Buriram បង្ហាញកីឡាករថ្មី២រូប ម្នាក់ជាអតីតកីឡាករ Crystal Palace ម្នាក់មកពី Chonburi

2015-12-07 17:11:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លិបជើងឯកលីកកំពូលថៃ Buriram United បានធ្វើឲ្យអ្នកគាំទ្រភ្ញាក់ផ្អើលយ៉ាងខ្លាំង ដោយបានបង្ហាញមុខកីឡាករចំណូលថ្មី២រូបនៅមុនការប្រកួតទល់នឹង Saraburi នៅកីឡដ្ឋាន Thunder Castle របស់ខ្លួន កាលពីថ្ងៃអាទិត្យ។ កីឡាករទើបទិញចូលនោះ គឺកីឡាករប្រេស៊ីល Andre Moritz ដែលជាអតីតកីឡាករក្លិប Crystal Palace របស់អង់គ្លេស និងម្នាក់ទៀតគឺអតីតប្រធានក្រុមជម្រើសជាតិថៃ Adul Lahso មកពីក្រុម Chonburi FC។

Andre Moritz និងលោក Newin Chidchob ប្រធានក្លិប Buriram United

ខ្សែបម្រើវ័យ២៩ឆ្នាំ Moritz គឺជាកីឡាករដែលផ្លាស់ពីក្លិបនៅលីកកំពូលកូរ៉េខាងត្បូង (K-League) Pohang Steelers។ កីឡាកររូបនេះ ធ្លាប់ប្រកបអាជីពនៅក្លិបជាច្រើន ដោយចាប់ផ្ដើមពីប្រទេសប្រេស៊ីល ដែលជាប្រទេសកំណើតរបស់ខ្លួន (Internacional, Fluminense) មុនផ្លាស់ទៅលេងនៅទួរគី អង់គ្លេស ឥណ្ឌា និងកូរ៉េខាងត្បូង។ កីឡាករកម្ពស់ ១,៨៧ម៉ែត្ររូបនេះ បានរួមចំណែកជួយឲ្យ Crystal Palace ឡើងទៅលេង Premier League (២០១២-២០១៣) មុនផ្លាស់ទៅលេងនៅ Bolton Wanderers។

ចំណែក Lahso វិញ គឺជាខ្សែបម្រើការពារជម្រើសជាតិថៃ វ័យ២៩ឆ្នាំដូច Moritz ដែរ។ កីឡាកររូបនេះ គឺជា key player របស់ Chonburi ដែលធ្លាប់រួមចំណែកជួយឲ្យក្លិបនៅខេត្តឈុនប៊ូរីមួយនេះឈ្នះជើងឯកលីកកំពូលថៃម្ដង និងពាន Kor Royal Cup ៣ដង។ មិនត្រឹមតែប៉ុណ្ណោះទេ Lahso ក៏ធ្លាប់ជួយក្រុមជម្រើសជាតិថៃ លើកពាន AFF Suzuki Cup ឆ្នាំ២០១៤ ក្នុងនាមជាប្រធានក្រុមថែមទៀតផង។

Adul Lahso

បញ្ជាក់ផងដែរថា Moritz ដែលនឹងពាក់អាវលេខ១១ គឺជាកីឡាករបរទេសទី២ដែល Buriram ទើបទិញចូលសម្រាប់ត្រៀមរដូវកាលក្រោយ ពោលគឺបន្ទាប់ពីកីឡាករអ៊ុយរុយហ្គាយ Emiliano Alfaro។ ទាំង Moritz និង Lahso (នឹងពាក់អាវលេខ៤) សុទ្ធតែមានឈ្មោះលេងនៅ AFC Champions League ឆ្នាំ២០១៦ ហើយក៏ទំនងជាអាចចូលលេងក្នុងពាន Mekong Club Championship វគ្គផ្ដាច់ព្រ័ត្រ ទល់នឹងក្រុមបឹងកេតអង្គររបស់កម្ពុជា នាថ្ងៃទី២០ ធ្នូខាងមុខផងដែរ៕