ទិញរថយន្តបង់រំលស់ មើលលក្ខខណ្ឌមុនសម្រេចចិត្តទៅរួចឬមិនរួច

2016-01-11 16:17:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសារលទ្ធភាពទៅមិនទាន់រួច ពលរដ្ឋមួយចំនួនបានសម្រេចចិត្តទិញរថយន្តដោយបង់រំលស់។ ការទិញរថយន្តដោយប្រើវិធីសាស្ត្របង់រំលស់ធ្វើឲ្យពលរដ្ឋមិនបារម្ភពីការចំណាយអស់ច្រើន ប៉ុន្តែក៏ត្រូវឆ្លងកាត់ពីនីតិវិធីនិងលក្ខខណ្ឌជាច្រើនដើម្បីអាចទទួលបានរថយន្តតាមសេចក្តីត្រូវការ។

លោក យូ ដែលជាម្ចាស់ហាងលក់ទិញរថយន្តយីហោ 6869 បានប្រាប់ពីលក្ខខណ្ឌនិងនីតិវិធីមួយចំនួនមុនពេលពលរដ្ឋគិតចង់ទិញរថយន្តដោយប្រើសេវាបង់រំលស់ពីហាងលក់រថយន្តនានា។

ទី១. ឯកសារពាក់ព័ន្ធ៖

អតិថិជនត្រូវមានសៀវភៅគ្រួសារ អត្តសញ្ញាណប័ណ្ណ ប្រាក់ចំណូលប្រចាំខែ ប្លង់ផ្ទះថតចំលង។ ចំណែកអ្នកមានមុខរបររកស៊ីត្រូវភ្ជាប់ប័ណ្ណប៉ាតង់អាជីវកម្មរបស់ខ្លួន។

លោកថា ឯកសារទាំងនេះសំខាន់ណាស់។ ដូចជាប្រាក់ចំណូលប្រចាំខែរបស់អតិថិជន វាជះឥទ្ធិពលដល់ការបង់ប្រាក់ប្រចាំខែនៃតម្លៃរថយន្ត។ បើប្រាក់ចំណូលទាប ឬមិនស្មើពាក់កណ្ដាលនៃតម្លៃរថយន្តក៏មិនទទួលបានសេវាកម្មនេះដែរ។ រីឯប្លង់ផ្ទះក៏ចាំបាច់ខ្លាំងជាងប្រាក់ខែទៀតព្រោះវាជាសាក្សីដើម្បីផ្ដល់សេចក្ដីទុកចិត្តទាំងភាគីម្ចាស់ហាង និងអតិថិជន។

ទី២. ពិនិត្យលទ្ធភាពជាក់ស្តែង៖

ប្រភេទរថយន្តដែលអតិថិជនត្រូវការ ត្រូវសមាមាត្រប្រាក់ចំណូល។ ឧទាហរណ៍ អតិថិជនចង់បានរថយន្ត Lexus RX 330 តម្លៃជាង ១៥០០០ ដុល្លារ។ ប្រាក់ដែលត្រូវបង់ដំបូងគឺ ៣០ ភាគរយនៃតម្លៃរថយន្តសរុប។

លោកថា ទោះជាតម្លៃរថយន្តនោះខ្ពស់ ឬទាបជាង ១៥ ០០០ ដុល្លារអតិថិជនក៏ត្រូវបង់តម្លៃដំបូង ៣០ ភាគរយជាដាច់ខាតនិងការបង់បន្ថែមលើអត្រាការប្រាក់ជាមួយរយៈពេលដែលបានព្រមព្រៀង ប៉ុន្តែប្រសិនបើអតិថិជនចង់បង់ផ្ដាច់មុនកំណត់ក៏មិនអីដែរ។

លោកបន្ថែមថា មានអតិថិជនជាច្រើនតែងតែត្អូញត្អួរថា ការបង់រំលស់រថយន្តមានការស្មុគស្មាញណាស់។ ការដែលមានបញ្ហានេះកើតឡើងក៏ព្រោះតែអតិថិជនមិនបានយល់ច្បាស់ពីតម្លៃរថយន្តដែលខ្លួនចង់បាន ព្រោះកាលណារថយន្តតម្លៃខ្ពស់ការទាមទារលក្ខខណ្ឌក៏ច្រើនតាមហ្នឹងដែរ។

ជាក់ស្ដែង ហាងលោកសួររកប្លង់ផ្ទះ ប្រាក់ចំណូលប្រចាំខែ អ្នកធានា ជាដើមក៏ដើម្បីការពារអតិថិជនដែរ ព្រោះវាឯកសារតម្កល់នៅពេលមានបញ្ហាណាមួយកើតឡើងជាយថាហេតុ។

បន្តអាន៖ ក្រុមហ៊ុនធំ ៣ ប្រាប់លក្ខខណ្ឌទិញរថយន្តបង់រំលស់

អត្ថបទ៖ រក្សា