​អ្នក​ដំណើរ​ប្រមាណ​​១៨២​នាក់​ ​ ក្នុង​​ចំណោម​ ៤៧០០នាក់ បាន​ធ្លាក់​ខ្លួន​ឈឺ​នៅ​​​លើ​កប៉ាល់​​​ប្រណិត​ជិះ​កម្សាន្ត​​​ឈ្មោះ Explorer of the Seas ​ដែល​បាន​ចូល​ចត​នៅ​​ទីក្រុង​ស៊ីដនី ប្រទេស​អូស្ត្រាលី កាល​ពី​ថ្ងៃ​ពុធ​ម្សិលមិញ។ ​នេះ​បើ​តាម​ការ​ឲ្យ​ដឹង​របស់​​មន្ត្រី​សុខាភិបាល​ New South Wales។

​ប្រធាន​មន្ទីរ​សុខាភិបាល​សាធារណៈ​ ​​​​លោក​វេជ្ជបណ្ឌិត Mark Ferson បាន​មាន​ប្រសាសន៍​ថា​ការ​ផ្ទុះ​មេរោគ​ឆ្លង​នេះ​​បាន​ចាប់ផ្ដើម​​ឈឺ​ពីរ​បី​ថ្ងៃ​ហើយ ក្រោយ​ពី​កប៉ាល់​​ចាក​ចេញ​ពី​ទីក្រុង​ស៊ីដនី កាល​ពី​ថ្ងៃ​ទី២ ​ធ្នូ និង​រីក​រាលដាល​​យ៉ាង​រហ័ស​បំផុត។

​​​លោក​​ប្រាប់​ថា «​វា​ប្រហែល​មក​ពី​មេរោគ​​ឆ្លង​មួយ​ប្រភេទ​ឈ្មោះ Norovirus ​ដែល​ធ្វើ​ឲ្យ​អ្នក​ដំណើរ​រាក និង​ក្អួត​ចង្អោរ​»។ ​ការ​ផ្ទុះ​មេរោគ​​​ទាំង​នេះ​បាន​កើត​ឡើង​​ពី​មួយ​ថ្ងៃ​ទៅ​មួយ​ថ្ងៃ ដោយ​សារ​​វា​មាន​ភាព​ឆ្លង​​លឿន ​ដែល​ពិបាក​គ្រប់​គ្រង។​

​លោក​បន្ត​ថា​​ការ​ផ្ទុះ​មេរោគ​​​ឆ្លង​លើ​កប៉ាល់​​ចូល​ទីក្រុង​ស៊ីដនី ​បាន​​​កើត​ឡើង​ ៥ទៅ​​៦ដងហើយ​​​ក្នុង​​ឆ្នាំ​នេះ ​តែ​មិន​មាន​​ទ្រង់​ទ្រាយ​ធំ​ដូច​លើក​នេះ​ឡើយ។ មេរោគ Norovirus ​​​បាន​បម្លែង​ខ្លួន​​ប្លែក​ៗ​នៅ​​ប៉ុន្មាន​ឆ្នាំ​ចុងក្រោយ ​ដែល​ដូច​ទៅ​នឹង​មេរោគ​ផ្ដាសាយ​ដែរ។

​ចំណែក​ក្រុមហ៊ុន Royal Caribbean Cruises Ltd របស់​​កប៉ាល់​ខាង​លើ និង​កន្លែង​ចំណត ​សន្យា​ពង្រឹង​ការ​បោស​សម្អាត និង​ធ្វើ​អនាម័យ​នានា ដើម្បី​ការ​ពារ​ពី​ការ​ឆ្លង​ជំងឺ ​ទៅកាន់​កប៉ាល់​​ផ្សេង​ទៀត។ ​អ្នក​​ដំណើរ​​​​ថ្មី​ដែល​មាន​រោគ​សញ្ញា​​សង្ស័យ​ណាមួយ​ក្នុង​រយៈ​ពេល​ពីរ​បី​ថ្ងៃ ​ត្រូវ​ទទួល​បាន​ការ​ប្រឹក្សា​ពី​ក្រុមហ៊ុន​ផង​ដែរ៕

ប្រែ​សម្រួល៖​ឡេង ភារុណ ប្រភព៖ abc