សាឡាត់ ស្រីឡាង ស៊ីថ្លៃជាង១ពាន់ដុល្លារ ក្នុង១រឿង

2015-10-21 15:01:33
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងស្រីវ័យក្មេង សាឡាត់ ស្រីឡាង បានថ្លែងប្រាប់ Sabay នៅព្រឹកនេះថា កម្រៃពីការងារសិល្បៈក្នុង១រឿងនាងទទួលបានតម្លៃខ្លួនពីការថត ជាង១ពាន់ដុល្លារសហរដ្ឋអាមេរិក។

តម្លៃខ្លួននេះ គឺបានឡើងជាងមុនទ្វេដង បើប្រៀបធៀបកាលនាងចូលសិល្បៈដំបូង។ ស្រីឡាង ប្រាប់ថាកាលនាងថតរឿង ដំបូងទទួលបានក្រោម១ពាន់ដុល្លារប៉ុណ្ណោះ ប៉ុន្តែក្រោយពីបានចេញមុខជាបន្តបន្ទាប់មក តម្លៃខ្លួនក៏ចេះតែឡើងតាមនោះដែរ។ " កាលរឿង ខ្មោចអាសង្ហា ខ្ញុំបានមិនដល់១ពាន់ទេ តែឥឡូវហ្នឹងឡើងហើយ ព្រោះមានគេស្គាល់ ជាបណ្ដើរៗហើយ" តារាស្រីវ័យ១៨ឆ្នាំថ្លែង។

សាឡាត់ ស្រីឡាង មិនបានប្រាប់ពី តួលេខប្រាក់ពិតប្រាកដដែលទទួលបានពីការថត ច្បាស់លាស់ឡើយ ប៉ុន្តែនាងប្រាប់ថា រយៈពេលដែលនាងថតក្នុងមួយរឿងៗ ប្លង់របស់នាងមិនលើសពី ១៥ទៅ២០ថ្ងៃឡើយ។ ចំពោះស្ប៉តពាណិជ្ជកម្ម ស្រីឡាង ប្រាប់ថា ស៊ីថ្លៃចន្លោះពី៤០០ទៅ៥០០ដុល្លារ ប៉ុណ្ណោះ។

ជាមួយនឹងតម្លៃខ្លួននេះ តារាស្រីមានកំណើតមកពីស្រុក ស្អាង ខេត្តកណ្ដាលម្នាក់នេះ និយាយថា ទៅថ្ងៃខាងមុខនាងមិនយកតម្លៃខ្លួនប៉ុណ្ណឹងទេ នៅពេលដែលប្រជាប្រិយភាពរបស់នាងកាន់តែល្បី នោះតម្លៃខ្លួនរបស់នាង ក៏ត្រូវតែឡើងទៅតាមនោះដែរ។

កញ្ញា សាឡាត់ ស្រីឡាង ទើបតែបោះជំហានចូលសិល្បៈប្រហែល១ឆ្នាំនេះ តាមរយៈមិត្តភ័ក្ដិ។ តារាស្រីម្នាក់នេះ មានឱកាសបានថតរឿង៣រឿងរួចមកហើយ ក្នុងនោះមានរឿង "ខ្មោចអាសង្ហា" រឿង "អ្នកលេងជើងខ្វេរ" និង រឿង "នាយខ្វាក់នាយខ្វិនឆ្លងភព" ដែលកំពុងដំណើរការថត ។ ទាំង៣រឿងនេះ ស្រីឡាង ក្ដាប់បានតំណែងតួឯករហូតដល់ទៅ២រឿង គឺ"ខ្មោចអាសង្ហា" និងរឿង"អ្នកលេងជើងខ្វេរ"។ ជាមួយគ្នានោះ នាងក៏ធ្លាប់បានថតស្ប៉តពាណិជ្ជកម្មជាបន្តបន្ទាប់ផងដែរ។ បច្ចុប្បន្ននាង កំពុងសិក្សាថ្នាក់ទី ១២នៃវិទ្យាល័យ ជាស៊ីមសាមគ្គី៕