សួរខ្លួនឯង១០សំនួរ មុនពេលបោះបង់ការងារ ចាប់ផ្ដើមជំនួញផ្ទាល់ខ្លួន

2016-01-05 19:01:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្ដីស្រម៉ៃចង់ក្លាយជាម្ចាស់ជំនួញមួយ គឺជាអ្វីៗដែលគ្រប់គ្នា ឬអ្នកធ្វើការក្នុងអង្គភាពណាមួយប្រាថ្នាចង់បាន ប៉ុន្តែការបោះបង់ចោលការងារប្រចាំថ្ងៃដើម្បីឈោងចាប់របរថ្មីភ្លាមៗនោះ ក៏អាចធ្វើឲ្យអ្នកមិនសូវមានទំនុកចិត្តប៉ុន្មានឡើយ។

ខាងក្រោមនេះជាដំបូន្មានខ្លះៗរបស់អ្នកជំនាញ ជូនប្រិយមិត្តពិចារណាមុនពេលចោលការងារចាប់ផ្ដើមជំនួញផ្ទាល់ខ្លួន៖

១. តើជំនួញថ្មីនោះធ្វើឲ្យអ្នកពេញចិត្តជាងការងារប្រចាំថ្ងៃដែរទេ?

មុនពេលឈានជើងចេញពីការងារ ត្រូវប្រាកដថាជំនួញជាអ្វីអ្នកចង់បានពិតប្រាកដឬទេ មិនមែនធ្វើជំនួញសម្រាប់តែគេចពីការងារបច្ចុប្បន្ននោះឡើយ។ សៀវភៅជំនួញមួយឈ្មោះថា How the Smartest Business Owner Build their Fortunes និយាយថា មានមនុស្សជាច្រើន ទទួលបានភាពស្ងាត់ស្ងៀម កម្របាននិយាយស្ដីពេលកំពុងធ្វើការឲ្យគេ ប៉ុន្តែមុនពេលចាកចេញទៅធ្វើថៅកែខ្លួនឯង ត្រូវជឿជាក់ថាអ្នកនឹងទទួលបានបរិយាកាសរីករាយក្នុងជំនួញនោះ។

២. តើវាជាពេលសក្ដិសមសម្រាប់បើកជំនួញឬនៅ?

ប្រសិនប្រពន្ធអ្នកមានផ្ទៃពោះ ឬអ្នកបានចំណាយពេលវេលាច្រើនសម្រាប់មើលថែមនុស្សចាស់ ឬឪពុកម្ដាយ វាប្រហែលជាពេលមិនទាន់ល្អសម្រាប់ចេញពីការងារ ទៅបើកជំនួញនៅឡើយទេ។

៣.តើអ្នកនឹងទូទាត់ចំណូលចំណាយយ៉ាងដូចម្ដេច?

ត្រូវប្រាកដថា អ្នកនឹងមានប្រាក់សម្រាប់ការចំណាយលើជំនួញ និងប្រាក់សម្រាប់ខ្លួនទទួលបាន ត្រូវបែងចែកឲ្យបានច្បាស់លាស់។

៤. តើអ្នកមានការជួយជ្រោមជ្រែងពីក្រុមគ្រួសារ និងមិត្តភ័ក្ដិទេ?

ការជំរុញលើកទឹកចិត្ត និងការសរសើរពីសមាជិកគ្រួសារ និងមិត្តភ័ក្ដិជិតស្និត ជាអ្វីមិនអាចខ្វះបាន ព្រោះវាជាកម្លាំងចលករជួយឲ្យអ្នកជម្នះរាល់ភាពនឿយហត់ និងអារម្មណ៍ធុញថប់នានា។

៥. តើជំនួញនោះអាចផ្លាស់ប្ដូរជីវិតរបស់អ្នកបានប៉ុណ្ណា?

ការក្រោកពីគេង ចេញទៅធ្វើការជាច្រើនម៉ោង ស្វាគមន៍បុគ្គលិកខ្លួន ជាការល្អបំផុត។ ចាប់ផ្ដើមជីវិតថ្មីជាមួយជំនួញនេះអ្នកត្រូវរៀបចំចាត់ចែងឲ្យបានហ្មត់ចត់ ច្នៃប្រឌិត បង្កើតថ្មី និងសកម្មជាងមុន។

៦. តើអ្នកមានវិន័យសម្រាប់ខ្លួនឯងក្នុងនាមជាថៅកែទេ?

មនុស្សភាគច្រើន គិតថាប្រសិនបើពួកគេបានក្លាយជាថៅកែហើយ របរនោះនឹងធ្វើឲ្យជីវិតពួកគេប្រសើរជាងមុន ដោយទស្សនៈនេះពេលខ្លះត្រូវ តែមិនទាំងអស់ទេ។ ជំនួញធំៗ មិនបានធ្វើឲ្យថៅកែអង្គុយស្រួលខ្លួនឡើយ ត្រូវគិតគ្រប់ជំហាន និងគ្រប់គ្រងឃ្លាំមើលគ្រប់នាទី ពិសេសអតិថិជនខ្លួន។

៧. តើអ្នកអាចតេស្ដសាកល្បងនៃជំនួញថ្មី ដោយមិនបាច់បោះបង់ការងារប្រចាំថ្ងៃបានដែរទេ?

អ្នកនឹងមិនអាចចូលចិត្តជំនួញថ្មី ប្រសិនបើមិនមានការប្ដេជ្ញាចិត្តទុកមុន។ ឧទាហរណ៍ ប្រសិនបើអ្នកចង់បើកហាងកាហ្វេផ្ទាល់ខ្លួនមួយ អ្នកត្រូវដឹងការងារ ឬធ្លាប់ធ្វើការក្នុងហាងកាហ្វេយ៉ាងតិច កន្លះឆ្នាំឲ្យដឹងពីស្ថានភាពរបស់វា។

៨. តើអ្នកមានជំនាញផ្សេងទៀតទេ ក្រៅពីជំនាញនៅកន្លែងការងារ?

ការមានជំនាញបន្ថែមលើជំនាញការងារបច្ចុប្បន្ន ជារឿងសំខាន់មួយទៀតដែលជួយជំរុញជំនួញដើរទៅមុខ ជាពិសេសបច្ចេកវិទ្យាថ្មីៗចុងក្រោយ និងការទាក់ទងអតិថិជនតាមអ៊ីនធឺណិត ឬបណ្ដាញសង្គមផ្សេងៗ។

៩. តើជឿជាក់ថាគំនិតអាជីវកម្មរបស់អ្នកអាចទទួលយកបានឬទេ?

អ្នកត្រូវត្រៀមខ្លួនថាផ្លូវសម្រាប់អាជីវកម្មដើរ នឹងរីកចម្រើន។ ដកស្រង់គំនិតល្អៗពី សហគ្រិនជោគជ័យដែលដើរទៅមុនអ្នកមួយជំហាន យកមកសិក្សាស្វែងយល់ ដើម្បីបំពេញចំណុចខ្វះខាតរបស់ខ្លួន។

១០. តើអ្នកមានគម្រោងអាជីវកម្ម ឬនៅ?

ការសរសេរ គម្រោងអាជីវកម្មជារឿងដ៏លំបាកសម្រាប់អ្នកដែលចង់បង្កើតអាជីវកម្ម ថ្មីថ្មោង ប្រសិនបើអ្នកជំនួញធំៗវិញ គម្រោងអាជីវកម្មត្រូវធ្វើឡើងយ៉ាងហ្មត់ចត់ ច្រើនសន្លឹក វិភាគ និងវាយតម្លៃគ្រប់ជ្រុងជ្រោយ មុននឹងសម្រេចដាក់ចេញឲ្យអនុវត្ត។ ប៉ុន្តែសម្រាប់អ្នកដែលមានបង្កើតអាជីវកម្មផ្ទាល់ខ្លួន ទ្រង់ទ្រាយតូច ឬលក្ខណៈគ្រួសារ មិនចាំដល់ថ្នាក់លម្អិតពេកនោះទេ៕