និស្សិត IT មកពីឧត្តរមានជ័យ ប្រឹងស្រាវជ្រាវដើម្បីជួយពន្យល់មេរៀនមិត្តភ័ក្ដិ

2015-10-16 20:54:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ការជួយចែករំលែកនិងពន្យល់មេរៀនគ្នាទៅវិញទៅមកគឺជារឿងមួយល្អបំផុតសម្រាប់និស្សិតសិក្សាជំនាញ IT ព្រោះវាជំនាញបច្ចេកទេស ហើយសាំញ៉ាំនិងត្រូវការការអនុវត្តច្រើនជាងជំនាញដទៃ។

អៀ វេង លី (រូបថត ហ្វេសប៊ុក)

យុវជន អៀ វេងលី ដែលជានិស្សិតឆ្នើមមួយរូបរៀនផ្នែក IT ឆ្នាំទី៣ នៅសាកលវិទ្យាល័យភូមិន្ទភ្នំពេញ តែងតែឆ្លៀតពេលពន្យល់មេរៀនទៅដល់មិត្តភក្តិរបស់ខ្លួន ពេលពួកគេនៅមានចម្ងល់ណាមួយទៅលើមេរៀនរៀនរួច។

“ពេលខ្លះពួកគាត់មិនសូវយល់មេរៀនដែលរៀនរួច ពួកគាត់តែងតែមកសុំឱ្យខ្ញុំជួយពន្យល់ចំណុចណាដែលពួកគាត់នៅមិនទាន់ច្បាស់ ជាពិសេសគឺការសរសេរកូដហ្នឹងតែម្ដង។ នៅពេលបានជួយពន្យល់មិត្តភ័ក្ដិអ៊ីចឹង ខ្ញុំក៏សប្បាយចិត្តដែរបង ព្រោះយើងបានចេះទាំងអស់គ្នា...អត់ចង់យកតែរួចខ្លួនតែម្នាក់ឯងទេ ហើយពេលខ្លះខ្ញុំក៏ត្រូវឱ្យមិត្តជួយពន្យល់មេរៀនម្ដងម្កាលដែរ ព្រោះមិនមែនចេះទាំងអស់ទេ"។ វេង លី ប្រាប់ Sabay។

នៅក្នុងថ្នាក់រៀន វេង លី តែងតែយកចិត្តទុកដាក់ស្ដាប់គ្រូពន្យល់មេរៀន ហើយបើមានចំណុចណាមួយនៅមិនទាន់ច្បាស់ យុវជនដែលមានស្រុកកំណើតនៅខេត្តឧត្តរមានជ័យរូបនេះ តែងតែទៅស្រាវជ្រាវបន្ថែម។

វេង លី បានឱ្យដឹងទៀតថា គេមិនដែលលាក់លៀមអ្វីនោះរាល់ពេលមិត្តភ័ក្ដិសុំឱ្យជួយពន្យល់មេរៀន ហើយគេតែងតែយកចម្ងល់ទាំងឡាយដែលមិត្តភ័ក្ដិបានសួរ ទៅស្រាវជ្រាវបន្ថែមឱ្យយល់ច្បាស់សិន ទើបយកមកពន្យល់មិត្តភ័ក្ដិខ្លួនពេលក្រោយ។ មិនតែប៉ុណ្ណោះ ការស្រាវជ្រាវនិងការប្រឹងប្រែងជួយពន្យល់មេរៀនមិត្តភ័ក្ដិនេះ ក៏បានជួយឱ្យខ្លួនរឹតតែយល់ច្បាស់មេរៀនឯកទេសនោះថែមមួយកម្រិតទៀតផងដែរ។

“មានចំណុចខ្លះមិត្តភ័ក្ដិសួរទាក់ទងនឹងការសរសេរកូដ តែបើខ្ញុំមិនសូវច្បាស់ដែរនោះ ខ្ញុំតែងតែយកវាទៅរៀននិងស្រាវជ្រាវបន្ថែម រួមសឹមមកពន្យល់ពួកគាត់វិញដើម្បីឱ្យពួកគាត់អស់ចម្ងល់"។

ស្ថិតក្នុងចំណោមសិស្សលេចធ្លោ ដែលសិក្សាជំនាញ System ឆ្នាំទី៣នៅសាកលវិទ្យាល័យភូមិន្ទ វេង លី ជានិស្សិតមួយរូប ដែលចេះជួយយកអសារមិត្តរួមថ្នាក់ ដូចជាការពន្យល់មេរៀនផ្នែក IT មួយចំនួនហើយរូបគេក៏ធ្លាប់ឱ្យមិត្តភ័ក្ដិខ្ចីកុំព្យូទ័រម្ដងម្កាលសម្រាប់ការស្រាវជ្រាវផ្សេងៗផងដែរ។

ក្រៅពីការជួយពន្យល់មេរៀនដល់មិត្តរួមថ្នាក់ វេង លី ក៏បានជួយចែករំលែកចំណេះដឹងខ្លះៗ ដល់ដល់មិត្តភ័ក្ដិមានចម្ងល់នៅក្នុង Group មួយចំនួនលើ Facebook ដូចជា យុវជនសម្រាប់បច្ចេកវិទ្យា ចែកគ្នានិយាយ IT IT កូនខ្មែរ និង Android Heart ជាដើម ដើម្បីឱ្យរូបគេផ្ទាល់រួមទាំងយុវជនខ្មែរ កាន់តែមានចំណេះដឹងផ្នែក IT ទូលំទូលាយជាងមុន។

សព្វថ្ងៃ វេង លី ជានិស្សិតសិក្សាជំនាញ System នៅសាកលវិទ្យាល័យភូមិន្ទភ្នំពេញ (វេនយប់) តែនៅពេលចូលទៅដល់ឆ្នាំទី៤ យុវជនរូបនេះនឹងចាប់យកជំនាញ បង្កើតវិបសាយ (Web Developer) ព្រោះរូបគេគិតថា ការសិក្សាជំនាញនេះមិនសូវសាំញ៉ាំច្រើនដូចជំនាញ IT ដទៃ ហើយអាចរកប្រាក់ចំណូលបានច្រើនគួរសម សម្រាប់ទីផ្សារក្នុងស្រុកខ្មែរបច្ចុប្បន្ន៕

អត្ថបទ៖ ប៉ែត ផាន់និត