ស្ត្រីដែលថើបពស់ ត្រូវពស់ហក់ខាំនៅថៃ ទទួលសំណងជាង៣ពាន់ដុល្លារ

2016-01-11 18:28:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រីអ្នកទេសចរជនជាតិចិនម្នាក់ ត្រូវពស់ថ្លាន់ហក់ខាំច្រមុះកាលពីថ្ងៃទី ៩មករាកន្លងទៅ បន្ទាប់ពីនាងប៉ុនប៉ងថើបពស់ នៅពិធីតាំងបង្ហាញពស់ Snake Show នៅខេត្តភូកេត ប្រទេសថៃ ។ ពេលនេះក្រុមហ៊ុន សម្រេចចេញសងថ្លៃព្យាបាល ការឈឺចុកចាប់ និងជំងឺចិត្ត ប្រមាណ ៣ ៣០០ដុល្លារអាមេរិក។ នេះបើតាមការអះអាងរបស់អ្នកតំណាងកម្មវិធី Snake Show ។

សំណងនេះត្រូវបានតំណាងក្រុមហ៊ុន Pawai Odski បានបញ្ជាក់កាលពីរសៀលម្សិលមិញ នៅតំបន់ Chailong។ ពស់ថ្លាន់នេះមានអាយុ ៣ឆ្នាំ និងប្រវែង ១,៥ម៉ែត្រ ហើយវាតែងតែត្រូវអ្នកទេសចរជាច្រើនថតទុកជាអនុស្សាវរីយ៍។

ឧបទ្ទវហេតុនឹកស្មានមិនដល់ខាងលើ ត្រូវបានអ្នកដំណើរផ្សេងទៀតថតជាប់សកម្មភាពទាំងស្រុង រួចបង្ហោះនៅលើបណ្ដាញសង្គម ធ្វើឲ្យមានការរិះគន់ដ៏ច្រើន។

អ្នកប្រើប្រាស់អ៊ីនធឺណិតខ្លះ និយាយថា ស្ត្រីជនជាតិចិននេះ សមតែពស់ចឹកបែបនេះ ដែលហ៊ានទៅជិតពស់ពេក និងថើបសត្វសាហាវថែមទៀត។ អ្នកខ្លះយល់ថា គ្រោះថ្នាក់នេះ គួរតែក្រុមហ៊ុនទេសចរណ៍ជាអ្នកទទួលបន្ទុក ដើម្បីធានាសុវត្ថិភាពជូនអតិថិជនខ្លួន។

ទោះជាយ៉ាងណាក៏ដោយមន្ត្រីការិយាល័យទេសចរណ៍ និងកីឡាខេត្តភូកេតលោក Santi Pawai អះអាងថាករណីនេះជារឿងចៃដន្យ គ្មានការគ្រោងទុក ហើយពិធីតាំងបង្ហាញពស់ Snake Show ជាពិធីស្របច្បាប់ និងបានចុះបញ្ជីត្រឹមត្រូវ ដូច្នេះស្ត្រីនោះសមតែទទួលបានទឹកប្រាក់សំណង ដើម្បីបញ្ចប់រឿង៕