លោកស្រី ជុន សុថានី ៖ ក្រុមហ៊ុនមួយនឹងក្ស័យធន បើគ្មានការគ្រប់គ្រងសាច់ប្រាក់

2016-01-21 14:55:47
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកស្រី ជុន សុថានី នាយិកាប្រតិបត្តិរបស់ក្រុមហ៊ុន First Finance បានលើកឡើងថា បើទោះបីជាជំនួញ ឬក្រុមហ៊ុនមួយ មានប្រតិបត្តិការល្អយ៉់ាងណាក៏ដោយ គឺអាចក្ស័យធនបានគ្រប់ពេល បើសិនគ្មានការគ្រប់គ្រងសាច់ប្រាក់ ឱ្យបានសមរម្យនោះទេ (Financial Management)។ ការថ្លែងរបស់លោកស្រី បានធ្វើឡើងក្នុងកម្មវិធី Business Forum 2016 នៅមជ្ឈមណ្ឌលសហប្រតិបត្តិការកម្ពុជា-កូរ៉េកាលពីថ្មីៗនេះ។

“បើទោះជំនួញមួយមានប្រតិបត្តិការល្អយ៉ាងណាក៏ដោយ បើសិនជាអត់មាន Financial Management ទេ ជំនួញនោះអាចក្ស័យធនគ្រប់ពេល ប៉ុន្តែបើសិនក្រុមហ៊ុនហ្នឹងមានប្រតិបត្តិការល្អ តែខាតក៏ដោយក៏ក្រុមហ៊ុនហ្នឹង នៅតែអាចឈរជើងបាន"។

លោកស្រី ជុន សុថានី នាយិកាប្រតិបត្តិនៃក្រុមហ៊ុន First Finance

លោកស្រី ជុន សុថានី បានរៀបរាប់បន្តក្នុងអគារសហប្រត្តិបត្តិការកម្ពុជា-កូរ៉េ នាពេលកន្លងទៅថា និយមន័យ Technical របស់ Financial Management គឺ...

-ការធ្វើផែនការ៖ រៀបចំថវិកា រួមទាំងការគិតពីលំហូរទឹកប្រាក់ ចំណេញ ឬខាត
-ប្រតិបត្តិការ៖ ធ្វើប្រតិបត្តិការអ្វីដែលយើងបានគ្រោងទុក
-ការត្រួតពិនិត្យ៖ ត្រួតពិនិត្យតាមភាពជែកស្ដែង ពេលផែនការដាក់ឱ្យដំណើរការ។ តើផែនការត្រឹមត្រូវទេ?
-ការវាយតម្លៃ៖ ត្រូវវាយតម្លៃថាតើ គម្រោងហ្នឹងយ៉ាងម៉េច? ត្រូវការផ្លាស់ប្ដូរអ្វីខ្លះអត់?

ទោះបីជាយ៉ាងណា លោកស្រីបញ្ជាក់ថា ក្នុងជំនួញអត្ថន័យ Financial Management ជារួមគឺជាការគ្រប់គ្រងសាច់ប្រាក់ក្នុងក្រុមហ៊ុនមួយ ប្រកបដោយប្រសិទ្ធភាពនិងត្រឹមត្រូវ ហើយគោលបំណង Financial Management គឺមានបួនចំណុចធំៗ៖

១-បង្កើនប្រាក់ចំណេញ៖ ធ្វើឱ្យក្រុមហ៊ុនចំណេញច្រើនជាងមុន។
២-បង្កើនទ្រព្យដល់ម្ចាស់ភាគហ៊ុន៖ ម្ចាស់ភាគហ៊ុនទទួលបានប្រាក់ចំណេញទៅវិញ។
៣-រក្សាលំហូរសាច់ប្រាក់ក្រុមហ៊ុន ៖ Finance គេចង់បាន Cash flow ហើយដើម្បីធ្វើអ្វីមួយឱ្យដើរ ឬរីកចម្រើន គេត្រូវដឹងថា តើគេត្រូវគ្រប់គ្រងលុយដោយរបៀបណា បើទុកចោលគឺចំណេញទេ។ គេត្រូវដឹងថា មានលុយត្រូវការប្រើអត់ ? ពេលណាត្រូវការលុយចូល? ពេលណាត្រូវការបញ្ចេញប៉ុន្មាន? លុយហ្នឹងយកពី Shareholder ឬខ្ចីគេ? តើខ្ចីពីណា និងចំនួនប៉ុន្មាន? ខាតឬចំណេញក៏ដោយ គឺធ្វើយ៉ាងម៉េចឱ្យក្រុមហ៊ុន មានលំហូរសាច់ប្រាក់។ បើគ្មាន Cash flow សមរម្យទេ ជំនួញអាចដួលបាន។
៤-ធានាថាក្រុមហ៊ុននៅដំណើរការបាន៖ គឺត្រូវធានាថា ក្រុមហ៊ុនត្រូវតែដំណើរការ និងត្រូវដឹងពីលំហូរសាច់ប្រាក់ ដូចជាពេលណាបង្វិលលុយសងលុយគេ ពេលណាយកលុយថែម យកពេលណាចំណេញតិច យកពេលណាចំណេញច្រើន គួរប្រើប្រាក់របស់ Shareholder ប្រាក់កម្ចី ឬធ្វើយ៉ាងណា ដើម្បីឱ្យចំណេញ។

“ការគ្រប់គ្រងសាច់ប្រាក់ មានសារៈសំខាន់គ្រប់ជំនួញទាំងអស់ មិនថាជំនួញប្រភេទណាទេ រួមទាំងមនុស្សយើងម្នាក់ៗដែរ...បើគិតតែពីចាយ អត់ចំណូល អត់សន្សំទុក យើងនឹងជួបបញ្ហា"។ លោកស្រីថ្លែងបញ្ជាក់៕

អត្ថបទ៖ អ៊ុំ សុភក្តិ