Klopp ដឹកនាំ Liverpool យកឈ្នះក្រុមខ្លាំង Man City ដ៏ត្រចះត្រចង់យប់មិញ (មានវីដេអូ)

2015-11-22 16:16:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាជ័យជំនះដ៏មហិមាមួយរបស់ Jurgen Klopp អាចដឹកនាំហង្សក្រហម Liverpool ទៅស៊ីក្រុមដែលឈរនៅកំពូលតារាង Manchester City ដល់ផ្ទះ ដោយលទ្ធផល ១-៤ ក្នុងពានរង្វាន់លីកកំពូលអង់គ្លេស Premier League កាលពីយប់មិញ។

ចាប់ផ្ដើមប៉ុន្មានជា៧នាទី Eliaquim Mangala បានធ្វើឲ្យចូលទីខ្លួនឯង ធ្វើឲ្យ Liverpool នាំមុខមុន ០-១។ នៅនាទីទី២៣ Philippe Coutinho រកបានមួយគ្រាប់ឲ្យហង្សក្រហមបន្តនាំមុខ ០-២។ ក្រុមភ្ញៀវបានបន្ថែមមួយគ្រាប់ទៀត ដោយកីឡាករ Roberto Firmino នៅនាទីទី៣២។ ប៉ុន្តែជិតចប់តង់ទីមួយហើយ គឺនៅនាទីទី៤៤ Sergio Aguero ដែលទើបត្រឡប់ពីសម្រាកព្យាបាលរបួស បានស៊ុតមួយគ្រាប់ឲ្យមេឃខៀវតាមពីក្រោយ ១-៣។

ចូលដល់តង់ទីពីរ ក្រុមម្ចាស់ផ្ទះនៅមិនអាចធ្វើអ្វីទៅលើក្រុមភ្ញៀវបាននោះទេ។ ផ្ទុយទៅវិញ ក្រុមភ្ញៀវបានថែមមួយគ្រាប់ទៀតដោយ Martin Skrtel ហើយលទ្ធផលនេះបន្តរហូតដល់ចប់ការប្រកួត Liverpool ឈ្នះក្រុមកំពូលតារាង ១-៤។

អ្វីដែលប្លែកកាលពីយប់មិញ មុនការប្រកួត កីឡាករ Man City និង Liverpool បានឈរឆ្លាក់គ្នា ដើម្បីធ្វើគោរពទៅដល់ជនរងគ្រោះដោយសារការវាយប្រហារដោយគ្រាប់បែក និងការបាញ់រះនៅទីក្រុងប៉ារីស កាលពីថ្ងៃ១៣កន្លងទៅ។