អានអត្ថបទនេះហើយ អ្នកនឹងមិនចោលកញ្ចប់តូចដាក់ក្នុងប្រអប់ឥវ៉ាន់ទៀតទេ

2015-12-30 15:47:42
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សជាច្រើនពេលប្រទះឃើញកញ្ចប់តូចមួយ ដែលគេបានដាក់ក្នុងប្រអប់ឥវ៉ាន់ ឬប្រអប់ទំនិញអេឡិចត្រូនិក តែងបោះវាចោល។ តាមពិតកញ្ចប់តូចនោះ គឺជាកញ្ចប់គ្រាប់ Silica ដែលជាតិ Silica មានអត្ថប្រយោជន៍ច្រើនសម្រាប់ឧបករណ៍ប្រើប្រាស់ប្រចាំថ្ងៃ។ ខាងក្រោមនេះជាអត្ថប្រយោជន៍របស់កញ្ចប់ជាតិ Silica នោះ៖

១. ជួយបន្ថយសំណើមទូរសព្ទធ្លាក់ក្នុងទឹក

ទូរសព្ទ ឬឧបករណ៍អេឡិចត្រូនិក ជ្រុះធ្លាក់ក្នុងទឹកដោយចៃដន្យ ភាគច្រើនគេតែងយកទៅដាក់កប់ក្នុងអង្ករដើម្បីកម្ចាត់សំណើមចេញពីខាងក្នុងឧបករណ៍។ ប៉ុន្តែសម្រាប់កញ្ចប់គ្រាប់ Silica គឺមានប្រសិទ្ធភាព១០ដងច្រើនជាងដាក់កប់ក្នុងគ្រាប់អង្ករ។ ដាក់ឧបករណ៍អេឡិចត្រូនិកសើមកប់ក្បែរកញ្ចប់គ្រាប់ Silica នោះអ្នកនឹងឃើញពីប្រសិទ្ធភាព។

២. ជួយរក្សារូបថតចាស់ៗឲ្យនៅស្អាត

ដាក់កញ្ចប់គ្រាប់ជាតិ Silica ក្នុងស៊ុមឬប្រអប់រូបថតចាស់ៗ នឹងជួយរក្សារូបថតទាំងនោះពីជាតិសំណើមផ្សេងៗដែលជួយរក្សារូបថតឲ្យនៅស្អាតរាប់ឆ្នាំ។

៣. ការពារគ្រឿងសំអាង

ដាក់កញ្ចប់គ្រាប់ជាតិ Silica ក្នុងកាបូបគ្រឿងសំអាងនឹងជួយការពារគ្រឿងសំអាងតុបតែងខ្លួន ដូចជាម្សៅផាត់មុខ កុំឲ្យខះ ពិបាកផាត់លើមុខ។

៤. បំបាត់ក្លិនផ្អួរ

ជាតិ Silica ជួយស្រូបយកសំណើមចេញពីស្បែកជើង កាបូប ដែលមានជាតិសើមសំបូរបាក់តេរី។ ជាតិសំណើម ញើស និងបាក់តេរីទាំងនោះដែលធ្វើឲ្យសម្ភារៈប្រើប្រាស់ មានក្លិនមិនល្អ ដូចនេះកញ្ចប់គ្រាប់ Silica ជួយកម្ចាត់បាន។

៥. កន្សែងជូតដែលមានក្លិនស្អុយ

ដាក់កញ្ចប់គ្រាប់ Silica ពីរឬបីជាប់ចន្លោះកន្សែងជូត កន្សែងពោះគោ អាចបង្ការពីក្លិនមិនល្អបាន។

៥. កញ្ចក់ឡានច្បាស់ថ្លា

ជាតិសើមបង្កជាកំណកស្អិតជាប់លើកញ្ចក់ឡាន ធ្វើឲ្យស្រអាប់ពិបាកមើលពេលបើកបរ។ ច្របាច់កញ្ចប់គ្រាប់ Silica ពីរឬបីកញ្ចប់លើកញ្ចក់ ទុករយៈពេលពីរទៅបីថ្ងៃនោះនឹងឃើញពីប្រសិទ្ធភាព។

៦. រក្សាគ្រឿងអលង្ការឲ្យស្អាតភ្លឺរលោង

ជាតិសំណើមធ្វើឲ្យគ្រឿងអលង្ការឡើងស្រអាប់និងប្ដូរពណ៌បាន។ ដាក់កញ្ចប់គ្រាប់ Silica ពីរបីក្នុងប្រអប់គ្រឿងអលង្ការនិងបន្ថយជាតិសំណើម និងរក្សាគ្រឿងអលង្ការឲ្យនៅស្អាតភ្លឺរលោងបានយូរ៕

ចំណាំ៖ សម្រាប់ជាតិ Silica នោះគឺមានអត្ថប្រយោជន៍ច្រើនក្នុងជីវភាពប្រចាំថ្ងៃ ប៉ុន្តែអ្នកគួរដាក់ឲ្យឆ្ងាយពីដៃកូនក្មេង ឬសត្វចិញ្ចឹម ចៀសវាងពួកគេបរិភោគវាដោយចៃដន្យ។ គ្រាប់ Silica មិនធ្វើឲ្យពុលទេ ប៉ុន្តែវាអាចធ្វើឲ្យឆ្លាក់បាន៕

ចុចអាន៖ វិធីសាមញ្ញបំផុតជួយក្មេងៗពេលស្លាក់របស់អ្វីមួយ

ប្រែសម្រួល៖ មាន រតនា ប្រភព៖ metro 