អ៊ាម វន្នី មិនលាក់បាំងរឿងមានប្រពន្ធកូន
- 2015-11-27 13:00:47
- ចំនួនមតិ 0 | ចំនួនចែករំលែក 0
អ៊ាម វន្នី មិនលាក់បាំងរឿងមានប្រពន្ធកូន
ចន្លោះមិនឃើញ
តារាភាគច្រើនព្យាយាមលាក់បាំងសមាសភាពប្រពន្ធកូន ដើម្បីរក្សាប្រជាប្រិយភាពរបស់ពួកគេ។ ប៉ុន្តែអតីតបេក្ខភាព Cambodian Idol អ៊ាម វន្នី បានអះអាងថា មិនខ្វល់ខ្វាយពីបញ្ហានេះទេ ទោះបីជាមានអ្នកដឹងថា រូបគេមានប្រពន្ធកូនហើយយ៉ាងណាក៏ដោយ។
“ខ្ញុំមិនខ្វល់ទេ បើមានគេសួរនាំប្រាប់តាមដំណើរទៅ តែបើមិនមានអ្នកសួរទេ ធ្វើធម្មតាទៅអត់អីផងបង"។ អ៊ាម វន្នី ថ្លែងមកកាន់ Sabay កាលពីពេលថ្មីនេះ។ រូបគេបន្តដោយទទួលស្គាល់ថា បច្ចុប្បន្នរូបគេមានប្រពន្ធ និងមានកូនប្រុសម្នាក់ សព្វថ្ងៃរស់នៅជួបជុំគ្នាក្នុងទីក្រុងភ្នំពេញ ហើយគ្មានហេតុផលអ្វីត្រូវលាក់លៀមពីសមាសភាពអ្នកទាំងពីរនោះទេ។ សូម្បីនៅលើបណ្ដាញសង្គមរបស់តារាចម្រៀងមានទំនោរមិនចម្លងរូបនេះ ក៏បានបង្ហោះរូបថតប្រពន្ធកូនជារឿយៗ ដោយមិនខ្លាចពីផលប៉ះពាល់ដល់ប្រជាប្រិយភាពឡើយ។
ម្យ៉ាងទៀត រូបលោកយល់ថា ប្រជាប្រិយភាពមិនមែនកើតឡើងដោយភាពចៃដន្យនោះទេ ប៉ុន្តែអាស្រ័យលើសមត្ថភាពរបស់តារាម្នាក់ៗប៉ុណ្ណោះ។ ជាក់ស្ដែងបច្ចុប្បន្នភាពក្នុងសង្គមសិល្បៈខ្មែរ មានតារាសម្ដែង និងតារាចម្រៀងជាច្រើន ដែលមហាជនដឹងឮស្ទើរគ្រប់គ្នាថា មានប្រពន្ធកូនរួចហើយ ទីបំផុតនៅតែអាចរក្សាប្រជាប្រិយភាពបានដដែល ឬកាន់តែមានការគាំទ្រទៀតផងក៏មានដែរ។
អតីតបេក្ខភាព Cambodian Idol រូបនេះជឿជាក់ថា រូបគេអាចស្វែងរកការគាំទ្រតាមរយៈសមត្ថភាពផ្ទាល់ខ្លួន ហើយប្រជាប្រិយភាពកើតចេញពីការទទួលស្គាល់ការពិតរបស់ទស្សនិកជន។ លោកអះអាងថា ការគាំទ្ររបស់មហាជនទូទៅកន្លងមករហូតមកដល់ពេលនេះ មិនមែនដោយសារការបិទបាំងព័ត៌មានប្រពន្ធកូននោះទេ ប៉ុន្តែជាការផ្ដល់តម្លៃលើសមត្ថភាពប៉ុណ្ណោះ។
ហើយបច្ចុប្បន្នរូបគេកំពុងពង្រឹងសមត្ថភាពបន្ថែមទៀតក្នុងគោលបំណងឈានជើងកាន់តែជ្រៅក្នុងវិស័យសិល្បៈពោរពេញដោយការប្រកួតប្រជែង ហើយសង្ឃឹមថា ទស្សនិកជននៅតែមានការគាំទ្រចំពោះស្នាដៃបទចម្រៀងរបស់លោក៕
អត្ថបទ៖ សំ ជំនាញ