​រង។

ឆ្នាំ ២០០៤ បួន​ឆ្នាំ​ក្រោយ​ពេល​ដើរ​ទាត់​ខ្យល់​គ្មាន​ការងារ​ធ្វើ Leung Siu Lung ត្រូវ​បាន Stephen Chow អញ្ជើញ​មក​ក្នុង​វិស័យ​សិល្បៈ​វិញ ដោយ​ចូល​រួម​សម្ដែង​ក្នុង​រឿង "ពូថៅ​ហោះ"។ នេះ​ជា​សកម្មភាព​គួរ​ឲ្យ​កោត​សរសើរ​របស់​ស្ដេច​កំប្លែង​ហុងកុង ដោយ​ចង់​លើក​កម្ពស់​តារា​រួម​ជំនាន់​​តែ​មួយ​ជាមួយ លី ស៊ាវ​ឡុង ដូច​ជា Yuen Wah (តួ​អង្គ​ប្ដី​ម្ចាស់​​ផ្ទះ​ជួល) Yeun Kiu (​តួ​អង្គ​ប្រពន្ធ​ម្ចាស់​ផ្ទះ​ជួល)។ ទទួល​បន្ទុក​​ដើរ​តួ​ The Beast, Leung Siu Lung បាន​បង្ហាញ​ឲ្យ​ទស្សនិកជន​បាន​ឃើញ​ថា ខ្ញី​កាន់​តែ​ចាស់​កាន់​តែ​ហឹរ​។ ហ៊ាន​ចូល​​សម្ដែង​ឈុត​ឆាក ក្បាច់គុន​គ្រោះ​ថ្នាក់​ដោយ​ខ្លួន​ឯង លោក​បាន​​ចូល​តួ​ដោយ​ជោគជ័យ​យ៉ាង​ត្រចះត្រចង់​​នៅ​​ពេល​ប្រើ​ក្បាច់​គុន កង្កែប បំប៉ោង​ថ្ពាល់ កោង​ខ្លួន​ដោយ​មាន​ជំនួយ​ពី​ក្រុម​បច្ចេកទេស។

ក្រោយ​រឿង "Kungfu Hustle” Leung Siu Lung មាន​ឱកាស​ថត​រឿង​ច្រើន​ជាង​មុន​ បើ​ទោះ​បី​​ជា​ត្រឹម​តួ​រង​ប៉ុណ្ណោះ។ បច្ចុប្បន្ន ក្នុង​វ័យ ៦៦ ឆ្នាំ លោក​​នៅ​តែ​បាន​អ្នក​ដឹក​នាំ​សម្ដែង​ចង​ចាំ​ថា ជា​តា​ចាស់​ដែល​ពូកែ​ក្បាច់​គុន។ ថ្មី​ៗ​នេះ Leung Siu Lung បាន​បង្ហាញ​ខ្លួន​ក្នុង​ភាពយន្ត​​ធំ​ៗ​ដូច​​ជា "The Grand Master”, “Zero Tai Chi”, “Badges of Fury” ជាដើម​៕

ទស្សនា​ឈុត​ឆាក​ប្រយុទ្ធ​របស់ Leung Siu Lung និង Stephen Chow ក្នុង​រឿង "Kungfu Hustle"៖

ចុចអាន៖រំឭក​អតីតកាល​ខ្មៅ​ងងឹត​របស់​​កំពូល​តារា​​ភាពយន្ត​ហុងកុង​ទាំង៥​រូប

​ប្រែ​សម្រួល៖ សុវណ្ណផៃ ប្រភព៖ បរទេស