និស្សិតខ្មែររៀនជំនាញនុយក្លេអ៊ែរនៅប្រទេសបារាំង

2014-10-20 19:03:28
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជន ហ៊ុយ ស៊ីវអ៊ឺ វ័យ២៣ឆ្នាំដែលជាអតីតនិស្សិតវិស្វកម្មនៅវិទ្យាស្ថានបច្ចេកវិទ្យា ហើយបច្ចុប្បន្នជានិស្សិតថ្នាក់អនុបណ្ឌិតនៅសាកលវិទ្យាល័យដ៏ល្បី ល្បាញមួយរបស់ប្រទេសបារាំង ប្រាថ្នាចង់ឲ្យប្រទេសកម្ពុជាមាននុយក្លេអ៊ែរប្រើប្រាស់នឹងគេនាថ្ងៃអនាគត។

នេះគឺជាក្តីស្រមៃដ៏ធំធេងមួយដែលយុវជនវ័យ២៣ឆ្នាំរូបនេះបានប៉ង ប្រាថ្នាក្នុងមួយជីវិតរបស់គេ។ ទម្រាំតែរូបគេអាចស្វែងរកការសិក្សាជំនាញនេះបាន គេបានភ្លក់រសជាតិដាក់ពាក្យសុំអាហារូបករណ៍ចំនួន៤ដងរួចមកហើយ។

អាហារូបករណ៍ សិង្ហបុរី និងជប៉ុនសុទ្ធតែជាគោលដៅរបស់និស្សិតសិក្សាជំនាញវិស្វកម្មស្រវា ចង់ទៅសិក្សានៅទីនោះ។ ហ៊ុយ ស៊ីវអ៊ឺ បានប្រាប់ថា៖ “នៅថ្នាក់ទី១០ និងឆ្នាំទី១ ខ្ញុំធ្លាក់ដាក់ពាក្យសុំអាហារូបករណ៍សិង្ហបុរី។ ក្រោយមក ងាកទៅរកអាហារូបករណ៍ជប៉ុនវិញនៅឆ្នាំទី១ និងទី២ ជាប់បានត្រឹមវគ្គសម្ភាសន៍។ ជំនាញនីមួយៗមិនមែនមានតែប្រទេសមួយទេដែលគេផ្ដល់អាហារូបករណ៍នោះ ដូច្នេះមួយបរាជ័យ ត្រូវស្វែងរកមួយទៀត”។

នៅឆ្នាំ២០១១ ការខិតខំប្រឹងប្រែងរបស់គេបានចេញជាផលវិជ្ជមាន។ ស៊ីវអ៊ឺ បានទទួលអាហារូបករណ៍ពីសាកលវិទ្យាល័យ Ecole Polytechnique របស់បារាំងដែលល្បីបំផុតផ្នែកវិស្វកម្ម។

មុនពេលទទួលបាន អាហារូបករណ៍នេះ ស៊ីវអ៊ឺ បានប្រាប់ថា រូបគេបានស្វះស្វែងរកវិញ្ញាសាចាស់ៗពីសិស្សច្បង ស្វ័យសិក្សា និងរៀនជាក្រុម។ ការសិក្សាភាសាអង់គ្លេស និងបារាំង ក៏ជាលក្ខខណ្ឌមួយមិនអាចខ្វះបានដែរ។ កត្តាសំខាន់មួយទៀតគឺត្រូវមានទំនាក់ទំនងល្អជាមួយគ្រូ ព្រោះគ្រូជាអ្នកចេញលិខិតបញ្ជាក់ ហើយការសរសេរ Statement of Purposeក៏ចាំបាច់ត្រូវការគ្រូជាអ្នកជួយកែសម្រួលឲ្យដែរ។

បច្ចុប្បន្ន និស្សិតរូបនេះកំពុងសិក្សាជំនាញថាមពលសម្រាប់សតវត្សទី២១។ យុវជនរូបនេះបានបញ្ជាក់ថា ជំនាញនេះសិក្សាពីការរុករកថាមពលថ្មី ការប្រើប្រាស់ថាមពលឲ្យមានប្រសិទ្ធភាព ទាក់ទងនឹងវារីអគ្គិសនីជាដើម។ ជំនាញនេះជាគោលគ្រឹះមួយជួយពង្រឹងចំណេះដឹងសម្រាប់រូបគេ ព្រោះនៅឆ្នាំក្រោយគេនឹងចាប់យកជំនាញថាមពលនុយក្លេអ៊ែរហើយ។

ស៊ីវអ៊ឺ បន្តទៀតថា៖ “ខ្ញុំចង់ឲ្យប្រទេសខ្មែរមាននុយក្លេអ៊ែរប្រើនឹងគេ។ អ្នកខ្លះគ្រាន់តែឮថានុយក្លេអ៊ែរច្បាស់ជាគិតដល់គ្រឿងផ្ទុះ ដូចជាគ្រាប់បែកនុយក្លេអ៊ែរ ឬក៏គ្រឿងអាវុធផ្សែងពុលអីជាដើម។ ត្រង់នេះហើយដែលខ្ញុំចង់បញ្ជាក់ប្រាប់គេ ថាមពលនុយក្លេអ៊ែរនោះសំដៅលើការបម្លែងថាមពលនោះយកមកប្រើប្រាស់លើ ការងារប្រចាំថ្ងៃ និងការផ្គត់ផ្គង់ដំណើរការរោងចក្រជាដើម”។

ដោយ សារតែមើលឃើញពីថាមពលប្រើប្រាស់ ជាពិសេសថាមពលអគ្គិសនីនៅក្នុងប្រទេសកម្ពុជាពឹងផ្អែកលើប្រទេសជិត ខាង ហើយការផ្គត់ផ្គង់នោះនៅមានកង្វះខាតនៅឡើង និងម្យ៉ាងទៀត នៅស្រុកខ្មែរមានសាលានៅបាត់ដំបងបង្រៀនជំនាញនុយក្លេអ៊ែរនេះដែរ ទើបយុវជនរូបនេះចង់ដាស់គំនិតដល់កូនខ្មែរជំនាន់ក្រោយឲ្យចាប់ អារម្មណ៍លើមុខជំនាញនេះ។

លើស ពីនេះទៅទៀតនោះ ស៊ីវអ៊ី ក៏បានលើកឡើងផងដែរថា៖ “តាមការពិតគ្មាននិស្សិតខ្មែរសិក្សានៅបរទេសណាចង់ធ្វើការនៅ បរទេសនោះទេ ព្រោះវប្បធម៌ និងភាសាខុសគ្នា ពិបាកនឹងសម្របខ្លួនធ្វើការជាមួយគ្នាណាស់។ គេគ្រាន់តែឲ្យយើងនូវតំណែងណាមួយតែប៉ុណ្ណោះ ប៉ុន្តែមិនអាចឈានដល់តំណែងខ្ពស់ធ្វើជាប្រធានអីនោះទេ។ ប៉ុន្តែខ្ញុំមើលឃើញថា អ្នកខ្លះនៅមិនត្រឡប់មកស្រុកវិញ ក៏ព្រោះតែលក្ខខណ្ឌការងារ ឱកាសការងារ និងប្រាក់ខែមិនសមស្របនឹងជំនាញរបស់គេ”។

បន្ទាប់ពីបញ្ចប់ ការសិក្សានៅប្រទេសបារាំង យុវជនរូបនេះមានគម្រោងត្រលប់មកស្រុកខ្មែរវិញ ដើម្បីយកចំណេះដឹងពីការសិក្សានោះមកផ្សព្វផ្សាយ និងអនុវត្តក្នុងគោលបំណងធ្វើឲ្យប្រទេសជាតិមានការរីកចម្រើន។

និស្សិត ថ្នាក់អនុបណ្ឌិតរូបនេះបានប្រាប់ទៀតថា៖ “ខ្ញុំចង់បង្កើតរោងចក្រនុយក្លេអ៊ែរ ឬក៏ធ្វើការនៅក្រសួងឧស្សាហកម្ម រ៉ែ និងថាមពលនៅស្រុកខ្មែរ។ ជឿថានៅថ្ងៃអនាគត ខ្មែរនឹងមានថាមពលប្រើប្រាស់ផ្ទាល់ខ្លួន មិនពឹងពាក់គេទៀតទេ”។

យ៉ាងណាមិញ ស៊ីវអ៊ឺ មិនត្រឹមតែជានិស្សិតថ្នាក់អនុបណ្ឌិតនោះទេ រូបគេក៏ជាប្រធានសមាគមនិស្សិតខ្មែរនៅសាកលវិទ្យាល័យ Ecole Polytechnique នោះផងដែរ។ សមាគមរបស់គេបានចូលរួមផ្សព្វផ្សាយពីវប្បធម៌ប្រពៃណីខ្មែរ ដូចជាការបង្ហាញពីរបាំ និងម្ហូបខ្មែរដើម ដល់និស្សិតបរទេសដទៃបានស្គាល់ពីខ្មែរ។

ប្រធានសមាគមនេះរូប នេះបានបញ្ជាក់ថា៖ “មាននិស្សិតបរទេសជាច្រើនគេថាធ្លាប់ឮឈ្មោះប្រទេសខ្មែរដែរ ក៏ប៉ុន្តែមិនដែលដឹងថាខ្មែរយើងមានប្រពៃណីយ៉ាងម៉េចនោះទេ។ វាពិតជាសំខាន់មែនទែនសម្រាប់និស្សិតខ្មែរដែលបានទៅសិក្សានៅ បរទេស គឺពួកគេមិនត្រូវភ្លេចផ្សារភ្ជាប់ជើងមេឃរវាងប្រទេសយើង និងគេ វប្បធម៌យើង និងគេ ព្រោះវាជួយពង្រឹងនូវមិត្តភាព និងការផ្លាស់ប្ដូរនូវវប្បធម៌”។

កាន់តែពិសេសជាងនេះទៅទៀត នោះ យុវជនរូបនេះក៏បានចូលរួមចំណែកចងក្រងគេហទំព័រប្រជុំវិញ្ញាសា និងលំហាត់ផ្សេងៗសម្រាប់សិស្សនិស្សិតដែលចង់ប្រឡងយកអាហារូបករណ៍ទៅ សិក្សានៅបរទេស ក៏ដូចជាប្រទេសបារាំងផងដែរ។

ចង់មើលគេហទំព័រប្រជុំវិញ្ញាសា និងលំហាត់របស់យុវជនរូបនេះ សូមចុចត្រង់នេះ ជាអ្វីដែលស៊ីវអ៊ឺអាចជួយដល់យុវជនជំនាន់ក្រោយ ដោយសារចង់ឃើញសិស្សនិស្សិតខ្មែរក្លាយជាធនធានមនុស្សអាចជួយ អភិវឌ្ឍប្រទេសជាតិឲ្យកាន់តែរីកចម្រើន។

ជាចុងក្រោយ គេបានផ្ដែផ្ដាំដល់យុវវ័យគ្រប់រូបថា ប្រសិនបើគេបរាជ័យ មិនទទួលបានអាហារូបករណ៍ទៅសិក្សានៅបរទេសទេ សូមកុំអាក់អន់ស្រពន់ចិត្ត ត្រូវចេះសម្លឹងរកមើលឱកាសផ្សេងទៀត។ ការសិក្សាមួយដែលខ្លាំង ហើយជោគជ័យ គឺទាមទារនូវការសិក្សាស្រាវជ្រាវឲ្យបានច្រើន និងជៀសវាងការចំណាយពេលឥតប្រយោជន៍លើបណ្ដាញទំនាក់ទំនងសង្គម៕

អានអត្ថបទជាច្រើនទៀតទាក់ទងនិស្សិតខ្មែរសិក្សាក្រៅបរទេស សូមចុចត្រង់នេះ។

អត្ថបទ៖ ផល្លា សុម៉ាលីណា