ខេម វែកញែកជុំវិញរឿង Original Song

2016-01-04 16:30:13
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង លោក ខេម បាននិយាយថា ប្រសិនបើចង់ឲ្យបទចម្រៀងថ្មី ឬ Original Song មានគុណភាព ផលិតកម្ម ឬក្រុមហ៊ុនទាំងអស់ដែលធ្វើអាជីវកម្មលើបទចម្រៀង ត្រូវទិញតម្លៃឲ្យខ្ពស់ទៅលើស្នាដៃអ្នកនិពន្ធដែលផលិតឡើង។

លោក ខេម ឆ្លើយតបជាមួយ Sabay ជុំវិញការងាកមកច្រៀងបទ Original Song របស់តារាចម្រៀងមួយចំនួនធំ នាពេលបច្ចុប្បន្ននេះ។ លោក ថ្លែងថា " បើ១ខែគាត់ធ្លាប់ផលិតបាន១០ បទ គាត់រកចំណូលបាន៥០០ ទៅ៧០០ដុល្លារ បទគាត់ចេញមកល្អខ្លះអត់ខ្លះ តែផលិតកម្ម ឬក្រុមហ៊ុនទិញពីអ្នកនិពន្ធហ្នឹងតម្លៃឲ្យថ្លៃ ខ្ញុំគិតថា គាត់នឹងនិពន្ធបានល្អជាងនេះ ព្រោះគាត់មិនសម្រុកយកតែបរិមាណទេ ច្បាស់ជាយកគុណភាពច្រើនជាង ហើយជីវភាពគាត់ក៏អាចរស់បានប្រសើរជាងនេះដែរ"។

តារាចម្រៀងធ្លាប់មានប្រវត្តិជាអ្នករត់ម៉ូតូឌុបម្នាក់នេះ បានបន្តថា លោកពិតជាគាំទ្រ ដល់តារាចម្រៀង ក៏ដូចជាផលិតកម្មទាំងអស់ដែលបានរួមគ្នាបង្កើតបទចម្រៀងថ្មីៗ។ យ៉ាងណាទន្ទឹមគ្នានោះ លោកក៏មិនសូវពេញចិត្តផងដែរ ទៅហ្នឹងតារាចម្រៀងចាស់ៗមួយចំនួនដែលយក Original Song ធ្វើជាលេស ទាញចំណាប់អារម្មណ៍។ "សូមកុំយក Original Song ធ្វើជាលេស កាលខ្លួននៅល្បី ម៉េចមិនច្រៀងទៅ អាហ្នឹងមកពីច្រៀងទៅលែងសូវល្បី បានទាញ Original Song មកឲ្យគេចាប់អារម្មណ៍វិញនោះ" ។

ម្ចាស់បទ "បែកពីអូន បងមានលុយចាយជាងមុន" បានបន្ថែមទៀតថា រឿងបទចម្លង ឬ Original Song មិនចាំបាច់ប្រាប់គេក៏បាន ព្រោះពេលចេញទៅទស្សនិកជននឹងដឹងខ្លួនឯងហើយ សំខាន់ធ្វើបទឲ្យតែល្អ ហើយច្រៀងឲ្យពីរោះទៅគឺបានហើយ។ មួយវិញទៀត លោកថា ផលិតកម្មនានា គួរតែកុំលើកតារាចម្រៀងតាមរយៈខ្សែតែច្រៀងមិនកើត ហួសហេតុពេក ផ្ទុយទៅវិញ គួរផ្ដល់ឱកាសដល់អ្នកមានសមត្ថភាពជាជំនួសវិញ។

ទោះបីជាគាំទ្រ ព្រមទាំងលើកទឹកចិត្ត ដល់ការផលិតបទចម្រៀង Original Song ក្ដី តែ ខេម ក៏នៅតែបន្តឲ្យផលិតកម្មនានា ចេញបទចម្លងពីបរទេសខ្លះៗដដែល ព្រោះលោកគិតថា ភ្លាមៗផលិតកម្ម មិនអាចធ្វើបាន១០០% ឡើយ។ ប៉ុន្តែយ៉ាងណា ចំពោះការយកបទចម្រៀងបរទេសមកច្រៀងនោះ លោកបានសំណូមពរថា ផលិតកម្មទាំងអស់ គួរតែទិញសិទ្ធិឲ្យបានត្រឹមត្រូវជៀសវាងការរិះគន់៕

អត្ថបទ៖ ខុត សីហា