ច្បាស់ការ! Pep នឹងចាកចេញពី Bayern ជំនួសវិញដោយ Ancelotti

2015-12-21 16:20:31
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Pep Guardiola បានសម្រេចចិត្តចាកចេញពី Bayern Munich នៅដំណាច់រដូវកាលនេះ ហើយលោក Carlo Ancelotti នឹងក្លាយជាអ្នកចាត់ការថ្មីត្រូវមកជំនួសតំណែងកៅអីដែលទំនេរ។ នេះបើតាមការប្រកាសជាផ្លូវការពីក្លិបយក្សរបស់អាល្លឺម៉ង់។

សេចក្ដីសម្រេចចិត្តខាងលើបានជម្រះមន្ទិលសង្ស័យជាច្រើនខែពីអនាគតរបស់លោក Pep ដែលស្ទាក់ស្ទើរក្នុងការបន្តកុងត្រាថ្មីជាមួយ Bayern បើទោះជាបានដឹកនាំក្លិបទទួលជោគជ័យយ៉ាងខ្លាំងក្នុងរយៈពេលជាង២ឆ្នាំកន្លះនៅទីនោះក៏ដោយ។

លោក Karl-Heinz Rummenigge នាយកប្រតិបត្តិក្លិប Bayern មានប្រសាសន៍ថា៖ "ពួកយើងសូមថ្លែងអំណរគុណដល់លោក Pep Guardiola សម្រាប់អ្វីគ្រប់យ៉ាងដែលគាត់បានជួយដល់ក្លិបតាំងពីឆ្នាំ២០១៣ មក។ ខ្ញុំសូមប្រកាសថា Pep នឹងចាកចេញពីក្លិបនៅចុងរដូវកាលហើយសង្ឃឹមថា គាត់ និងក្រុមទាំងមូល នឹងសហការគ្នាយ៉ាងល្អដើម្បីសម្រេចគោលដៅរបស់យើងជាមួយនឹងពេលវេលាដែលនៅសល់"។

ក្នុងរយៈពេលជិត៣ឆ្នាំលោក Guardiola បានដឹកនាំ Bayern ឈ្នះជើងឯកកំពូលអាល្លឺម៉ង់ចំនួន២ដង ពាន DFB Pokal ១ដង និងពានដទៃចំនួន២ផ្សេងទៀត ប៉ុន្តែគាត់មិនទាន់អាចយកពាន UEFA Champions League មកកាន់ទឹកដី Bavaria បាននៅឡើយ ខុសពីកាលនៅអេស្ប៉ាញដែលគាត់ជួយ Barca ឈ្នះ រហូតដល់ទៅ២ដង។

ការចាកចេញពីអាល្លឺម៉ង់របស់គ្រូបង្វឹកវ័យ៤៤ឆ្នាំ គឺជាព័ត៌មានដ៏ល្អសម្រាប់ក្លិបធំៗមួយចំនួនដែលកំពុងដណ្ដើមគ្នាចង់បានរូបលោក ក្នុងនោះមានដូចជា Manchester City, Chelsea, Paris Saint-Germain និង Manchester United ជាដើម៕